أضف سؤال أو موضوع جديد          

طريقة تنظيف راديتر السيارة 00 طريقه مجربه00

up 15 down 1
اللـــه أكبـــر 44
قبل 7 سنه و 7 شهر



ياخوان مع دخول وقت الصيف الحار حبيت اعطيكم طريقة تنظيف الراديتر بدون ماتروح الصناعيه وتدفع فلوس كثيرة وتعب هذي الطريقه توفر عليك المال وهي طريقه بسيطه من خلال تجربتي انا
كانت معي صني 2001 في البلد وبالتحديد تحت سرعة 120 الحرارة تمام لكن اذا سافرت مع الخط الطويل  وتعديت سرعة 120 تزود الحرارة ومع كل سرعه تزود احيان اذا وصلت 170 تروح فوق النص واذا هديت تنزل الى حالتها الطبيعيه 
ذهبت الى الصناعيه وكل ماجيت ورشه يقول راس المكينه يبغى خرط  واللي يقول فك البلف وخلها بدون بلف اللين ماجيت اخر محل فيه يمني  بغيت ادخلها عنده بقول اخرط الراس لكن جاني هندي الترصيص اللي عندهم وقال شوف ياصديق انتا يسوي غسيل راديتر ولا لا  قلت لا قال شوف انتا ودي محل راديتر وسوي غسيل راديتر  وانتا شوف اذا مايظبط ممكن مشكله راس مكينه انا قلت يعني يضبط قال هو انتا جرب مافي مشكله سيارة اذا ينفع ولا مافي يضر قلت شكرا صديق المهم طلعت السيارة من الورشه وعلى محل الراديتر قلت ابغى انظف الراديتر قال ماعندك مشكله قلت كم قال 150 قلت سلامات غالي قال والله هذا السعر قال هذا سعري قلت مع السلامه المهم وروح لمحل قطع غيار واخذ مويه مقطر اللي تجي علبته حمراء واخذ جركل ماء احمر ثقيل اللي قيمته 45 ريال  وروح البيت وادخل السيارة داخل الحوش وافتح الكبوت واسرب المويه اللي في الراديتر كلها واجيب لي جركل واعبيه ماء تحليه من البيت واقوم اصب في الراديتر سويتها ثلاث مرات اللين مانزلت المويه الوصخه اللي في الراديتر كلها وبعدها سكرت الراديتر وصبيت مويه حمراء ربع الجالون وبعدها صبيت نص العلبه  مويه مقطر وبعدها صبيت الماء الاحمر كله وزدت الراديتر من الماء التحليه اللين اخرة وبعدها شغلت السيارة وروحت مع طريق سريع وجربتها الحرارة رجعت تمام يعني طبيعيه  مستحيل تصل للنص حتى على سرعه 200 والحمدلله استخدمتها 3شهور وبعتها وهي اوكيه
  الطريقه ماتاخذ منك اكثر من نص ساعه 
بالتوفيق للجميع 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


موضوع جميل أخي الكريم
ووفقنا واياكم لما هو مفيد
وتقبل منا مرورنا على موضوعكم
وجعله في ميزان حسناتكم
أخوكم
أبو عبدالرحمن


up 4 down 0
abo_abedruhman84 538
قبل 7 سنه و 7 شهر



مشكور أخوي وماتقصر ..
فعلا طريقه حلوه وسهله ..
بدال ماتروح عند الخبازين والسباكين اللي يلعبون في سياراتنا وماندري وش يسوين ..
أسويها أنا وأكون عارف وش سويت ووش ماسويت وبكذا وفرت الفلوووس ..
يعطيك العافيه وتستاهل لايييييك ..


up 2 down 0
عاشقـ الماركيز {1991} 3498
قبل 7 سنه و 7 شهر



ياخي ابراهيم  الطريقه هذي تنظف المجاري في الراديتر يعني اذا مليانه اتربه او ترسبات وهي تنظف الراديتر بنسبة 90% وانا مجربها 


up 1 down 1
اللـــه أكبـــر 44
قبل 7 سنه و 7 شهر



طريقتك جيده نوعا ما

لكن المشكله اذا كان فيه رواسب بالاديتر وبالاكواع والليات وكذلك بمجاري الماء دخل سلندر

الافضل للي يستخدمون مويه تحليه او عايديه

عمل تسييخ للاديتر 

بالاضافه على غسيل سلندر وهو بجاهز خاص يتم فصل ليات الماء الللي من الراديتر
ومن المكينه وتشبك بالجهاز ويتم تدوير الماء لين يصير صافي ووضع ماده لازاله الرواسب من المكينه
وكذلك لقربه



واللي يبي يشتغل بالبيت واول مره له

ينتبه ويحذر لا يفضي المويه والموتر حار 
على طول يطق ويضرب الراس 

اقل شي لين يبرد تماما

بالتوفيق


up 4 down 0
مدرس عاطل -2
قبل 7 سنه و 7 شهر



نصيحة للكل أذا تبي تسوي تسييخ للرديتر لازم تكون مشرف على الغسيل بنفسك لأن أغلب العمالة يضيف مادة (( أسيد )) أثناء الغسيل والمعروف أنه يسبب تآكل الحديد ويسبب الصدأ نصيحة اللي يبي يغسل يضيف تايد أو منظفات عادي بس الفلاش و الآسيد كلها تلعب بالحديد وتزيد الطين بله والموية الحمراء ممتازة مرة وفيه نوعين واحد ثقيل مثل الزيت والثاني يجي خفيف موية حمراء قيمة الجالون 45 ريال وبالتوفيق للجميع


up 0 down 0
ناصر الرشود 309
قبل 7 سنه و 7 شهر



التسييخ أفضل لانه يطلع جميع الاوصاخ والصدى

لاكن حركتك جيدة لابأس بها


up 1 down 1
ls caprice 2078
قبل 7 سنه و 7 شهر



في نقطة مهمة يا أخي

يجب فك بلف الحرارة لعمل الغسيل للماكينة

لأن الرواسب ممكن تبقى في الماكينة لأن البلف ما يفتح إلا عند ارتفاع حرارة السيارة

وطبعاً بعد الغسيل يتم تركيب البلف مرة أخرى

وشكراً على النصيحة


up 1 down 0
أبو عبادة 4850
قبل 7 سنه و 7 شهر



يعطيك العافيه والله لايحرمك من الاجر


up 0 down 0
استثنائي 790
قبل 7 سنه و 7 شهر



من المهم انك نناكد من تنظيف الردايتر كل سنتين
والاهم انك تحط موية الردايتر المناسبة خضراء او حمراء الاهم انك ما تحط موية البلدية لانها املاح واتربة

ومشكور على النصحية 


up 0 down 0
amh2222 418
قبل 6 سنه و 3 شهر



نفس طريقتي بس كانت عندي صني 2004 


up 0 down 0
السهل الاخضر -9
قبل 5 سنه و 2 شهر



صني؟  و2001؟

اقول الله لايهينك غير الراديتر بس 


up 1 down 0
في السماء غيم 220
قبل 4 سنه و 10 شهر



ونسيت اعطيك لايك عشان مااحبطك:-D


up 1 down 0
في السماء غيم 220
قبل 4 سنه و 10 شهر