ابي نصيحتكم في شراء مكينة من التشليح

3 1

لايمكنك التصويت حتى الحصول على 20 نقطة على الأقل
إضغط هنا للإخفاء

العصيمـي 314
قبل 11 سنه و شهر

السلام عليكم ورحمة الله وبركاتة

اخواني اسعد الله مسائكم بكل خير 

انا نويت اشتري مكينة من التشاليح بدل توضيب المكينة
لأن موتري لومينا 2006 ال اس وكان فيها اصوات فالمكينة وغيرت طرمبة الزيت
وللأسف طلعت المشكلة من السبايك والتكايات وقالو توضيب كامل وانا والله مالي ومال دوخة الراس
مشكلة التوضيب نادر من يضبطه ونادر من يستخدم مفتاح العزم لضبط الوزنيات
والضمان مايساعد اللي يقول شهر او شهرين
وراح تكلفني بحدود 6000 ريال
وناس واجد مايمدحون التوضيب
وطبعآ من اسباب تخبيط المكينة هو التأخر في تغيير الزيت والسيفون
ونصيحة لوجه الله لكم غيرو الزيت كل 3 الاف ولا بالكثير 4 الاف مع السيفون في كل تغييرة
لأن انا مشيت على قولت غير كل 5 الاف ولا 6 الاف والسيفون مره كل تغيرتين زيت وهذا اللي صار
لأن يوم فكو المكينة وقت تغيير طرمبة الزيت كنت عندهم والله الزيت محوط على المكينة من داخل كاملة
صاير مثل الشحم واكثره ناشب ويابس واسود + تفريغ الدبات الامامية ضعف عندي العزم وصرفية بالبنزين
وصوت مزعج وريحة كربون وهو واحد من اسباب المشاكل اللي صارت للمكينة

المهم اخواني اليوم رحت للتشاليح وحصلت مكينة نفس موديل موتري غير موضبه
والحمدلله شكلها الخارجي نضيف مافيها زيوت او تشحيم خارجي وشدني فيها ممشاها
لأني طلبت منهم يشبكون البطارية واشوف كم ماشي الموتر وحصلته 150 الف
وانا موتري ماشي بحدود الـ 250 الف
وعطاني ضمان 20 يوم واغلب التشاليح 15 يوم 
والسعر معقول 6000 ريال مع التركيب
وقال جربها وافحصها وجربها بالخط من حرارة او تهريب او اي شي فيها
واذا قدر الله وصار فيها شي انقلها بسطحة على حساب المحل وتاخذ فلوسك او مكينة غيرها

الحين بارك الله فيكم ابي اسألكم كيف طريقة الفحص اوديها الوكالة ولا اقرب مركز فحص
ولا بس اجربها وامسك عليها خط واشوف وضعها
وهل الفحص يطلع اذا فيها شي او صارلها توضيب سابقآ
لأن راعي المحل قال حتى لو بعد 5 سنوات لو تطلع موضبه تردها لنا

اتمنى مااكون طولت عليكم لكن موضوع المكينة مهم التشاور فيه واخذ خبراتكم . . .

دمتم

إبلاغ

الردود