أضف سؤال أو موضوع جديد          

قصتي مع كابرس 94

up 87 down 27
ابو يزيد 000 8712
قبل 8 سنه و 7 شهر



السلام عليكم ورحمة الله وبركاته




اليوم وانا استرجع ذكرياتي القريبه والبعيده تذكرت لي موقف ماهو ببعيد يمكن قبل سنتين او ثلاث 
كنت طالع صف 3 ثانوي بالعططله الكبيره واهلي مسافرين لجده وانا مشغول مع البيت يرمموه خلوني انا الضعيّف اوقف مع العمال كأنهم حاسديني على هالعطله ههههه الله يخليهم لي يارب المهم بأذكر لكم هالموقف




ذاك اليوم كان معي المزيونه ( كابرس 94 ) توي شاريها ب 19 ألف ريال نظظيفه وماشيه700 الف بس ايوه 700 الف والضاهر بالميل




المهم قلت لازم أجرب المزيونه على خط الشرقيه لاني كنت طفشان وهي ما كملت معي اسبوعين و قلت لازم نروح للشرقيه مع اثنين من الشباب بدون محد يدري 5 ايام ونرجع وعلي الحساب 




واكلمهم وكان ردهم متشابهه وهو ( أنت صاحي ولا مجنون ؟ هذي يالله يالله أستأمن عليها روحتي للمسجد وتبغاني اسافر معك فيها ؟ يالله بس ظف وجهك طوط طوط طوط )




وانا هنا تحطمت ورحمت المزيونه وحسيت ان المزيونه تقولي انت وش عليك منهم , انا المزيونه , مدامني معك محد يعكر او يوقف بطريقك صح و لا لا ؟




وانا قلت ايه أفا عليك , اعرفكي انتي المزيونه ما تخونني هههههههه قلبت نفسيه




ومن اليوم الثاني اروح لغرفتي واخذلي ثوبين وسروال وفنيله سنه و احطه بالمزيونه وانا اول مره اسافر لحالي و خايف جداً لكن مدام معي الله ثم المزيونه ما بشيل هم واروح اشتري لي سي دي قرآن للشيخ القطامي , ملاحظه لحد يقول ان الكابرس ما فيها سيدي , مركب لها صاحبها الاول مسجل سوني سيدي وكاست , 
المهم أمسك الطريق الساعه 4 العصر واشغل القران على الاخر والسياره ترج من الصوت هههههه واقرأ دعاء السفر و حط رجلك على البنزين وما تجي الساعه 7 ونص الا انا بالشرقيه 




شفتوا المزيونه كيف , جابت الشرقيه ب 3ساعات ونص و تراني ما كنت ميت من الخرعه و داعس ومشغل الانوار الداخليه ومرفع الصوت على الاخر , لا الامر طبيعي جدا ههههههههههه




المهم واوصل واكلم راعي تاكسي واقوله امش قدامي لين توصلني لشقق حدائق الخليج ووصلت واحاسبه واوقف المزيونه و استأجر شقه واصلي و اخذلي عصير مع اندومي على حساب الشقه و ارقد




واليوم الثاني قلت خلني اشيك على فم المزيونه واروح عند اللي يغيرون زيت و يفتح برطم المزيونه و يقول احححح كل شيء وكاله كل شيء وكاله حتى هذا جديده اف كل شيء ممتاز كل شيء جديد ما قد شفت مثلها




وانا قلت له : وش في السياره تعفط وجهها ,, اكيد احرجتها ترا المزيونه تستحي لا تقعد تحرجها وقعد يضحك 




وبعد ما شيك قال يا رجال السياره نظيفه ما فيها شيء واول مره اشوف مثلها الا على ايامها و قلت الحمد لله وقالي تراي جاد وشراي ب 20 الف ريال وقلت له




اسكت بس لا تسمعك المزيونه تراها لي وانا لها ومستحيل اخونها




وضحك وقال لا تراي من جد اتكلم انا جاد وشراي 




وقلت لا يا رجال ما ني بايعها هذي في مقام حبيبتي و للأسف ما افكر بالبيع الله يسعدك




قالي طيب




واطلع من عنده و اروح لما البحر واطالع البحر يا لبيه يا شيخ كان ودي انزل واتمدد لكن احراج اجلس لحالي و أصلن عيب علي اروح واخلي المزيونه لحالها ههههههه




المهم وانا اطالع البحر على اليمين واسمع صوت ظراط وراي واطالع بالمرايه اليمنى الا وهي موستنق ظراطها فقع اذني و هو داعس علي و شوي اطالع الا وهو ملزق بصدام المزيونه اللي ما يستحي عن وجهه يعرف انها متحشمه وملزق فيها ههههه 




وكنت بأضرب فرامل عشان اكسر له وجه سيارته لكن قالت المزيونه يا رجال عيب عليك فيها قبايل وانا مستحيل اخونك حبيبي مع واحد ثاني ههههههه لبى قلبش يالمزيونه




و قالت لي حط رجلك و احط رجلي و ادعسس واطالع بالمرايه نقطه سودا  بعيده و الف رقبتي واتأكد الا وهي الموستنق هههههه وانا بالسياره مثل المجنون كفو يالمزيونه كفووووو هههههه




المهم وبديت انقص السرعه من 160 تقريبا وبأنزلها لل 100 وانا بالخط الايسر واشوف راعي جيب قدامي بالخط الاوسط و راعي كامري بالخط الايمن ضاربين فرامل بقوه وانا مدري وش السالفه و ماشي بطريقي وهديت على 100 تقريبا 




 ويوم جيت من جنبهم ويطلعوا من قدام الجيب حمير أأأقصد حريم وتشجنجوا في خطي وانا اصيح بالسياره زي المجنون هههههه و أضرب فرامل و الف على الرصيف واركب الرصيف و اطلع بالشارع الثاني معاكس والسياره  تفحط بي وانا ما اشوف الا الوان قوس قزح مع نقاط لونهم اسود عرفتوهم




و ددددربج واشوف برطم المزيونه على الجنب انفكت قاعدته من اليمين وسار مدلدل على الرفرف واصقع بالرصيف بالخط الثاني وتوقف السياره وانا رجولي ما تشيلني وانتفضض وانزل وانا أهز شرقي من الخخرعه ههههه




و اشوف الا سيارتي مصدومه مع الشمعه والرفرف من فوق والكبوت مدلدل 




واشوف اللي صدمته معاه جمس حوض مرفع و اشوف الحمير يناقزوا مثل المجانين ههههههه الله يستر عليهم بس 




المهم انا مدري وش اسوي نزل راعي الجمس واحد الله يعطيه الف عافيه طيب واخلاق وقال اهم شيء سلمت 
قلت ايه الحمد لله هذي المزيونه ياحبيبي تضحي بنفسها عشاني ,, الحين وقت تنكيت انت ووجهك المورم




المهم قالي عندك تأمين قلت ايه قال كويس و انا عندي وننتطر نجم وجاء وخطط الحادث وجاني نسبة 15 بالميه الظاهر وعدت الامور على خير  والشيك ما يصرف الا بعد اسبوع




واشيل سيارته على سطحه مع ان الصدمه كانت من فوق ما أثرت على المكينه او شيء من المحركات 




طرف الرفرف الايمن من فوق مع الكبوت وقاعدته والشمعه وكفر منشق و الصدام مكسور من تحت عشان الرصيف




والحمد لله ان ما كان فيه عامود اناره يوم ركبت الرصيف ولا كان انا بالتشليح والمزيونه بالعنايه المركزه هههه




على العموم دخلتها ورشه وقلت له لازم تخلص خلال 3 ايام بالكثير وما يبغالها شيء 




قال طيب و عدلي الرفرف و ركب كبوت جديد وجابلي طقم شمعات اماميه بالانوار حقته جاهز وقال هذا تجاري تبغا اصلي بكره نجيبه وقلت ركب التجاري هذا وش اسوي اليوم لازم اسافر 








و ارجع للمزيونه واشغلها وامشي فيها وكأن ما سار فيها حادث ماشاءالله وارجع للحيوان راعي الزيت ونزلت وجيت ادرو له وعيوني يبان فيها الشرر وما حصلته وقلت وين خويكم قالوا ما بيجي الا بعد 3 ساعات و دعيت عليه وركبت السياره و سميت بالله و جاني احساس ان المزيونه تقولي ان شاء الله ما يسير لك شيء دام الله معك وانا معك 




والله احساس جاني هههههه لا تقولوا اكذب




واتشجع وامسك الخط الساعه 5 المغرب و يوم مشيت 30 كيلو ظلمت وشغلت الانوار وانا ماشي و ما دققت بالخط زين 




بعد ما تعديت 70 كيلو الا وظلام و اشوف الخط قدامي مضلم ما كأني مشغل الانوار ,, بس تكشف لي الخط حق 4 متر 




ونزلت اشوف الا والعدسات مايله على تحت والعدسه اليمين نازله على تحت مره








لانها تجاري و اركب السياره و قلت اللي كاتبه ربك بسير يا رجال و امشي وجنبي لكزس انواره ما شاء الله تشق الخط شق 




وهو بالخط الايسر وانا من جنبه الا وشوي طار وانا معاه مشيت يمكن 150 بس الا واللكزس ما عاد ينشاف وطبعا انتقلت للـخــط الايــســـر السريع وامشي فيه وانا متأكد ما بيسر لي شيء ان شاء الله 




والمزيونه ما تقصر 




مشيت قرابه 30 كيلو والشارع ما فيه الا انا يمكن وسيارات بعيده قدامي بالخطوط اليمنى ووراي بس بعيده لإن ذاك الوقت كان فيه مباره قويه والخط فاضي مافيه الا تريلات ومتباعده عن بعضها مدري وش السالفه 




وشوي اطالع الا والسيارات اللي بالخطوط اليمنى قدام مختفيه ما اشوف شيء 




و ما امداني اكمل 4 كيلو وانا خايف واقول وين راحت السيارات بهالسرعه




غريبه يا خي 




واشوف شيء ضخم قدامي مدري وشو و الانوار ما تساعد وانا ارجف




الا و شيء كسر القزازه حقت الراكب يمين و نط على المرتبه وانا اصيح مثل الحرمه ههههههه




 
و جاء دور المزيونه و عطها نطله يمين ونطله يسار ونطله بالتراب و انا أقسم بالله اني انتفض مدري وش صار واطالع يميني الا وأشوف المرايه حقت المزيونه على المرتبه 




واشوف الا وتريله منقلبه على الشارع والخط الايسر هو المسار الوحيد 




واشوف سياره طايره بالتراب  




وأنزل وانا اجري و لقيت سياره مصدومه بالتريله وانا خايف لا يجي احد ويصدمنا وافتح باب السياره المصدومه بالتريلا ولقيت واحد بس بالسياره وكله دم و مدري هو ميت ولا حي وما بغيت احركه عشان يمكن ظهره مكسور واتسبب له باعاقه ولا شيء




 وادق على الاسعاف و ادق على الوالد واقوله السالفه والمشكله الوالد بجده وانا مدري من اتصل عليه , اتصل على المرور ولا الشرطه ما ادري




 المهم قلت لابوي وانجن الوالد علي تروح وما تقولنا و و و و وما فيك شيء قل الصدق




 ههههه تعرفون انتم قلب الام والاب على ولدهم الله يحفظهم ويحفظ جميع والديّ المسلمين




ومن توفي منهم الله يسكنهم الفردوس الاعلى قولوا امين




 المهم علمته محلي وقال خلاص انا بكلمهم ورحت اشوف للسياره اللي بالتراب وما حصصلت احد دورت دورت ما حصلت احد  ومعي ناس نزلوا يشوفون




ورجعت لسيارتي وعرفت كيف انكسرت قزازة سيارتي , يوم شطفت التريله صقعت المرايه في التريله ورجعت على القزاز وكسرته ودخلت علي 








و اروح احط المزيونه عند التريله وادق الفلشر و اقلب وجه المزيونه على اللي جاي عشان يعرفون ان في التريله منقلبه والحمد لله يمكن 15 الى 25 سياره انتبهوا وانا انطط بالشماغ كما المجنون بس لازم اسوي كذا واغلبهم وقفوا وشافوا السيارات وساعدوهم والحمد لله جتني سيارتين مدري نسيت وش مكتوب عليها الضاهر امن الطرق ويوم شفتها خلاص تطمنت و كملت طريقي مع ازعاج الهواء فقع اذني عشان القزازه 
و وصلت بالسلآمه ولله الحمد








زبده الموضوع الطويل أو الخلاصه :




لولا الله وقراءه دعاء السفر و تشغيلي للقرآن 




كان مشيت من جنب اللكزس وصدمت بالتريله 




و ثاني شيء نصيحه الا الانوار تركب تجاري والله ما تنفع وكانت بتكون سبب في قتلي




و العين تراها حق فأي واحد يعجب بسيارتك خله يذكر الله عليها 




ولا تسافر الا ومعك احد حاول تخلي احد يخاويك عشان لو كنت ما تعرف اش تسوي هو يفيدك وتتعانوا




واهم شيء تبلغ اهلك وناسك إنك مسافر يعني لا تسافر ومحد يدري عنك , انا لا سمح الله لو صدمت محد درا عني لكن هذا درس في عمري ما انساه




وانتبه تسرع في مكان عام فيه ناس مثل البحر و الاسواق والحدايق لان ممكن يطلع لك طفل او شخص وتتسبب بحادث شنيع ,, 




ولو سرعت عشان سبب ( مثل راعي الموستنق اللي بغا يصدمني ) و طلع لك طفل او حريم الخ , حاول تسوي أي شيء عشان لا تصدمه , أصدم بسياره بس لا تصدم آدمي اطلع فوق رصيف المهم لا تصدم ادمي
لإن كل راس عليه 10 مليون قبل لا يكون روح ههههه




وملاحظه : قدوتي بالهمنتدى العضو ( أنيق ) صراحه معجبني طرحه للمواضيع ( تكون فكاهيه و فيها فائده )
الله يسعده يارب و يشتري له الجيب اللي يحلم فيه




ترا الكتابه متعوب عليها ما يحتاج توضيح والقصه حقيقه وحصلت لي شخصيا وفيها بعض المبالغه البسيطه ههههه عشان الاكشن وكذا 




وفيه زر لونه أخظر مثل لون علم السعوديه اذا تحب السعوديه اضغطه هههههههه 

( اذا اعجبك الموضوع عطني لايك و اذا ما عجبك عطني ديس لايك )




واهم شيء اهم شيء انكم استفدتوا ولو بفائده وحده ,, هذا هدفي من الموضوع 




تحياتي لكم حبايبي




أخوكم : ابو يزيد

















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


وليد وش بتحذر الناس وش بتقلهم ان الادمي هذا عيان انتبهو لحد يروح عنده !!!!!!!!!!!

حبيبي العين حق حصن نفسك ولو تروح عند اطلق عيان ما جاك شي

ومو كل شي يصير نقول والله عين !!!!


up 2 down 1
مورد الماء 322
قبل 7 سنه و 10 شهر



الله يسعدك



واحلى لايك


up 1 down 0
الـهــزازي 54
قبل 7 سنه و 5 شهر