أضف سؤال أو موضوع جديد          

قصتي وانا واقف عند الاشاره

up 29 down 12
ابو يزيد 000 8688
قبل 4 سنه و 6 شهر



السلآم عليكم ورحمة الله وبركاته




طبعا انا معروف اعطيكم المواقف اللي حصلت لي , عشان اغير الجو شوي ومنها تستفيدون




ذاك اليوم كنت طفشششآن ومقفله معي 




و قلت لازم اليوم اتمشى عند البحر والمسطحات الخظراء و بعدها اروح للسينما اتفرج في فيلم و بعدها اتعشا وارجع للبيت في هالامطار والاجواء الخرافيه




اكيد عرفتوا المدينه اللي اقصدها 




إنها الرياض هههه




طبعا واضح من اسمها إن مافيها الا الضعوي هههه




والحل إني أكل تبن واقعد بالبيت مثل الحرمه 




المهم كلمني صديقي قال انه طفشان وكذا فقلت له 




يا قلوودي ليش تحب تقلد هههه حتى انا مثلك طفشان 




 وقالي تعالي الحديقه اباخذ فلافل من ابو عدنان و اروح الحديقه عشان نسولف وناخذ علومك لاني طفشان 




وقلت يا رجال الحين جايك طيران و السنوديش لا اوصيك عليه اهم شيء يكثر حمص و كتشب




و قوله لا يكثر بقدونس لان آخر مره حط ربطه بقدونس بحبلها ههههه




ولا تنسى المشروب جيب اي شيء على مزاجك بس تكفى لا تجيب لي بيره بالشعير مثل ذيك المره وقعد يضحك ( ما تعرفوا سالفتها )




المهم جيب ابطلع و رحت أستأذنت من الوالده 








وقالت لي الله يحفظها وين رايح




 قلت عازمني صديقي على سندويش فلافل بحديقه النهظه 




قالت بهالصيف 




قلت ايه هههههه وش نسوي طفشانين




المهم قالت لي قبل لا تروح له جبلي معك 6 جالكسي ساده ابو ريالين ونص و كيك سفن دايز كرتونين عشان بأسوي كيكه




قلت لها ابشري مدام فيها كيك وشغل نظيف ههه 




واروح اشتري لها وارجع للبيت واعطيها الاغراض




وقلت يالله عن إذنك تأخرت على الفيلم بيروح مقعدي ههههه




وقالت لي وانا طالع




الله يحفظك من كل كبيره وصغيره ويستر عليكم بستره و يسعدكم ويوفقكم دنيا و آخره




قلت اللهم امين تسلمي يا بعدي ,, يالله في أمان الله




وطلعت 




بالطريق قابلتني اشاره الحكير و تعرفون الاشارات انتم , تنام وتصحى وهي ما بعد اشتغلت ههه




وشغلت الوات ساب بجوالي النوت وكان يكلمني صديقي ويقول وينك ؟ وكتبت له انا بالطريق يالدب




و طاح الجوال من يدي وانا ابغا اضغط حرف الدال بيد وحده هههه




طبعا النوت كبير لازم يدين 
وما كملت يالدب كتبت يال....    ,,, وطاح




وادنق اجيب الجوال الا والسيارات تظرب بواري  ومشت السيارات اللي من جنبي ويوم اخذت الجوال 




والاقي الاشاره فاتحه واطالع الاشارات الباقيه وانا حاط رجلي على البنزين الا وراعي كابرس ذهبي جديد قاطع الاشاره ومتجاوز من اليمين محل اللي بيلفون يمين ومقلع




وانا وجه سيارتي بدا يطلع و يشهد الله إن ما بيني وبينه الا شعره كنت بأصدمه على  البيبان 




واللي من جنبي كان الضحيه و دربججج من عالرفرف الخلفي و الشنطه و يحوس , والكابرس يركب الرصيف




 وانا وقفت بنص الخط جتني ام الركب من الخرعه ههههه




واجنب يمين و رجولي تناقز محلها وتضرب بالدركسون لا شعوريا 




و حسيت بطعم بقلبي مثل الحراره الله لا يجيبه لكم إحساس خايس




 المهم هاللحظه كانت مرعبه جدا لي و كان يوم رهيب هههه وخر عني الطفش و اروح لصديقي و اقعد أقرقر عليه عن الحادث لين ما طفشش هههههه




تعرفون إذا سار لك موقف لازم تعلم فيه كل الناس لين ما يطفشون منه 








و الحمد لله ربي نجاني من حادث كان مؤكد والسبب في الخلاصه اللي تحت












زبده الموضوع او الخلاصه :




إنك ما تخرج من البيت الا امك أو ابوك او ولي أمرك راضي عليك إنك تخرج , لا تقول شيبنا وكذا لا والله لو يوصل عمرك 50 سنه أستأذن بالطلعه والخرجه ما فيها شيء لـعـلـك تـكـسـب دعـوه طـيـبـه




ثاني شيء شوفوا دعوة الام كيف نجتني بعد الله سبحانه من حادث مؤكد 




وانا مو من عوايدي استخدم الجوال وانا بالسياره لكن شوف ربك سبحانه خلاني اطلع الجوال واكتب يا الدب بيد وحده عشان يطيح الجوال من يدي وانزل اجيبه عشان اتأخر و لا اصدم اللي قطع الاشاره 




لو إني ما جبت لها الاغراض او انها ما كانت راضيه او دعت علي دعوه شينه , كان ما سار كل هذا
كان مشيت و جاء الكابرس صدمني وطيرني




ثالث شيء : أنتبه من بعض الشباب الله يهديهم 




××  إذا ولعت اشارتك طالع الاشارات الباقيه يمكن تلقى واحد قاطع الاشاره ××




×× لا تمشى على طول وما تنتبه , أنتبه الله يحميك من شر الحوادث ××




و اهم شيء لا تقدم أي أحد على والديك , الوالدين اول ناس 





وفي الختام الله يحفظم جميعا و يستر عليكم و يكفيكم شر الحوادث و يحفظ والديكم و من توفي منهم فأسأل الله إن يسكنهم بالفردوس الاعلى و يدخلهم جناته بغير حساب ولا عذاب

و أهم شيء طلعتوا ولو بفائده وحده وهذا هدفي من الموضوع

أعجبك الموضوع لايك ما اعجبك ديس لايك 

و انتهت مواقفي و انا ما قلتها الا ابي لكم الفائده حبايبي لإنكم مثل أخواني و اكثر من اخوان

خلصت المواقف اللي عندي و اللي حصلت له مواقف فيها عبره لا يبخل على اخوانه بالمنتدى




تحياتي لكم : أبو يزيد







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الله يخلي لك امك


up 1 down 0
رحال٧٧٧ 57
قبل 4 سنه و 6 شهر



الله يعطيكم العافيه افزعولي يالربع بلايكات نبغى نقيم ههههههه لي سنتين وانا ١١ نقطه لاتزيد ولاتنقص


up 6 down 3
ابو - سالم 96
قبل 4 سنه و 6 شهر