أضف سؤال أو موضوع جديد          

قصتي مع فقير ونصيحه للي توهم متخرجين من الثانوي

up 40 down 13
ابو يزيد 000 8688
قبل 4 سنه و 6 شهر



السلام عليكم ورحمة الله وبركاته

كيفكم عساكم طيبين

تذكرت لكم موقف 

ذاك اليوم كنا بأستراحه وقالولي رح جيب العشاء وكان بعيد عن الاستراحه
وبأطفش بالطريق لحالي وناديت اخوي و بعض الشباب عددهم 3 اشخاص وركبنا جمس احد الاقارب وانا اللي أسوقه
وإحنا بالدائري وانا رجلي على الجمس ثقيله وشوي الا وكامري قدامي بالخط اليسار طبعا 
وانا ماشي 140 تقريبا وقربت منه جدا وكبست له و يضرب فرامل اخونا في الله و اضرب فرامل و ما تسمع الا فرامل الجمس المرعبه وكنت بأصدمه

وادق له بوري ويروح يمين وضرب الاشارتين ويأشرلي على ساهر 

وكنت بأنزل أسلم على راسه هههههه 

وأقوله مشكور ( باليد طبعا ) واقول لكل السياره ارفعوا يدكم له و رفعوها وقعد يضحك ورفع يده لنا وكملنا طريقنا


المهم 

وقفنا عند اشاره واشوف واحد كبير بالعمر ونص جسمه ينتفض نفض ومبين جاله جلطه قويه جدا الله يصبره
وقام يطلب من الناس فلوس 

ظربت له بوري و ما قصروا الشباب معي قطوا معي بفلوس وعطيناه اياه وقلت يا عم تبيني اعالجك على حسابي ما تدفع شيء
ابدخلك مستشفى على حسابي واعالجك لإنه بصراحه يكسر الخاطر ورجال كبير ويالله يالله يشمي والجلطه قويه 

 وانا ما بأدفع شيء لان عمي يشتغل بوزارة الصحه و كل شيء بالواسطات وعمي بيفزعلي ما يقصر
واقدر ادخله على حساب الدوله بقسم الطوارئ لان حالته صعبه جدا جدا جدا و نكسب فيه أجر المسكين

وما يقدر يتكلم لان لسانه ثقيل من الجلطه واللي فهمته منه إنه ما معه إقامه و ما يبغا يدخل بمشاكل وراح من عندي 

ومبين عليه إنه من دوله عربيه قريبه مننا 

ونادوه شباب قدامي على اليسار مرفعين الاغاني و شوفنا إحنا الزحيف 

و اشوفهم يكلموه ويضحكوا ما تسمع الا اصوات ضحكاتهم اللي تجيب المغص ومسوين إحنا الفله 


والله إنكم مصخره و يوم أطالعكم أنحرج يشهد الله بس عشاني طالعتكم أنحرج وأتفشل , فكيف أنتم ما تنحرجون , حسوا يا ناس

وعطلوه مسكين 
و شوي الا والسواق يسحب يد الشايب من جوا السياره بقوه و تشوف الشايب يصاقع ببودي السياره كانوا بيفكوا يده المسكين
والراكب يفتح الباب و يسكره والشايب مسكين ما عادت رجوله تشيله


وتشوف سيارتهم تنطط من الضحك و من صقيع الشايب فيها حسبي الله عليهم

وينزل ولد عمتي من الجمس و ينزل الثاني و ينزل الثالث وانا الرابع و اخوي و نروح على الشباب و الاشاره مليانه

و ولد عمتي ما قصر وعليه جسم ما شاء الله و يروح على السواق اللي سحب يد الشايب و يجلده ويجلده ويجلده ونزلوا ناس من السيارات الباقيه و فزعوا معنا الله يعطيهم العافيه

وانا وقريب لي نمسك الراكب من صدره ونكلمه كلام طبعا والصوت عالي وما كان في راسي مضاربه بس ابي انسفه واهزئه عشان يتعلم من غلطته

واقوله ما تستحي عن وجهك انت ؟ ما عندك احساس ؟ مسوي فيها رجال يوم إنك تضرب رجال بعمر ابوك ؟

وقال تراه ..... ( يقصد دولته ) مثل تراه سعودي ونصاب

و قلت له تحسب لانه ما هو سعودي ما نحترمه وعادي يروح بالحريقه ؟ والله لو يكون اللي يكون واشوف الغلط يحصل قدامي ما اسكت لو اخوي اللي سوا كذا لعنت شكله قدام الناس ,, انت وكلامك يالطفل أستح عن وجهك والله كلامك ما يقوله طفل 

و جاني منه كف اعوذ بالله يا حرارته على وجهي وعيني

و الحين اعصابي HH

وما تشوف الا الوان يدي من سرعتها في وجه وصدره هههههه


و الشباب معي نزلوا يفزعوا واحد عمره فوق 35 سنه جاء يفزع معي وناس 40 سنه يمكن و نجلده اللي ما يخاف الله

و اغلب اللي بالاشاره جاو يضربوهم ما جو يفكوا المضاربه ( هنا يبان ترابط السعودين عند الحق )

لإنه موقف يفلق الصخر , يضربوا رجال كبير السن

وبعد ما انجلدوا مننا و من الشباب اللي عند الاشاره الله يعطيهم العافيه جو فكونا وقالوا خلاص اخذوا اللي يستحقوه 

وفكوني من الراكب
ومباشرة قلت وين العم اللي يشحذ واشوف المسكين طايح عند سياره عند حرارتها ويبكي 

يبكي يا ناس يا عالم  ,,,  حسووووا فيه والرجال إذا بكى أعرف إنه فقد كل شيء

ويوم شفته اعصابي ولعت و ارجع عليهم و انا معصصصصب لو يوقف بطريقي ابوي ما اتراجع  
و الناس متجمعين عليهم وانا ارافس برجلي ابيها توصل له واقولهم وخروا وخروا لكن جو اولاد عماتي واخوي و قالوا خلاص يا رجال انلعنوا و اتفلقوا , كفايه , لا تجي الحين شرطه ونبتلش 
وقلت لهم ما شفتوه وهو يبكي

قالوا يا رجال الا شفناه بس هذولي أخذوا حقهم وزياده

وهدوني وقالوا اذكر الله و قلت لا اله الا الله و جو يركبوني السياره وقبل لا اركب رفست سيارتهم الكورلا على البابين و فخشتها لهم و اصك القزازه اللي خلف الراكب بيدي و تنكسر وقالوا خلاص ياولد تراك منت فعقلك وركبوني وانا ما احس بشيء لإن وقتها كنت معصب خصوصا يوم جاني الكف

واحد الاقارب ساق بدلا عني

وشوي الا يدي تصب دم من القزازه لإنها مضلله و جرحتني من دون ما احس و يدي الثانيه توجعني إذا حركتها


وولد عمتي يده توجعه و انجرح بخده

والباقين ضربات خفيفه

ويودوني للمستشفى فحص سريع وطلع يدي في جاها مثل العسم والجرح عقموه ولفوه بشاش


 وقلت لهم وصلوني للبيت وقولوا للجماعه إن ثوبي انشق و بأرجع البيت اغيره واجي لكم , وبعدين بأقولهم ما اقدر اجي حصلت ضروف بالخط




وقالوا اوك

وهذي القصه والفائده تحت

من بعد هذا الموقف دايم أفكر , شغله انفجرت جوا عقلي اللي صار متعكر , كيف يدعي إنه شهم والدم هو الدم و اللحم هو نفس اللحم عقلي أنصدم
الى متى بنقعد شايفين نفسونا ونتكابر من دون حق
يا خي حط حالك >> بحاله , وخلي الدنيا في يوم تحدك
 و خلها تنفعك كلمة سلاله
ما تنفعك غير يدك
وما هي رجوله يوم إنك تسخط بشخص بعمر ابوك ولا بعمر جدك
دينك علمك المساواة لذلك سارع وساوي , حسابكم راح يكون يوم القيامه بالتساوي
تختلف الاعراق لكن كلنا بشر



و أنتبه تتضارب على شيء تافه لإنك وانت تتضارب ماهو أنت هذا ابليس دخلك اعوذ بالله منه 

تسوي اشياء ما تدري عنها ودك تقتله من القهر

فلا تتضارب الا على شيء يسوا إذا انحديت و خله هو الغلطان دايماً , خله هو يبدأ 

ولحد يقول ليش تضاربت وكذا ,, ما كان قصدي مضاربه و لا احب المضاربات نهائيا و انا انسان حليم لكن أتق شر الحليم إذا غضب >> ينطبق علي هالمثل ههه

لكن هو اللي بدأ بكف والكف ما ينكست عنه و هو الغلطان من الاول يوم إنه يضرب الشايب المكسين

وابتدعوا عن المضاربات اللي ما منها فائده و لكن إذا كنت تشوف فيها ظلم فلا تسكت عن الحق نهائيا 

روح كلمه و اذا الله ابتلاك بواحد مثل اللي الله ابتلاني به وضربك , فشوف اللي يناسبك على حسب الضربه

إذا ضربك خفيف سامحه وامش اما إذا صكك كف لا تكست وخذ حقك واعرف ان الله معك لانك ما سكت عن الحق

وصراحه ما توقعت و لا طرت على بالي و اول مره اشوف 
الشعب السعودي يترابطون مع بعض و يروحون على شخص واحد مع إنه سعودي ولعنوا خامسه
لأنهم ما يسكتوا عن الحق الله يوفقهم 

وبس

و صراحه أعرف ان هالسالفه ماهي ذيك القد بس شفت المنتدى كذا جوه مو مناسب وقلت أغير شوي

و نصيحه من اخ لاخ :

اللي توهم متخرجين من الثانويه , أنتبه تدخل كليه الاتصالات او اي كليه , أدخل جامعه لازم جامعه حاول تقدم على كل الجامعات ان شاء الله يقبلون , و إن دخلت كليه والله لتندم عدد شعرك , 

عندكم الضحيه اللي هو أنا و 3 يقربولي

وانا من اول ما دخلت و حظي في الحضيض مدري وش اللي يصير و الحين تخرجت واستنى النسبه ونسبتي , خلوها مستوره أعرف تقريبا كم تجي

 وما فيه وضايف اولاد عماتي جايبين احسن مني بكثير و ما توضف الا واحد بشركه و بالواسطه يا حبيبي واثنين عاطلين لهم سنه ونص

وانتوا تعرفون الشركات والقطاع الخاص , شغل نذاله , يشغولك لين ما يكتفوا منك وبعدها يطردوك

واخوي دخل الجامعه ومرتاح راحه نفسيه الله يهنيه ويسعده

وانا الحين يمكن أدرس الجامعه إذا ما حصلت وظيفه وكأني توي متخرج من الثانوي وراح من عمري 3 سنين وشوي على الفاضي والناس تاخذ الكليه بسنيتن لكن انا اخذتها ب 3 سنوات , ومشاكل مع المدرسين حسبي الله عليهم , أنخفست من اول ما دخلتها


فالزبده ادخل اي تخصص في أي جامعه و لا يطري على بالك تدخل الكليه

ودعواتكم أحصل وظيفه كويسه و إن شاء الله الواو بعد الله سبحانه بيوضفني >>  الواو = واسطه

وبس

إذا اعجبك الموضوع لايك وإذا ما اعجبك دس لايك

تحياتي لكم : اخوكم ابو يزيد







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


 يعطيك العافيه أبو يزيد ،، اللهہَ يرزقك باللي تتمناهہَ


up 1 down 0
طوني الخالدي 9
قبل 3 سنه و 9 شهر



الله يجزااك كل خخير هذي ان دلت على شئ فهي تدل ع رجولتكك وشاهمتكك والله يوفقنا على فعل الخخير جميع .


up 0 down 0
abo3_rashed
قبل سنه و 11 شهر