أضف سؤال أو موضوع جديد          

ليت ايام اول ترجع. ...

up 6 down 2
tapp -4
قبل 8 سنه و 4 شهر



السلام عليكم ورحمة الله وبركاته

ايام الطفولة والله احلى ايام يوم كنت اركب مع ابوي على الهايلكس موديل 79 غمارة و نلف الديرة عليه يا سلام على ذيك الايام يوم كان يوقف عند البقالة عاد ياويلي اذا شريت شيء ما معه يدفع هههههه اتذكر اني كنت اطلب منه ايسكريم عاد ما كنا نناديه كذا اول كنا نقول يبا ابي عسكريم ههههههه اللحين ولدي يجيني ويقول ابي مثلجات هههه والله من زود الثقافة


سيارات اول يا اخوان اطلق من سيارات هذه الايام كان معنا جمس 91 لونين احمر واسود و مكينة 454 امريكي الجميح مسكنا عليه خط الشرقية اكثر من مرة وكل مرة يصير معنا شيء غريب مرة تتعطل الفرامل ومرة نصدم ومرة بغينا نقلب و مرة الكفر يبنشر وهذه الامور كانت تصير معنا وقت سفرنا فقط و الله العظيم ما شفت سيارة تحملت هذه الاعطال و الظروف

سيارات اول اذا صدمت عليها ما يصير فيها شيء مثل سيارات اللحين سيارات اول حديد كنا اذا صدمنا عليها يلتموا حولنا الناس والكل يقول في الحديد ولا في النفس اما اللحين اذا صدم احد نزلوه على اليوتيوب و عنوان الفيديو حادث فلان الفلاني ما ادري وش يحس فيه


اللحين اذا احد صدم ما تقول راحت في الحديد قول راحت في البلاستيك اللي ينصبون علينا فيه و الله حالة

يقولون لك مواصفات امان عالية وكله خراط شوفو كم واحد من شبابنا هداه الله صدم و انعدمت سياراته حتى السقف ما يستحمل

ما اقول غير الا ليت ايام اول ترجع والله اطلق من ايامنا هذه اللي علمت شبابنا الانترنت وبلاك بيري وتضييع الوقت

وياليته يصلي والله يا اخوان اول اذا ماصليت مع ابوي في المسجد انه يذبحني ضرب والان حتى الاب ما يصلي كيف يبي ولده يصلي

الان ما في تشجيع لاولادنا على عاداتنا القديمة و الله علمناهم الدلع

انا اول اكد مع ابوي كد على الهايلكس نبيع خضار وقرب يا ولد و ان رجعنا في الليل يازين عشاء الوالدة وهي تحضره يسوى عشاء المطاعم كلها اللي ذبحتنا

انا اخذت لي نصف دجاجة من مطعم اسمه سلسلة مطاعم المائدة اقسم لك بالله تقول مأخذ سم لي يومين حتى النوم مو عارف انامه رحت لهم واشتكيت للبلدية ولا احد فاد


والله يعيني يعينكم على هذا الزمان و الله يعيد ايامنا اللي راحت والله اطلق من هذه الايام







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اقول اللحين كل واحد مفهي على جواله 
انا من يوم جا البلاك ،،وانا غاسل يدي من الشعب .


up 2 down 1
ابو - سالم 96
قبل 8 سنه و 4 شهر



وتم ظهور جيل الدرفت والكائنات اللذين يطلق عليهم (الدرباويه) 


اسال الله السلامه 


up 2 down 0
no .. yes 185
قبل 8 سنه و 4 شهر



الله يازين ذيك الايام يوم القلوب صافيه وكل شياب وشباب الحارة تعرفهم الحين جارك ماتعرف أسمه؟؟
والحين أخوك وهو أخوك يحسدك الا من رحم ربي ..
والحمدلله الجوالات الحديثه ما اعرفله ولا ابيها بلا بلاك ولاواتساب ...



up 3 down 0
badr_ 498
قبل 8 سنه و 4 شهر



يازين.ابو كشاف يوم تشغله وانت تكشف على سيارتك في الليل احد كان يسويها مثلي اشغل الكشاف و اكشف على السيارة وقت اكون مسافر في الليل عاد كنا نريح في الاستراحات على الطريق و نكمل طريقنا وننصب الخيام اذا بغينا نريح ولا شيء نشب النار ونسمر على ضوها يازينها من ايام




up 3 down 0
tapp -4
قبل 8 سنه و 4 شهر



ياليت ان الزمن يرجع ورى ولا الليالي تدور 
ويرجع وقتنا الأول وننعم في بساطتنا




زمان اول احس انه زمانًًًًٍٍ فيه صدق شعور 
نحب ونخلص النيه.. وتجمعنا محبتنا




زمن ما فيه لا غيبه.. ولا حتى نفاق وزور 
ياليته بس لو رجع ونسترجع طفولتنا




صغار قلوبنا بيضا..نعيش بعالمٍ محصور 
ولا نعرف ابد اغراب ما غير عيال حارتنا




صحيح صغار فالتفكير لكن ماعلينا قصور 
نخطط نكسر اللعبه.. وتسعدنا شقاوتنا




نروح المدرسه بدري ..ونضحك داخل الطابور 
نحاول نزعج العالم في روحتنا وجيتنا




وعشان نأخر الحصه.. نخبي علبة الطبشور 
نشاغب بس فالآخر.. تميزنا برائتنا




نحب الضحك والهيصه.. نحب انط فوق السور 
نفرفش.. ليه مانفرفش مدام الضحك عادتنا




ولكن دارت الأيام.. وبان الخافي المستور 
وصار الهم متعلي على قمة وسعادتنا




كبرناوصارت الدنيا تصف أحزاننا بالدور 
وتهدينا الألم والهم غصب عن عين رغبتنا




تعبنا من بلاوينا ..أحد ضايق وأحد مقهور 
وكلٍ غارق بهمه.. وفالآخر تشتتنا




وانا ما أقول غير الا وحلالاه الزمان يدور 
ويرجع للورى فتره.. نعّدل وضع عيشتنا








تحياتي لكم 














up 2 down 1
بلاكي 165
قبل 8 سنه و 4 شهر



ترى  ذا منتدى سيارات مو منتدى ايام زمان 


up 0 down 6
فيليكس 204
قبل 8 سنه و 4 شهر



هههههههه فيليكس انت ما مريت بذيك الايام هذاك زمن الطيبين وكنا زمان الخميس والجمعه ننصب الخيمه والذبيحه معلقه وهاتك ياشوي وكبسات ضغط ولعب كوره والنفوس الصافيه والطيبه بلا جوالات 
والحين حتى لو خيمو تلقى كل واحد على جواله وين زمان اول والله بعض الاوقات ودي ارمي بالجوال واجلس بدون جوال افضل لكن الارتباطات مع الاهل والعيال ولو قفلته لو ساعه باقي شوي ويبلغون الانتربول عنك ومن اول نروح بالايام ودعوه من الوالدين الله يرحمهم تكفي بعد التوكل على الله
ولايك قديم ومعه بيجر موترولا


up 2 down 0
ابوخلوودي1 5070
قبل 8 سنه و 4 شهر



لا مريت بس خلاص يعني هادا منتدى سيارات 


up 0 down 1
فيليكس 204
قبل 8 سنه و 4 شهر



الله على زمان اول ، ذكرتني بعلبة الببسي اللي كنها علبة زيت فرامل ، وإلا الاسكريم المثلج اللي يجي في كيس ، وإلا أيام الاتاري والفيديو اللي كنه رديتر جمس من كبره ، أيام كانت أحلى من الحين ، ما أقول إلا الله يرحم زمان اول 


up 1 down 0
ssv8 1048
قبل 8 سنه و 4 شهر



الشكوى لغير الله مذلّه ياخوي وزمان أول تحوّل ويالله لك الحمد والشكر
الحمد لله اني محتفظ بكابرس الوالد 1980


up 1 down 0
al-samer2000 191
قبل 8 سنه و 4 شهر



ياااا ليت لي قدره على طي الأيام

واقدر اعيد آلسنين واااقدم سنين

ودي انااام الحين واصحى قبل عام

العام كان اجمل اكـثـر من الحين



up 0 down 0
القناص222 62
قبل 8 سنه و 4 شهر