الكابرس انصدم مره ثانيه

أهم حاجه الصحه والعافيه الحديد بداله حديد 

أن كان فيه احد له نظر بالموتر خله يأخذه 
أو صلحه وبيعه والله يعوضك بـ 2013 
أخوي هو نفس الجها السابقه وألا جها ثانيه 
أنا اشوف انك تصلحه وتبيعه 

والله يعوضك باللي احسن منه 

لا والله وانا اخوك الجها الثانيه وصراحه مالي فس اصلح لانه خلاص طلع من خاطري وليته يجي يقول الي يبيه والله ببيع له بس وينه

الله يعوضك باحسن منه 
ويكفيك ويكفينا شر العين والحسد

قد صارت معي السياره جديد .. خربة الصوفه الخلفيه وهربت زيت وصلوها على الضمان وبعد فتره هربة الصوفه مره ثانيه وطلع الزيت وغيرو العكس كامل مع الصوف ... بعدها خرب الدفرنس وماصلحوه المضاربه ... بعدها قبت مشكلة الكهرب وغيرو الظفيره كامله ... بعدها جيت لقيتها مصدومه مصدومه من قدام انكسر الشبك والصدام والفايبر وصلحتها على حسابي ... المره الثنيه انفجر معطر السياره وكسر الدرج وضرب فالقزاز وشطبه نصين ... شغلت السياره وعلى طووووووول على الحراج بعتها بدون اي تفكير والقزاز مكسور والمراريه طايحه وكل من جى سئلني قلت السياره فيها عين وابي ابيعها خلاص مابيها وماكملت 14 الف كيلو وكل هالخرابات طلعت فيها وان سلمت من الخرابات اجي القاها مصدومه !!! بعتها وافتكيت

انا بشتريه هذا رقمي 0553818484

إناَ لله وإناَ إليه راجعون

الحمد لله على السلامه وهذا الاهم وانا اخوك
ولي سلم العود الحال يعود
لا تيأس من رحمه الله وقل اللي رزقني فيه قادر يرزقني بأحسن منه
ويجي فالمخاسير اكثر يالغالي ما وقفت على قطعه حديد
والحمد لله على كل حال

اهم اشيء سلامتك الحديد يتعوض 
بس عندي سوئال هل هذي اول سياره لك

يارجال قول الحمدلله انها جات ف الباب 
واحد اعطى سيارتي عين الله ينتقم منه وانقلبت بالسياره

الله يعوضك يارعيييه انا الفورد حقي مصدوم من نفس الجهه 4 مرات مرتين صلحتها ومرتين خليتها مثل ماهي وتعال شف الصدااام يرفرف مشقوق

أنا مره صار لي موقف مثل موقفك
اشتريت سياره نظيفه بسعر رخيص وكان فيه واحد كل ماله يقول لي خلها عندي وراح أزيدك فوق مبلغ شرائك لها 500 وأنا راسي يابس وأقول له لا لأني كنت محتاج ذيك الفتره للسياره
وهو يحاول فيني وأنا رافض
من بعد ذاك اليوم كرهت السياره كره ما يعلمه إلا ربك
حتى أهلي قالوا شكله فيه واحد صاكك بعين فقلت لهم قصه الرجال الي يبيها
والمشكله قعدت معي فوق 4 أشهر وما زال الرجال عينه فيها وكل شوي يقول لي تبيع السياره
وأنا خلاص الموتر عافيته وجت فيها خرابات تشيب الراس وكل ما نويت ابيعه ظهر لي خراب يبطل لي البيعه
وتخيلوا وبخراباته جيت مريت عند الرجال مره وما زال يبي يشتري السياره وعينه فيها
ومره انقبعت من رعند الرفرف والباب ونويت أسمكرها باليوم الثاني وإلا ما أدري كيف وأقبع مر ثانيه في نفس المكان
واتصلت على واحد من أصحابي وقال لي بع الموتر نصيحه ترى موترك معيون
وأسمكر الصدمه وأصلح الاشياء الضروريه وأنزل الحراج وأبيعه بعد معانات فوق 6 أشهر

ونصيحه أول ما تشتري سياره أقرا على مويه زمزم سورة الإخلاص والمعوذات واية الكرسي ومسح بها موترك

وأي واحد تحس أنه يبي الموتر أو عينه في موترك انحش منه ولا تجيه

ياكثرهمم عقب ماتشتري موتر وتوديه المعرض عشان تتكاتب انت وياه يجونك يلتحوسون تبي زود ؟ تبي فررق ؟ ترا نفسنا فيه

بع الموتر اذا عند قدرة تشتري سيارة ثانية والا صلحه وخله معك

صحيح هذي عين وصارت مع خالي سالفه







هو معه يوكن 2010 وجاء رجال من الجيران يقول تبي تبيعه بمبلغ الفلاني المهم خالي رفض وصار ينشبه له ويعطيه عروض مغريه وخالي مايبي يبيع والله انه ماكمل اسبوعين الا والوجيه رايحه صدم حصان ومعه العايله والله ساتر عليه

عين يا رجل

ترى قراءة القرآن على السيارة جآئز , لكن الصدمة هينة ان شاء الله حاول تصلحها وتبيعها علشان تجيب لك قيمة

ازا تبيع انا شراي راسلني خاص

شكلها عين 

 موتري ياريس توماتيك اول ما شريته كان نظيف والحين قبل فترة مشيت طبلون الياريس 200  صورت الطبلون وهي ماشية 200   وواحد من العيال شاف الصوورة بغا ينجن قال كيف ياريس توماتيك وجبت طبلونها؟  المهم من بعدها جت السيارة حكتين وحده في زبالة الله يكرمكم ووحده في باب حوش    و3 صدمات في مكان واحد ما بين كل صدمه وصدمه يمكن اسبوع بس   وطلعلي فيها خرابات

والعين حق 

والله مصيبه 

كان عندك كامري 2013 وانصدمت وبعدها الكابرس انصدمت و صلحتها و الحين زادت انصدمت

يمكن احد قرايبك يحب السيارات ودايم يجي لبيتكم و شاف سيارتك و ما ذكر اسم الله عليها

إذا احد قرايبك معجب بسيارتك او دايم يجي لبيتكم وتمون عليه خله يذكر اسم الله عليها

مشكورين حبايبي والسياره معيونه باين
والي يقولي اول سياره لك ابشرك انا ما اسوق الا اس اس وكل ماشريت موتر احصل عين شخص فيه مايكمل معي شهرين بس ياليت يجي يقول ابي موترك بالنسبه الي يبي يشتري هذا رقمي وتواصلو معي مع العلم موصل لين الحين 22000 وهذا رقمي محمد 0543584266