أضف سؤال أو موضوع جديد          

قصص غش في موقع حراج وبعض النصائح

up 12 down 1
sultan-07 2438
قبل 7 سنه و شهر



السلام عليكم ورحمة الله وبركاته
مساكم/صبحكم الله بالخير

اليوم بأسرد لكم بعض قصص الغش اللي مرت علي شخصياً ووحده منها في واحد من المواتر اللي كنت أمتلكها

1-قبل حوالي سنتين أو أكثر بعت موتري لومينا2005 وكان ماشي 350 ألف..وبعته على أحد الأشخاص من الجنسية العربية الله لايوفقه لادنيا ولا آخره..وبحكم إني ما أبغى أغش أحد علمته بكل اللي في الموتر وعلمته بكل الرشات والصقعات اللي في الموتر..

المهم تفاجأت قبل شهر في إعلان لنفس اللومينا بنفس رقم اللوحة ولقيت عداداها ملعوب فيه من 350 ألف إلى 130 ألف..وكلام راعي الاعلان إن بوديها وكالة ولا فيه رش ((على ذمة مالكها السابق))..!!!

أخذت جوالي وكلمت الرجال وأخذت وأعطيت معه لحد ما اكتشفت إنه انغش هو في الموتر وشاريه قبل سنة من نفس الشخص اللي بعته أنا ويقول أخذتها وهي ماشية 109..!!!

والرجال طلع عنده ذمة وأمانة وحذف اعلانه ويقول دام الشغله كذا بأكنسل البيعه أو بأنزلها الحراج تحت المكرفون وزي ما تجي تجي..!!
========================================================

2-طبعا كان عندي لومينا وبعتها وشريت موتر ثاني وتحسفت على بيعتها ولكن ما أقول إلا الله يهني راعيها فيها ويعطيه خيرها ويكفيه شرها..ويعوضني باللي أفضل منها..
المهم أثناء البحث عن طريق موقع حراج لقيت وحده في الشرقية وكلمت راعيها واتفقت أنا وإياه على السعر وأخذت منه كلام ان الموتر شرط ولا جاه اي تعديل أو برمجه والبدي وكالة على كلامه..
بعدها نسقت وضعي مع الدوام وقررت اروح له بعد يومين من المكالمة..فتحت موقع حراج بالصدفة ولقيت اعلان تحذير من هذي اللومينا وإنها كانت معدلة وفيه لها مقاطع ع اليوتيوب..!!
=======================================================
آخرها اليوم فيه واحد منزل اعلان تحذيري من لومينا 2011 وإنها كانت معدلة وكلام راعيها يقول ستوك مافيها تعديل وهي كانت فل هوائيات وكام....!!
=======================================================
نجي لبعض النصائح أثناء فحص السيارات وكلامي كله عن الكابرس واللومينا..
1-لاحظ المسامير اللي تثبت فلتر الهواء إذا لاحظت عليها انها انفكت من قبل أو شكل المسامير مختلف((كل مسمار له شكل ويختلف عن الثاني))على طول وخر وحط في بالك إن السيارة كان راكب عليها انتيك
وطبعا اللي بيركب انتيك بيكملها هوائيات..واللي موتره هوائيات أكيد انه راعي مقاومات..!!

2-شيك على وجيه الشكمان خصوصاً الوجه اللي بين دبات الرصاص وبين الهدرز..إذا فيه تنسيم فمن المحتمل
إن السيارة كان راكب عليها هدرز

3-شغل السيارة وادعس بنزين على الأخير إذا قطعت السيارة فهذا يدل على إن الموتر عليه برمجه

4-وهذي برضه خاصه في البرمجه..عشق السيارة في ال(d)واضغط للسيارة ع الأخير وعينك ع الآر بي إم
إذا عشق الموتر من الأول إلى الثاني والآر بي إم فوق 6000 أو6100 فهذا أيضا يدل على إن السيارة مبرمجة..والطبيعي إنه يعشق والآر بي إم من ال5800 إلى قبل ال6000 دورة.

5-اضغط للسيارة فجأة وبعدين امسك فرامل بقوة إذا لاحظت إن السيارة تفتفت وقربت تطفى والآربي إم ماهو ثابت فهذا يدل إن السيارة راكب عليها كام أو بالأصح كان راكب عليها كام<<هذي الطريقة تصير أحيان وأحيان ما تصير

6-فحص القير(الأربع نمر):
عشق القير طبيعي وخل السيارة تدحدر على أقل من مهلها وخل رجلك (وأنتوا وأنا بكرامة)ثابته بدعسه خفيييفة على البنزين..إذا وصلت السرعة 45كم/س والقير أخذ الأربع تعشيقات كلها فمعناه إن القير سليم بمشيئة الله..

هذي الطريقة للأربع نمر أما ال6 نمر ما استخدمته من قبل ولا لي خبره فيه

هذي بعض النصائح حبيت أفيدكم فيها وكلها من تجاربي ومن الحاجات اللي سألت واستفسرت عنها

والسلام عليكم ورحمة الله
http://www.youtube.com/watch?v=yQxl8GUN-oA







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ناس بلا ذمه ولا ضمير بياعين هواء  اخبر كامري 2007 كانت مع شخص باعها حراج وكانت ماشيه 300 بحكم عمله في حفر باطن وسكنه بالرياض  

 شاف سيارته بمعرض واقفه وكان عداد 130 الف  انهبل  وعرف انه دعوه كذب في كذب 

 وصووت وحش ذا  ^_^ 


up 2 down 2
سكودر 14928
قبل 7 سنه و شهر



الله يسلمك لاخر امر حق الدير 
اذا ركبت سيارة ودعست عمهلك لين وصل الآر بي ام الى 2 لازم ينقل الجير نمرة والثالث بعد والرابع المقياس هو الآ ر بي ام 2 


up 1 down 0
a m i r 553
قبل 7 سنه و شهر



نصائح مهمة الله يجزاك خير الدنيا و اﻵخرة
موفق خير أخوي 1+


up 2 down 0
أبو نجوى 2442
قبل 7 سنه و شهر



جزاك الله خير عالافادة
واحسن شيء الواحد يتكلم من تجربة شخصية وخبرة له 
هذي تخلي الناس تثق فيه بعد الله


up 2 down 0
ابو عبدالله احمد 3510
قبل 7 سنه و شهر



شكرا على مروركم جميعا..

أخوي فارس..
أنا أقصد بالنقطة الخامسة..التالي
تضغط للموتر من الصفر إلى سرعة 100 مثلا أو 120 وبعدين تمسك فرامل بقوة لحد ما توقف السيارة..قبل ما توقف
السيارة إذا لاحظت السيارة تنتفض وتتفتف فيعني كان راكب عليها كام..
ثلاثة من الشباب كانوا مركبين كامات على مواترهم..اثنين صارت معهم هذي الحركة لما رجعوا مواترهم ستوك..والثالث رجعت سيارته طبيعي..وأنا وضحت إنها أحيان تصير وأحيان ما تصير..وطبعا كلامي كله عن الكابرس واللومينا من 2007 وفوق..ما أدري والله عن أي موتر ثاني لأن تجربتي كلها عن الكوابرس واللومينات ماعندي خلفية عن السيارات الثانية.


up 0 down 0
sultan-07 2438
قبل 7 سنه و شهر



كفيت ووفيت يا سلطان .. الله يكثر من امثالك ويكفيك كل شر 
عند شراء سيارة مستعملة افحص وتاكد ولا تستعجل او تجامل اي احد 
ابسط حقوقك فلا تنخدع بالكلام المعسول وللاسف بعضهم يحلف بالله كذبا ليقنعك 



up 1 down 0
راكان 77 106
قبل 7 سنه و شهر