X امش على منهج الشيء اللي ترضاه على نفسك ارضاه للاخرين X

30 6

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 9 سنه و 11 شهر

السلام عليكم ورحمة الله وبركاته

كيفكم عساكم طيبين إن شاء الله

يمكن موضوعي اليوم مكرر لكن بأظطر اعيده لعل احد يهتدي

يا شباب الى متى بنقعد في هذا التهور , كل يوم نسمع حوادث وحوادث بسبب التهور

قبل شوي وانا ماشي في العروبه قسما بالله سيارات ما تعرف ملامحها من سرعتها !!

ليه كذا !! والله العظيم وانا احلف بالله 90% من اللي يسرعون , ماعندهم سبب مقنع لهذه السرعه او في الاساس ماعندهم اي سبب بس مزاج وانا أبصم بالعشره والكل يعرف إن ماعندهم أي سبب مقنع او ماعندهم سبب من الاساس  !!

وأنا والله ما انصحك الا لأنك غالي , ما أنصحك الا ما أبيك تموت وأنت بعمر الزهور لان قدامك حياه وحرام تروح بسبب مثل كذا , انصحك لان ما أبي أمك و ابوك او ولي امرك او اخوانك وخواتك او زوجتك وعيالك يبكون عليك وتسبب لهم جرح كبير كانوا في غنى عنه 

إما إذا سفهت هالكلام اللي قاعد اقوله لك وتقول يا كثر ما اسمعه ومليت منه ,  فأسمح لي مدامك تقول هالكلام فأنت معتبر نفسك رخيصه , بتقول لا ومدري إيش , لكن هذه الحقيقه وتقبلها ,  وطبيعي نفسك راح تقول عكس اللي ينقالك لك , لكن انت حاول تستنج وطبقها على شخص ثاني , لا تقول كل واحد واسبابه , انت إذا ما اقتعنت في شيء , تخيل ان هالسؤال انت تسأله واحد , وشف وش بيكون رده

تخيل انك تسأل واحد , وتقول له لا تسرع ترا حياتك غاليه وترا عندك اهل لا تخليهم يفقدونك وتراهم ما بيسامحوك لانك تركتهم بسبب طيش وسببت لهم الم كبير بسبب تهورك 

فإن قال صحيح كلامك وطبق كلامك , فهذا عارف ان حياته ملك لله وما راح يفرطها في سبب مثلك هذا

إما إذا صد عنك وقال يارجال سريها يا كثر ما نسمع من هالكلام وطنشك , فأكيد إن هذا بنظرك ( YOU ) وشو !! أكيد انه بنظرك واحد بايع نفسه وحياته تعتبر عنده رخيصه 

فأرجع لنفسك وشف وش اختارت 

وارضى بالواقع ولا تقول عندي اسباب

فاللي استنتجته إنك معتبر حياتك رخيصه 

اوكيه وصلنا لهنا , ونقولك بكيفك , مدامك تعتبر نفسك رخيصه فوش نسوي لك , مدامك ما اقتنعت بالكلام , فهذي مشكلتك

لكن وش ذنب اللي تخوفه بسبب تهورك او تربكه , او تخليه يصدم او يصيب او ينشل او يتوفى لا سمح الله وطبعا كل هذا بسببك أنت !!

قلي وش ذنبهم إن كنت أنت بايع حياتك

ترا الناس ماهم مثلك بايعين حياتهم , فليش تضيع روح , قلي بالله هذي ماهي جريمه في حق الله وفي حق نفسك 

ترعب ناس وتخوفهم بسبب طيشك , وممكن تتسب في حادث لهم , ويمكن تجيهم اصابات , ويمكن يتوفون 

وهذا كله بسببك أنت , بسبب تهورك اللي ما له معنى , بسبب انك معتبر حياتك رخيصه

ياخي إن كنت تعتبر حياتك رخيصه , فترا هناك من يتمنى انه يملك نصفها , يارجل يتمنى لو يملك ربعها , فياليت تقدر حياتك وحياة الاخيرين

بترجع وتقول لي , ياخي ما اقدر اترك التهور ومتعود عليه , فقولي كيف بكره بتتحدى نفسك !! كيف بتقول اقدر اسوي هذا , ونفسك تقول لا , وفي الاخير يتحقق هالشيء 

اقسم لك بالله هذا هو الانتصار الحقيقي , إذا قدرت تتغلب على نفسك وعلى هواك , فأنت هنا تعتبر شخص لا يعلى عليه , لكن اللي تجيبه نفسه وتوديه , فهذا جبان ولا يقدر بكره يحقق شيء , لانه اصلا ما قدر على نفسه , فكيف بالله يقدر على شيء اكبر منه

وصلني خبر عن زميل كان معنا في الاداره وقالوا سار له حادث

انا اعرف الرجال من بعيد , رجل ما شفته منه الا كل خير , خلوق محترم مثقف انيق , محترم للأنظمه والقوانين , واكثر من مره شفته يركب السياره ويربط حزام الامان , يعني رجل ماشي صح ومقدر قيمة الحياه اللي وهباه الله له , ولا يبي يضيعها ويضيع معه ارواح ثانيه

فقلت لهم وش السالفه وش صار له

فقالوا لي , الرجال كان طالع هو وقريبه , وكانوا ماشين على سرعه 70 كيلو متر بالساعه

وجاهم واحد ( اللي مرخص نفسه ^^ ) معه سياره عائليه من نوع جمس ماشي 160 - 180 تقريبا

وقاعد يخيط ( يساقط من بين الناس وكانه معه يارس وماشي 80 )  المهم مع المساقطه بالهسرعه العاليه

صدم زميلي من على الجنب الايمن , وحاست سيارة زميلنا وصدمت بسياج , وطاحت من مسافه 6 متر على التنده مباشره

توفي قريب زميلي في الحال

زميلي كان مليان دمان وطلعوه من السياره وودوه للمستشفى

وطلعت النتائج وكانت مع الاسف ......................................!!

فقد جزء من الحبل الشوكي , فتعرض لشلل نصفي , ما يقدر يحرك اي جزء من تحت البطن

إنا لله وإنا اليه لراجعون

بالله كيف هذا الشخص اللي صدمتهم بسبب تهور وطيش بيسامح نفسه

قتل نفس , سلب منها الحياه , خلا عياله ايتام , خلا زوجته ارمله , سبب لهم وللعائله كامله جرح كبير ما راح ينسوه

وسلب من الشخص الثاني نعمة الحركه , سار على كرسي , ما يقدر يمشي او يطلع او ينزل او يمارس حياته بشكل طبيعي او يسوق بشكل طبيعي , او يتروش او يقضي حاجته وانتوا بكرامه بسبب تهور شخص معتبر حياته رخيصه 

وياليته هو اللي مات وريح النفوس الباقيه من شره , بس للأسف انه عرّض حياة اكثر من شخض الى الدمار الشامل

بالله وش استفاد , لو انه كان ماشي 70 او 80 مثل العالم او 120 , ما كان سار اللي سار وما كان انشل زميلي شلل نصفي وسارت حياته بفضل تهور هالشخص زباله كل يوم يدعي عليه من قلب ومن قهر في قلبه ومن غبنه توجعه في قلبه لانه افقده نعمه كبيره بسبب تهوره 

وما كان قتل نفس ورمل زوجه ويتم ابناء وجرح عائله كامله مستحيل انها تسامحه 

وبيقعد هذا الذنب يدور في راسه الى ما يموت وراح يندم اشد الندم ويقول ياليت لو الزمن يرجع شوي 

فالحين انت ياللي تسرع , تبي يجي يوم وتموت , او ترتكب ذنب مثل ما ارتكب هذا ذنب وظيع اسره كامله و خلا الاسره الثانيه تعيش المرين

قولي تبي يسير لك مثله

اكيد بتقول لا , لكن كلمة ( لا ) ما تكفي لحالها , لازم فعل

لا ترجع وتتعذر وتبرر

حط نفسك أنت ,  مثل ما قلت لك فوق ^^ , وشف رد نفسك وش بتقول

حط نفسك انت اللي بكرسي متحرك ,  بعد ما كنت تروح وتجي وتسافر وتلعب كوره وتنطط وتصلي وتدخل الحمام وتقضي حاجتك بدون اي مساعده او مجرد تفكير في ان احد تخليه يساعدك , بعد ما كنت تداوم وتمشي عيالك وتسبح وتمارس حياتك بشكل طبيعي , اصبحت مقعد على كرسي متحرك وفقدت نص حياتك هذا اذا ما كنت مقتنع انك فقدتها بالكامل

فهل بتسامح من كان السبب !! ( السبب واحد متهور كان ماشي على سرعه عاليه وصدمك وخلاك كذا )

هل بتسامحه ولا كأنه سوا شيء !! والله ما راح تسامحه , بيبقى في قلبك جرح مستحيل انه يبرا

فشفت كيف انك ما ترضاها على نفسك , فكيف ترضاها على احد غيرك , لازم تمشي على هذا المنهج , ولا تبرر ولا تعتذر واقتنع بالاجابه

وانك تتخيل هذا هو افضل حل للاقتناع لانك بتكون راضي على اللي تسويه لانك ما ترضاه على نفسك

وايضا تخيل انك متت لا سمح الله , وتركت وراك , بنتين وحده عمرها 3 سنوات ووحده 8 سنوات , وولد عمره 13 سنه , بدون أب , بدون ناصح وموجهه , بدون حنان بدون امان يحسون فيه , بدون شخص لا خافوا من احد لجئو له , خليتهم ايتام ماعندهم ظهر يحتموا وراه , تركت زوجتك , ما عندها زوج تحتمي وراه , ماعندها زوج يصرف عليهم ويأكلهم ويتصرف في اوقات الشدائد ويسفرهم ويمشيهم ويحسون بالامان معه , تركتهم للحياه القاسيه يمشون فيها كيف ما جات , تركت اهلك بالكامل امك وابوك اولاد عمك اقربائك , زملائك خلانك 

فأسالك بالله العظيم , بتسامح من كان السبب !! امانه جاوب بكل ذمه وضمير بتسامحه !!

اترك الخيار لك 

والاجابه اللي بتقولها , اتمنى انك ما ترضاها على نفسك فقط , ابيك ترضاها على نفسك و على الاخرين

تقبلوا تحياتي 

اخوكم ابو يزيد

http://www.youtube.com/watch?v=PQUPfyvw9xY&list=WL

إبلاغ

الردود