نكمل معكم قصصنا الحلوة

14 8

لايمكنك التصويت حتى الحصول على 20 نقطة على الأقل
إضغط هنا للإخفاء

abo tawfiq 372
قبل 9 سنه و 10 شهر

بسم الله الرحمن الرحيم ...

اخبار الحبايب عساكم بخير ان شاء الله ...

والله يا طويلين العمر والسلامه ابي احكيكم اليوم عن قصه صارت قبل كم سنه ايام الخبال والهمبقه 

المهم اظن السالفه صارت في يوم عيد ، كنت متكشخ ومزبط وضعي وجالس اتجول في مخطط جديد كان وقتها 

المهم ماسك خط الخدمه كان معي كابرس 2002 يالبى ايامه ( مع انه قروشني بالحراره ) بس ايامه وافلامه 

كثيره المهم شطحنا عن القصه ، وين وصلنا ؟؟؟؟؟؟؟ ايه صح عند يوم كنت امشي بخط الخدمه ، طبعا معروف

خط الخدمه احيانا ما يكفي الا سياره وحده تمشي فيه ، بس خويكم لقى كرسيدا مدري وشنهي سياره من ايام 

جدي الله يرحمه المهم واكشحله يوخر عني طبعا جنب في نفس خط الخدمه فيه مواقف سيارات على الجنب 

طبعا انا يوم شفته طلع الكفرين اليمين على المواقف ما صبرت دزيت على طول المهم واشيل مرايته معاي 

طبعا تحسبون خويكم وقف يقوله معليش ؟؟؟؟؟؟ للاسف ما وقف الدلخ كمل الدزه الين قربت باب البيت 

طبعا ما يخفى عليكم كنت ناخ ام العافيه عشان كنت اول مره اصقع احد وكنت لحالي وبالليل يعني خوف 

زايد حبتين شوي المهم يوم قربت باب البيت الا وفجاءه ؟؟؟؟؟؟

صحى ضميري وقالي عيب عليك تصقع الرجال وتشرد ولا حتى تعتذرله المهم واكسر ام الطاره وارجع للمخطط

ادوره ادوره رجعت لمكان الصدمه مالقيت لا قزاز مرايتي ولا شيء قلت يولد لا يكون دخلت في صدره 

وقعد يصب دم ومدري ايش طبعا ذا التفكير مو مني من الضمير الي يوم مالقيت احد اشتغل على الحامي 

المهم ورجعت البيت اتفقد الاضرار لقيت القزازه حقت المرايه مهي موجوده ومالقيت شيء ثاني ولله الحمد

وبيني وبينكم ما قدرت ارقد ذاك اليوم قعدت اقول ياليتني وقفت ياليتني وياليتني و خلص العيد ورحت صلحت 

المرايه .

وعدت القصه واتمنى ان الله يسامحني وان راعي السياره ان شاء الله انه سليم ومابه الا العافيه .

قصه ثانيه على السريع >  سريع ولا الدائري ، صراحه المره ذي زودتها سكر الموضوع .

امزح امزح دعابه يا اخوان ..........

المهم برضه قبل كم سنه ايام الكابرس نزلت لسياره في الليل ابي اسويلي كم مشوار ، ما اذكر والله وش القصه 

السلف مو راضي يشتغل مدري المسجل يطفى ويشتغل مني متذكر الي اذكره اني وقتها لازم افصل البطاريه 

ربع ساعه عشبين تضبط المهم وافك الكبوت وافصل اصابع البطاريه واقفل الكبوت طبعا بعد ماقفلت السياره 

قبل ما افصل البطاريه ، المهم يوم قفلت الكبوت وراجع للبيت الا اوقف واتذكر اني قفلت الباب حق السياره 

وفصلت البطاريه اول سوال جاء في راسي ( كيف بتفك الباب عشين تفك الكبوت يا ذكي )؟

طبعا تعرفون الكابرس انه المفاتيح حقته برمجه يعني ماله اي فايده بدون الكهرب المهم وقلت بعد ربع ساعه 

يفرجها رب العالمين المهم ومرت الربع ساعه واحاول افك الباب المفتاح يدخل بس ما يدور المهم اكلم الشباب 

محد عرفلها واكلم الوالد الله يحفظه قعد يضحك على ذكائي وقلي اول شيء اهنيك على الذكاء الخرافي الي فيك

وقعدت اضحك ضحكه وش يسمونها ؟؟ ايه اسمها ( الضحكه التفشيليه التسليكيه الي تدل على غباء راعيها )

المهم قلي يولدي اصبر انا الحين مشغول لا خلصت امرك ونشوفها المهم يوم جاء ومعه واحد من اخوياه 

الله يجزاه ويذكره بالخير اخذ المفتاح وحاول يلف فيه يلف فيه ما رضى المهم اذكر انه قعد يصقع في الباب 

يصقع فيه وهو يلف المفتاح والحمدالله بعد محاولات فك الباب ، ابوي ناظر فيني وضحك قلي احمد ربك 

ان عندك ابو عنده خوي زي ذا ولا انت ماوراك غير الدجه > فيس متفشل من الغباء الزايد ، بس الوالد 

مزوح الله يحفظه لي ويحفظ اباكم لكم ، المهم وافك الكبوت بعد ما شكرت ابوي وخويه الله يجزاهم خير.

وازبط البطاريه وشغلت السياره وخلصت مشواري والحمدالله .

طبعا يا اخوان ان شاء الله تستفيدون من القصص الحلوه ذي وان شاء الله ما تسوون زي خوينا انه يصدم 

ويشرد بعدين يشتغل الضمير وترجع ،  لا .

اذا الله قدر عليك وصقعت احد لو هي حكه صغر ضفرك اوقف له وقله معليش و ان شاء الله تمشي امورك .

طبعا ما يحتاج اقولكم واكيد كلكم عارفين الشيء ذا انه اذا فصلت البطاريه لا تقفل الكبوت خله على الاقل 

مفتوح يعني تخليه  كنه مقفل بس هو مفتوح ( انلحس مخكم ) حتى انا زيكم .

المهم اعذروني على الاخطاء الاملائيه .

توصون شيء ولاش فمان الله .

اخوكم : ابو توفيق .

إبلاغ

الردود