أضف سؤال أو موضوع جديد          

تجربة توظيب وتركيب مبرد وحساس حرارة لقير لومينا V8 2006

up 32 down 18
وليد م ع الدخيِّل 477
قبل 4 سنه و 3 شهر



بسم الله الرحمن الرحيم


كنت اقرا كثير عن مشاكل ناقل السرعات الأوتوماتيكي من GM المعروف بـ 4L60-E أو المرموز له بالرمز M30 والذي ركّب على سيارات كثيرة من GM منها كابرس ولومينا الأستراليتين وكذلك على بعض موديلات الكابرس الأمريكي والبيوك رودماستر والكاديلاك فليتوود من 1994 - 1996 وبعض موديلات الكمارو والكورفيت والسوبربان واليوكن والاسكاليد والسلفرادو والسييرا ووووو غيرها موجودة بالمصدر:
http://en.wikipedia.org/wiki/GM_4L60-E_transmission


أحد أهم أسباب كثرة مشاكل هالقير هو إنه قديم قديم، أعتقد تم تصميمه وبدء إنتاجه من عام 1982 ولكن لم يستخدم بشكل تجاري واسع إلا في عام 1991 وتواصل صنعه وتجهيز بعض مركبات GM به دون أي تطوير جذري له، ومع السنين المحركات زادت قوتها وسرعتها وصارت تصل لأكثر من 300 كلم/س وقوى تصل لـ 600 حصان، فكيف لقير مصمم في بداية الثمانينيات أيام ما كانت قوى المحركات القصوى لا تتجاوز 180 حصان أن يحتملها ؟!!!


القير فوّت علي أو خبط كما يقولون صار ما يمشي الا بالنمرة 1 و 2 فقط، سألت كل الورش قالوا لازم توظيب.سويت بحث في النت عن أفضل ما يمكن عمله لهالقير ولاقيت الكل يقول الأفضل تركيب قطع أمريكية رياضية وتركيب مبرد للجير، توكلت على الله وحطيته عند أفضل متخصص بقيور الاوتوماتيك بمنطقة سدير وهو هندي بورشة قريب لي، وفك القير وحصل القير موظب من قبل بقطع تجارية من ضمنها كلتشات تجارية ما تتحمل وتخرب بسرعة.

قلت له أبشتري القطع أنا والحمد لله لاقيتها كلها في ترايستار بالرياض الصناعية القديمة.


كلتشات بورغ وورنر Borg Warner للنمرتين 1 و 2 بـ 500 ريال.
كلتشات زيباك Zpack للنمرتين 3 و 4 بـ 280 ريال.
قطع توظيب كاملة ترانس جو TransGo بـ 400 ريال.
مبرد زيت قير هايدن 8 مواصير بـ 200 ريال.

المجموع : 1380 ريال (صورة الفاتورة بالأسفل).

أيضاً كنت أبي سيرفو كورفيت بس ما لقيت عندهم فحاسبتهم وأخذت القطع ومشيت.

رحت للورشة وعطيت القطع للعامل وبدأ الشغل على بركة الله وحصل اللي ما توقعته، طلع السيرفو أيضاً تعبان ويحتاج تغيير.
لكن الحمد لله لقى عنده سيرفو وكالة أصلي جديد حق هالقير وقال لي تبيني أركبه والا بتجيب غيره؟ قلت ركبه.

وطلب أيضاً حساس للقير قطعة كهربائية إلكترونية صغيرة تكون بداخله، لاقيتها بمحل قطع غيار بسعر بسيط نسيت كم كان بس رخيصة بين العشرين والأربعين.


تم التوضيب خلال أقل من أسبوع والحمد لله شغل ممتاز رجع القير كأنه جديد.

طلب على شغل يده 1000 ريال، بس أنا زودته 300 ريال يستاهل.


مجموع قيمة توضيب القير بالكامل: 2700 ريال لو قلنا الحساس بـ 30.



طلبت منه يركب المبرد بس قال ما أعرف، وهو شغلة بسيطة ما تحتاج تعب كثير.

رحت لورش أخرى وكلهم اعتذروا وقالوا رح لمدينة ثانية حولنا !! معقولة لهالدرجة صعب ؟!

رحت للبيت ودخلت السيارة بالحوش وفرشت الفرشة وبسم الله، فكيت الصدام وركبت الرديتر في أقل من ساعة كوقت إجمالي، وبقي فقط توصيل لياته مع القير.
كيييييف راح أوصلها ؟؟!!

ما خطر ببالي إلا فكرة وحدة هي إني أفك الماسورة العلوية اللي تدخل في الرديتر وأجيب تحويلة معدنية مسننة توصل بينها وبين اللي بحيث الزيت يطلع من القير - رديتر تبريد المكينة - رديتر القير - يرجع للقير.
بحثت عن وصلة معدنية تصلح ما حصلت أبداً حتى المخرطة يقولون ما نقدر نسويها !

رحت للرياض ونصيت ترايستار وجيركو وتشالنجر وكلهم رفضوا يركبونه نسيت ايش كان عذرهم بس آخرهم قال لي روح لمحل هناك صغير مرة يشتغل فيه باكستاني اسمه فلان هو اللي يركب لنا المبردات، يعني طلعت هالورش الضخمة خرطي، إذا طلع العميل ياخذون سيارته برا لمحلات بعيدة شوي ويصلحونها عندهم.

المهم رحت له وبدا يشتغل ومار يجيب منشار !!! قلت خير وين ؟! قال أبقص الماسورة !!! قلت اصبر اصبر ما فيه حل ثاني ما عندك تحويلة ؟؟

أثاري هذي طريقتهم هالمتخصصين ودكاترة صيانة السيارات، ينشر الماسورة ويقطعها ويدخلها في الليات !!!

فكرت شوي في الموضوع وهو ينتظرني، وقلت في نفسي لي 3 شهور مركب الرديتر وما بعد وصلت لياته أدور على هالوصلة وما حصلتها، ماني رايق أدور مرة ثانية وثالثة مليت.
قلت قص توكل على الله.

أبد في أقل من 5 دقايق، قص الماسورة ودخل الليين فيها وربطهم بقفيزين وبس.


صحيح قصة ماسورة زيت القير الألومنيوم قصّت قلبي وضيقته، ولكن الحمد لله أخيراً تم توصيل المبرد.


التكلفة: طلب 60 أو 70 ريال وقلت له معصي، وش 70 ريال على شغل خمس دقايق قص ماسورة بالمنشار وتركيب ليين فيها !! حاولت أعطيه 20 أو ثلاثين بس رفض مرة وصراحة خفت أظلمه والا يدعي علي واتفقنا على 50 ريال,
كثيرة مرة مرة بس ما أدري وين كان مخي ذاك الوقت، أقدر أسويها أنا بالبيت بلاش في دقايق.



عاد الحين ما بقي إلا شي واحد بس، تركيب حساس حرارة للقير.
بحثت بالنت لقيت موضوع عنها http://www.ss3rby.com/vb/showthread.php?t=3792
كنت مفكر بالطريقة الثانية، وشاري التوصيلات والحساس من قبل أركب رديتر القير ولكن للأسف نفس مشكلة ما يمكن تركيبها إلا بقص ماسورة زيت القير، وأساساً سلك الحساس قصير ما يقدر يوصل بين مكان الحساس ومكان العداد داخل السيارة، وكيف راح أدخله للمقصورة من وين ؟؟!!
ما فيه إلا حل واحد فتح فتحة بين المقصورة وغرفة المكينة يدخل معها الحساس، تكاسلت عنها لين طنشتها ونسيتها.

مع الأيام رجعت لبالي الطريقة الأولى وهي تركيب الحساس في كارتير القير نفسه، فكرة حلوة وبسيطة جداً وتعطيك قراءة حرارة الزيت مباشرة من القير، والأهم إن القير تحت المقصورة يعني بيوصل السك وزيادة.

فكيت الديكور اللي حوالي القير كل أبوه لاقيت فتحة كبيرة 30×20 سم تقريباً بيضاوية الشكل تحت يد القير، مسدودة بقطعة بلاستك عريضة مغطاة بطبقة قار سميكة من الخارج، جبت الدريل وحفرت فيها فتحة صغيرة كافية لدخول الحساس معها ليصل للقير، وتم ذلك بنجاح وتم سد الفراغ بما وجدته لدي سداً تاماً وقوياً.


رحت للي وظب القير وخليته يفك الكارتير ويشوف أفضل مكان للحساس وبالفعل لاقينا أماكن وليس مكان ومن الجانب وليس من الأسفل مثل اللي بالمصدر يعني ما فيه أي خوف يحك بشي أو يكسره شي، تم فتح فتحة فيه وتلحيم الصامولة الكبيرة اللي جايه مع الحساس وتركيب الكارتير والحساس وملء القير بالزيت.

كلف كل شغلهم 100 ريال فقط والمفروض ياخذ أكثر بس أتوقع لأنه استحى مني بما أني قريب راعي الورشة.


الحساس وعداده بحثت بمحلات ديرتنا مالقيت عداد حرارة زيت، لاقيت فقط حرارة موية، وكلها فهرنهايتية للأسف، اخترت أفضل واحد منها وهو أمريكي ميكانيكي وليس إلكتروني يعني بس حساس وسلك يوصل الحرارة لين العداد والعداد فيه ابره تتحرك مع درجة حرارة السلك، والحرارة تبدا من 100 فهرنهايت يعني 38 درجة مئوية تقريباً.
وحطيته بشكل مؤقت في مكان جيد مناسب وشبكت اللمبة اللي فيه مع لمبة زر الفليشر (ضوء التحذير) بحيث يشتغل نوره مع نور السيارة.


والحمد لله رب العالمين الذي وفقني لذلك.


الصور:

الأولى / فاتورة ترايستار.

الثانية والثالثة / رديتر تبريد زيت القير ماركة هايدن 8 مواسير.

الرابعة / الرديتر وهو راكب بالسيارة.

الخامسة / مكان توصيل ليات الزيت من مواسير المصنع المقطوعة إلى رديتر هايدن والعكس (بنفسجي طالع من المبرد الداخلي في رديتر الماء رايح للرديتر الخارجي للقير) (أزرق راجع من الرديتر الخارجي للقير رايح للقير نفسه).

السادسة / مكان الحساس في كارتير القير.

السابعة / عداد الحرارة أثناء عمل المحرك وتبدو حرارة الزيت أكثر من 100 بشوي يعني تقريباً 40 - 50 درجة مئوية ويعتبر بارد.

الثامنة / نفس العداد ولكن بالليل ليظهر كيف مضيء مع نور السيارة، والحرارة نفسها ما زادت عن كذا إلا شي بسيط جداً ما توصل 80 درجة مئوية بعد المشي مسافة ودعس كم دعسة.

الصور الباقية / عدادات من موقع ebay أفضل من هذا إلكترونية ودقتها عالية ودرجة حرارتها مئوية، ياليت تختارون لي واحد منها، وهل توجد بالسعودية ؟!


كل الشكر والتقدير لكل من يشرفني بمروره على الموضوع
وكل من يشرفني بكتابة تعليق :)






















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


هلا بك يالغالي، أبد سو اللي تشوفه تمام :)


up 0 down 0
وليد م ع الدخيِّل 477
قبل سنه و 7 شهر



قديم و لكن رائع الموضوع


up 0 down 0
gammash 1
قبل سنه و 3 شهر