طريقة تعويض التأمين الشامل من التعاونية

شوف يالحبيب انت ماراح تدفع ولا ريال لان الغلط على الطرف الثاني يعني فيه شي اسمه نسبة تحمل انت ماتدفعه دام الغلط 100 بالمئه على الطرف الثاني
نجي للوكاله وشركة التامين ولازم يكون عندك طولت بال وتسعى وراهم لانهم راح يماطلون فيك لو تركتهم

الان نجي للطريقه
تاخذ ورقة الاصلاح والتقرير وكل الاوراق من المرور مع صوره من تامين الطرف المتسبب في الحادث
توديها لشركة التامين
شركة التامين تعتمد الاوراق وبحكم ان الغلط على الطرف الثاني فانت هنا ماتدفع نسبة تحمل يعني يصلحونها لك بدون ماتدفع اي شي

تاخذ اوراق طلب تقدير للوكاله
تقوم الوكاله تعمل تقدير للسياره كم يكلف وتطلع برنت وترسله لشركه التامين عشان التامين تعتمده وتعطيهم امر اصلاح
خذ بالك
الوكاله يمكن تاخذ 5 الى 9 ايام عشان تقدر تكلفة الاصلاح فانشب لهم يخلصونها لك في 3 ايام اقصى شي المفروض
خذ صوره من التكلفه وودها انت بنفسك لشركة التامين
لان الوكاله بتطنش ويمكن ماترسلها لشركة التامين الا بعد اسبوعين فانت خلص امورك بدري

شركة التامين يمكن ترسل مندوب عشان يشوف هل السياره فيه اشياء ماتحتاج الى اصلا او لا
يمكن ياخذ المندوب الى 15 يوم يعني حاول تشب عليهم
بعدها يصدرون امر الاصلاح وتقوم الوكاله تصلح سيارتك

وانتبه واحذر من شغله دائما تصير
الوكاله تكلفة اصلاحها وشغل يدها غالي جدا جدا

لذلك شركات التامين قامت تلعب بطريقه ثانيه
تقولك عندنا ور تابعه لنا شغلهم سريع وبنفس شغل الوكاله واسرع منهم وش رايك نعطيك امر اصلاح عندهم افضل من الوكيل ؟

قولهم لا
سيارتي تتصلح فالوكاله فقط حتى لو تجلس 5 سنوات
لان هذي الورش انا مجربها شغلهم ابو كلب وترقيع ويماطلون فيك والتاخير لاحقك لاحقك 
بس التامين توجهك عليهم لان شغلهم ارخص من الوكاله فكل شي

فهم يحاولون يقلصون من تكلفة الاصلاح بتحويل العملاء الى ورش تابعه لهم

واي استفسار انا حاظر

احتمال كبير يحولونك على الصناعيه حق المرور لتقدير السيارات المصدومه

هذا حتى لو اجبروك عليه ترا فالنهايه ترميه والوكاله ماتعترف فيه

الوكاله لها تقيم وتقدير في اصلاح السياره اغلى من تقدير المرور

فهم يحولونك على تقدير المرور عشان يحاولون يستدرجونك تصلحها في ورش تابعه لشركة التامين

خويي انقلبت سيارته ولعبو عليه وصلحها في ورشه تابعه لشركة التامين واخرتها لقيناهم ملحمين الشاص وعدلينه والمفروض الشاص يتغير
بحكم ان الشاص مجزأ الى 3 اقسام فينفك ويتغير بواحد جديد
هذولي راحو عدلوه ولحموه
لكن الوكاله تغيره لك

نسيت اقولك بخصوص استفسارك عن شغله

شركة التامين هي اللي تطالب بالتعويض وليس انت
انت لازم تجبلهم صوره من تامين الطرف اللي غلط عليك وتختمه من المرور وترفقه مع الاوراق وهم ياخذونه ويرفعون فيه مطالبه
وسيارتك يصلحونها لك ويدفعون قيمة التكلفه 
حتى لو تاخرت شركة التامين حقت الطرف المخطي مالهم علاقه فيك

الاخ شاقح،، الله يبيض وجهك على التجاوب السريع والمفصل انشهد 

عندي استفسار هل هناك مدة معينة للمطالبة بتصليح سيارتي لان الحين اجازة والسيارة تمشي اروح واجي فيها وبعد الاجازة امر التعاونية واخلصها

دام سيارتك تمشي خلها معك عيد وفلها وبعد العيد ارجع لهم

اصلا لو رحت لهم الحين بيقولون نستقبل سيارتك وماراح نسوي شي الا بعد العيد
وانت قولهم بعدين رحت للوكاله وقالوا تعال بعد العيد
فليه توقف سيارتك وتعطل نفسك وهي بتوقف عندهم اصلا لبعد العيد

الحين حاول تخلص اوراقك من المرور كامله عشان بعد العيد تطب على شكرة التامين والله يعينك على المعركه اللي بتخوضها معهم
وفيه طريقه حلوه تختصر على موظف شركة التامين بدل ماتنتظره 15 يوم عشان يروح الوكاله ويشيك على السياره

صور السياره من كل مكان وبشكل واضح
واذا رحت شركة التامين خلهم يشوفونها واعتقد الصدمه عندك بسيطه ومعروف ايش القطع اللي يحتاج تغييرها
كذا انت تكون اختصرت مشوار طويل وموظف شركة التامين ينبسط ويفلها بدل مايضرب مشوار ويخلصك بسرعه

صدقت حركة التصوير

ما عندي مشكلة اوصله واوديه واغديه على حسابي بس يضبطنا

الامور اللي كلمت عنها صارت معي قبل فتره
تعرف الموظف تتراكم عليه السيارات ولازم يلف الوكالات ويقيم كل السيارات ويرجع للشركه ويجيبها وشغلتها طويله بالنسبه له

انا يوم قلي الموظف كذا قلت وش رايك اجبلك الصور هههههههههههه
قال جيبها واخلص الموضوع لك
وارسل لهم الموافقه بالاصلاح
جبت الصور وارسلتها على جواله واتس اب وطبعها وارفقها في ملف
وارسل خطاب اعتماد اصلاح للسياره وانا واقف عنده 

نصيحة اذا ماسلموك الشيك في خلال 14 يوم  بعد ماتخلص اوراقك تقدر تقدم عليهم شكوى وﻻ تنسى اذا قالت الوكالة  ان موترك يكلف المبلغ الفلاني وجاء التامين نقص السعر اشتك عليهم ترا بعض الناس مايدري عن الامور ذي 

اخي شاقح ،، كلامك جميل جداً .. الله يوفقك وين ماكنت ،


سـ/كيف اخليهم مايحولوني ع المرور ؟ عشان مايبخسون السيارة .. ؟

واذا اجبروني ع المرور عشان اصلح في ورشات التأمين كيف استطيع الرفض؟

يا اخوان بخصوص الشيك هو يخلص في 3 ايام بس لازم تجيب فاتورة قيمة الاصلاح من الوكاله وتوديها بنفسك للتامين
بل ماتنتظر

بي ام دبليو
مايقدرون يجبرونك عليه
انا قالو لي انتبه من الوكاله تراهم يتاخرون وعليها زحمه فيه عندنا ورش ومن هالكلام
قلتلهم مالكم علاقه انا ابي اصلح السياره فالوكاله لو تجلس سنه 

هم يحاولون يخوفونك ويبعدونك عن الوكاله
بخصوص تقدير المرور خلهم يقدرونها عند المرور اذا اجبروك
بس فالنهايه انتم قولهم مابي اصلح الا فالوكاله

ابو ابراهيم
هانك مكشله بين الوكاله والتامين انتبه منها

ممكن تكون الصدمه خفيفه
فالصدام بس
تجيك الوكاله تغير لك كبوت ورفرف !!!!

ليه طيب بس عشان ياخذن القطع القديمه ويبيعونها
وتعال شوف موترك تطلعه وهو توه جديد ومرشوش كبوت ورفرف

قلهم مابي اغير لاكبوت ولاغيره انا ابي اصلح الاشياء اللي تضررت فقط

سيارتي جاها دقه خفيفه
الوكاله طلعت تقرير 15590
لقيتهم مغيرين قطع واشياء مافيها اي ضرر
انا رفضت طبعا لانهم لو فكو وغيروا راح يلعبون فالموتر

والمشكله كلها حكه فالصدام وتغير كشاف

بعد روحه وجيه ومتابعه
السياره كلفت قطع مع شغل اليد وكاله 3920
يعني تخيل من 15590 الى 3920

والله وانا خوك عندي الصدام والرفرف اليمين والشمعه يبيلها تغيير اما الكيوت جاه دقة بسيطة ومنقهر ليته ما جاه وش رايك اغير الكبوت او سمكرة الكبوت مع ضرب بويه جديد 

ياغالي مافي شي اسمه يصلحولك بكيفهم ويجبرونك على ورش
انت معاك وثيقة تامين وبس
شوف بالوثيقة مكتوب اصلاح ورش او وكاله
وعلى المكتوب بالوثيقة بيسونه
ولاحد بيجبرك ولاشي
والوثيقة معاك وان احد قالك بنصلحلك ورش حط الوثيقة بوجهه وقول اقرا المكتوب بالوثيقة ان كان وكاله
وسلامتك

واحتمال انهم يطلبون منك 3 تسعيرات ورش وتسعيرة وحدة قطع غيار
اذا طلبوها جيبها لهم لانهم بهالتسعيرات بيخذون فلوسهم من الي دعمك وبيصلحولك انت وكاله وبيعطونك شيك بقيمة الثلاث تسعيرات وتسعيرة قطع الغيار ومابيضيع لك حق ان شاء الله

ولاتخاف ولاشي حتى ان طولو عليك شوي مردهم بيصلحون لك وان طولو اشتك عليهم بمؤسسة النقد اتوقع لهم رقم شكاوي


والله يسهل عليك

انا مريت التعاونية اخذوا تقديرات ٣ ورش وحق شيخ المعارض وخلاه على جنب وعطاني ورقة تنازل عن مطالبة الطرف الثالث وعطاني ورقة طلب التسعيرة في الوكالة وقالي موترك حنا متكفلين في تصليحه من الالف الى الياء ولو كان فيه حذف بالسيارة قلت على بركة الله وحولني على الجميح مخرج ١٨،بصراحة. طلبت منه يغير الوكالة واروح لتتوكيلات قال حنا متعاقدين معهم وما ادري عن صحة كلامه المهم مريت الجميح صراحة مبناه في مكان مكسر الشوراع والمجاري محاط بها للاسف وقالي الفني ان التسعيرة بعد العيد وعطاني موعد، هذا وللبقية تكملة