العين تدخل الجمل القدر وتدخل الرجل القبر_قصتي مع تاهو 2012

36 13

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 10 سنه

السلام عليكم ورحمة الله وبركاته

كيفكم عساكم طيبين ان شاء الله

بأذكر لكم سالفة ولد عمتي وبأنسبها لنفسي وان شاء الله تستفيدوا منها

بسم الله الرحمن الرحيم

انا عمري حدود 22 سنه والوالد طلع لي تاهو 2012 من الوكاله والحمد لله نظيف جدا واخو الوكاله

عدلته LTZ وركبت له جنوط 20 وشبك ونياكل التي زد

وكل من شافه قال ما شاء الله والله يحفظه لراعيه

له الحين معي ما يقارب سنتين ونصف ما حكيت فيه ولا حك ولله الحمد الا قبل شهرين وبأذكر لكم الموقف اللي سار لي

كنت اداوم واوقف سيارتي دايم برا

الا ذاك اليوم لقيت موقف جوا ودخلت السياره بالمواقف الداخليه

نزلت من السياره وسكرتها

الا وجاي واحد يشتغل معنا بالفرع وقال التاهو هذا لك ياولد !!!

قلت في نفسي ( صباح النور ) !! وبعدها قلت بلساني إيه !! وانا متعجب على هالصبح !!

قال المووتر لك ملك ولا حق ابوك هاه ؟؟

قلت لا الله يسعدك موتري وملك لي فيه شيء !!

قال انت كم عمرك ياولد عشرين ؟؟؟

قلت وش فيك الله يهديك !!

قال لا بس سؤال ؟؟

قلت له 22 سنه

قال عمرك 22 سنه بس ومعك هالسياره وموديل هالسنه !!

تعوذت من أبليس و صديت عنه وقلت الله يفكني شرهه

وعطيته ظهري ومشيت لان هالوجيهه ما تستحق اني اتجادل معها

ياخي ربي رزقني والحمد لله وانا مقدر النعمه اللي عطاني اياه ربي انت وش اللي حارق رزك

المهم ومر يومين . ثلاث . اسبوع . ونسيت السالفه

المهم وطلعت من البيت ذاك اليوم اودي اخواتي للسوق

ويوم اني كنت بالدائري دقيت اشاره عشان ادخل للخدمه

لفيت من الخدمه وماشي بطريقي الا ويجي واحد هطف معه كورلا كان بالخدمه بالاساس الله يصلحه ويبي يسقط علي

واوخر عنه اوخر عنه وشوي اركب الرصيف على يساري وادق له بوري وهو لاف علي وطاير

والمشكله قدامه واحد مهدي في خطه يعني يا يصدمه من الخلف او انه يلف علي ويصدمني

وانا اضرب فرامل بقوه لانه لزق فيني وهو دخل علي عشان لا يصدم اللي قدامه

ويشيل على الرفرف مع الصدام والشماعات عادت بنص الطريق !!!!

إنا لله وإنا اليه لراجعون , وانزل القط الشماعات طارت بنص الخط لانها متعلقه قواعدتها بالصدام وواحد انكسرت وواحد باقي معلقه بالصدام

وكلمنا نجم وقدر الحادث ... الخ

رحت شديت الصدام وركبت شمعات جديده وصلحت الرفرف ورشيت

ويوم طلعتها من الورشه نزلت للبقاله ويوم رجعت لقيت الباب محكوك !!!!

انا لله وانا اليه لراجعون وش السالفه !! وبديت اشك في اللي كلمني ذاك اليوم

وقلت يارجال مو اي شيء يسير اقول عنه عين , يمكن هذا بسبب معصيه سويتها وهذا عقاب لي

المهم ما اطول عليكم

يمكن بعدها ب 3 ايام اخذت قريبي ونزلنا لمطعم ويوم عدنا طالعين ناداني الكاشير وقال خذ الباقي تراك نسيته

المهم وانا راجع واسمع قريبي يصيح على واحد ويقول ياولد السياره السياره خلاص بتصقع الا ودججج

واخذ الباقي وارجع جري واشوف شايب معه جمس وماخذ الموقف عرض وانا كنت داخل طول وصقعني من الجنب بصدامه

لا حول ولا قوه الا بالله

وش فيك ياعم قال والله ما دريت ياولدي ومدري ايش وما ادري كيف ما شفتك

قلت فاهمك ياعم واعرف ان السبب مو منك السبب من واحد معي بالعمل

المهم الشايب ما يدري وش السالفه وقلت له خلاص الله يستر عليك مسامحك

وقريبي يقولي وش فيك انت خبل , خله يعوضك اقل شيء ب 500 ريال

وقلت له والله ماله ذنب الشايب السبب كله من واحد معنا بالدوام حسبي الله عليه

قال ايه اسمعك تقول للشايب كذا , وش السالفه ؟؟ وقلت له السالفه ووصلت في كلامي عند الحادث الثالث اللي قبل شوي يوم صدمنا الشايب واقول لقريبي هذا كله بسبب العيان اللي معنا

الا وتفحيط ورانا

ما تسمع الا صوت الكفرات حححححححححححححححححححححححح

ودردبببببببببببببببببببببب من ورا

الا ورقابنا تخلعت من محلها

لا حول ولا قوة الا بالله

وقلت لقريبي ضيف الحادث الرابع على اللسته ( القائمه ) :(

وانزل واشوف هو معه كابريس وما سار له شيء وانا صدامي مع الهوك تأثر وانا جمس وهو كابريس

دريت انها عين وشينه بعد

ويجي نجم ويكتبوا التقرير . الخ

وارجع البيت وانا ماشي 20 وادعي واقرا المعوذات

واقول لامي السالفه وتقول بكره خذ مويتهم او فناجيل الشاهي ان بقا فيها شيء واجمعها كلها بقاروره وجيبها لي

ووالله من بكره ادخل عليهم واقول السلام عليكم , ويقولون وعليكم السلام , كيف حالكم , بخير , قلت العين ياشباب حق , صحيح ولا ؟ قال صحيح , وقلت لهم انا معيون في سيارتي وكل بني ادم عيان الا من قال ما شاء الله , فودي بس اخذ بيالاتكم ( فناجيلكم ) ان كان ماعليكم كلافه ولاني قاصد احد منكم

ولا كان اقدر اروح للي عانني واقول ابي فنجالك يا .... ( لكن حبيت أستر عليه ) فخليت الموضوع كاني ما اعرف

قام خويي الروح بالروح قال انا اول واحد , وبسم الله ما شاء الله تبارك الله وقام يدعي وينفث في فنجاله وعطاني اياه

وقام بعدها الثاني والثالث الين ما وصلنا عند العيان وعطاني فنجاله وبعضهم قعدوا يستهبلون علي واللي يقول تبي تسحرنا ومدري ايش , الله يصلحهم , يدرون هالموضوع مافيه مزح , وانه موضوع كبير , والرسول ذكر انه في اخر الزمان راح يكثر موت الفجأه والموت بالحسد والعين , وذكر ان العين تدخل الجمل القدر وتدخل الرجل القبر , وهم متهاونين فيه

المهم واعطيه الوالده و تحطه بمويه وانا كمان حطيت شوي في قاروره وقريت عليها وصبيتها على سيارتي وجيت شربت منها بعد لانه سأل عن عمري فقلت لا يكون بعد عانني مع السياره

واخذت اللي مع الوالده ورشيتها على سيارتي وشربت منها

واليوم الثاني والله لقطت العجم حق التمر وجمعته معي وحطيته بطشت وقريت عليه و صبيته على السياره وشربت منه

وابشركم بفضل الله من بعدها احس انه سار موتري الاول وارتحت معه من جديد

فأنتبهوا الله يسعدكم من ذولي اللي ما يذكرون الله , ونصيحه لا تخلي يطيح الفاس بالراس , قوله من وقتها اذكر الله ياخي , لانه يمكن ما عاد تقابله من جديد , او انه يمكن تكون نهايتك لا سمح الله لان الرسول ذكر ان العين تدخل الرجل القبر

والحمد لله عدت على خير وحبيت اطرح لكم الموضوع للفائده وسلامتكم

محبكم ابو يزيد

إبلاغ

الردود