أضف سؤال أو موضوع جديد          

مواقف صارت معي بالمعارض والشريطية

up 16 down 5
ليزو 478
قبل 4 سنه و 4 شهر



السلام عليكم ورحمة الله وبركاته 
كيفكم .. ؟ 
بتكلم اليوم عن كم موقف صارلي بالمعارض .. 
الموقف الاول :نازل معارض النسيم انا وصاحبي .. لقينا بالحراج لكزس es لونها اخضر على ازرق " قريب من التركوازي بس درجته احلى" 
المهم الي يحرج عليها يقول بدي وكاله والسيارة نظيفه وووو ! 
لو تشوفوا الرفرف الخلفي من عند غطاء التانكي تعرفوا انه حاط 2 طن معجون بذيك المنطقه ! .. المهم قلتله ماهي بدي وكاله ومن هالكلام .. عطني مفتاحها 
راح يجيب المفتاح .. صاحبي ركب مكان السواق .. لما فتح الباب لقينا اثار رش على جلود الباب ! 
جا الرجال قلتله كيف تقول بدي وكاله تعال شوف .. قام يقول يعني انت مصدق انها بدي وكاله وكذا سعرها "كانت رخيصه " 
"شوفوا كيف برر كذبه بإنه يبي يبيع بمبلغ قليل !" 
موقف ثاني : كنا في أحد المعارض .. انهبلنا على كاديلاك قديم كلاسيك ومخزن ماشاء الله تبارك الله وردة 
المهم وراعي المعرض واقف معنا عنده دخل شابيين مصريين يسألوا عن سيارة .. قالهم مسيومه ب 26 ولما نادى العامل عشان مفتاح السيارة سأل العامل ئي بكم مسيومه "طبعا المصريين كانوا بعاد عننا " 
قاله ب 24500 ! يعني الرجال طلع سومه من راسه +1500 ريال !!! 
موقف ثالث : في حراج الشفا باكستانيين عنده مجموعه فوردات ركبتهم كلهم ولا واحد فيهم شغال فيها عداد المسافات ! .. حراج النسيم لقيت كابرس ال تي زد اسود 2004 فل كامل ب 8000 الاف او 8500 ! لما ركبته لقيت عداد الحرارة مفصول ! كلمت راعيه يقول لا هو كذا يفصل احيانا !
موقف رابع : صار معي قبل كم يوم .. كابرس اس اس 2006 ابيض موجود بمعارض النسيم .. شايفه من رمضان الماضي كان يبيله تلميع وتنجيد :) لين هنا حلوين .. السيارة للحين ما انباعت قبل اسبوعين تقريبا جيت ولقيتها وكان واحد من الشباب يدور كابرس اس اس قلتلهم هاتوا مفتاحها طلع ما فيها بطارية بالمرة كل شي طافي 
قالي خذلك فرة ونشغلها .. المهم قلتلهم كم الممشى قال بحدود 200 الف .. قلت تمام كم مسيوم قالوا 23 الف 
اخذت رقم الي بالمعرض وقلتله بيدق عليك واحد وصفله المعرض يبي السيارة قال تمام 
ورحت .. كلمت صاحبي عن السيارة وقال خلاص بشوفها ومدري وش صار معاه وما راح .. الف حمد لك يالله انه ما راح 
ولا كان متفشل قدامه الحين .. جيتهم يوم الاحد الماضي لقيتها فيها بطارية "والكابرس وهو طافي يطلع لك كم الممشى " تتوقعوا كم ؟ " 360 الف كيلو وهو قايل حول ال 200 الف ! يوم قمت انفخ عليه صار يقولي تراه 2006 ولازم يكون ماشي كثير !!!!!
المهم قلتله كيف جايب 23 الف صار يقولي لا تكذب انا قايل لك جاب 24 ! شوفوا كيف الكذاب 
سكرت باب السيارة ونزلت اناظر بالتندة والكبوت يالله سترك التندة من عند فتحه السقف فيها انحنائات لما دققت بالصوت حق طقطقه التندة دريت ان فيها معجون "بالغالب الكبوت فتح عليه وهو مسرع وصفق بالتنده " 
المهم الرجال صار يقول اذا تبي اشغلها ادفع عربون انت اكثر من مرة تجي ولا انت شاري ومشيت وخليته 
موقف رابع : لومينا اس اس انعرضت بموقع حراج موديل 2004 .. المهم كاتب الحد 13 سمتها منه بالموقع ب 10 لانها مرشوشة مطفي وفيها دقات ويبيلها شوية شغل + انها بدون فتحه سقف 
وما وافق .. قابلته بالصدفه بمعارض النسيم .. يقولي مسيومه ب 6 .. مباشرة انا انهبلت قلتله اشتريها ب 7 ! قام وافق لما جربتها طلع الدركسون ثقييييييييل بالموت يتحرك 
الشنطه ما تنفتح الا من ورا الكرسي "في سحاب تسحبه وتنفتح" فتحت الشنطه وشلت البطانه الي على الرفرف الخلفية لقيت انواع التلحيم ! 
الزبدة السيارة ما تنفع الا تشليح نزلت وقلتله مابيها بهالسعر اذا تبيع اقل كلمني واعطيته رقمي 
دق علي قبل المغرب قال اذا تبيها ب 6500 تعال خذها ! تخيلوا بموقع حراج كانت ب 13 وبالواقع محد راضي يعبره ومسيومه ب 6 الاف ! 
مواقف كثيرة صارت معي هذا الي اتذكره 
الخلاصه .. لا جيت تشتري ما عليك من الي يقولك مسيومه بكذا وبكذا سوم بخراجك وبالي تشوفه مناسب ولا تستحي من الرجال .. 
انا جيت اشتري سيارتي كانت مسيومه بمبلغ والرجال مو موافق قلتله هذا العربون واخذها بسومتها ووافق ! شفتوا كيف ؟ 
فتش بالسيارة ولا تستحي .. دور ببطانة الرفرف واقعد تلقف بالسيارة وزواياها وافتح الكبوت والابواب وشوف هل كل المناطق متشابهة ولا فيه اشياء واضحه مختلفه ! 
ترا جاي تشتري انت عشان تاخذ سيارة ترتاح فيها مو توسوس منها 
المعارض اسعارها اغلى من الساحه والساحه اغلى من الحراج .. وكلهم فيهم النظيف والمعدوم 
المعرض الي قلتلكم عنه كنت بشتري من عنده كابرس 2006 النصاب الي يشتغل بالمعرض يحلف انها نظيفه وورده وراعيها محافظ ! وتلاقي راعيها قال خلوها عندكم تنعرض ان جابت الي ابيه بيعوها 
وهذا النصاب يرفع فيها وهو ما يدري وش جايها ووش ماجاها حتى يمكن ما قابل راعيها طول حياته !
.. وضع السوق هالايام .. شريطية يبيعوا شريطية وشريطية يشتروا من شريطية 
ما صارت ننزل المعارض نص الي بالسوق من العينات "داق لطمة \ شرايك نحرج عليه يا ابن عمي " 
بالتوفيق للجميع واسف طولت عليكم 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


يووووووووووووه انت شكللك اول مره تأخذ لفه في المعارض ماتشوف مايجيهم مطر انامره من المرارير هههههههههههه كنت منزل فورد 2005 ووصل 25الف واناطالب فيه 30الف شوي مادريت الاالمحرج يقول 25 25 25 وشوي قال 27 27 من عنده زود قمت نزلت وسكرت الكبوت وقلتله لاباركالله فيكم تفيييي عليكم مالكم كله سحت


up 1 down 0
سمورة -76
قبل 4 سنه و 4 شهر



الشريطة وجيهم تسد النفس


up 0 down 0
l-kaled-l 13
قبل 4 سنه و 4 شهر



بحياتي ما شتريت سيارة مستعملة إلى من ابو هنود ههههههه .... والله انهم صادقين ويقولون لك كل العيوب بأمانة


up 0 down 0
muayad 1 764
قبل 4 سنه و 4 شهر



أي اشترها من هندي وابعد عن الباكستاني نجس


up 1 down 1
سمورة -76
قبل 4 سنه و 4 شهر



ملاحظة انتبهوا من بعض مراكز الفحص تراهم يدهورونك لاتعتمد عليهم بكل شي افحص السيارة زي مقال الاخوان واحرص على قيادتها واسمع صوت المكينة وانت داخل السيارة ومشغلها ومسكر الابواب واسمع صوت المكينة من الخارج نصيحه واحد اخذ مقلب


up 3 down 1
الشمالي4 -17
قبل 4 سنه و 4 شهر



80% من سيارات المعروضة بهذا الموقع خلاف الواقع للاسف الشديد يضيعون وقت الناس واخر شي تصاب بخيبة امل يوم انك تشوف الموتر والموتر النظيف يطلبون قيمة خيالية اكثر من قيمته الحقيقية ويقلك ماتبخس حلال الناس في سعر سوق ماهي على كيفك الشغلة 


up 2 down 1
benz lover 168
قبل 4 سنه و 4 شهر



صحيح لقيت كابرس 2006 كلاسيك 8 سلندر

ويوم تعنيت له و اشوف الموتر من بعيد وطابت النفس منه


مصفق و محكحك و افك الكبوت الا زيوت ع المكينه ولا ذكر بالاعلان

و اتفلسف معه شوي ابي اجره بالحكي وجريته لموضوع القير و قال
توه موظب القير و بالاعلان ماذكر اي شي منهاِِِ



اصررررف النظر سريع سريع


up 0 down 1
xpoldx 1430
قبل 4 سنه و 4 شهر



بعض ذا العالم سبحان الله لا ذمه ولا ضمير ولا خوف من رب العالمين

الله لا يبتلينا بس بعض ذا العالم كل فلوسه حرام بحرام ويدور الحرام ولا يهمه لا حساب ولا عقاب

لكن الوعد الآخرة


up 0 down 1
k1nder 169
قبل 4 سنه و 3 شهر



كابريس او لومينا ابعد عنها نهائيا ولاتفكر تشتريها لأن راح تدفع اضعاف قيمتها وفي الاخير تتمنى احد يشتريها منك حتى لو كرامتك منعتك انك تبيعها بسعر سيكل وقوفها عند البيت يكلفك رسوم استمارة و تأمين ووو
... الاسعار في الموقع طبيعي انها تكون اعلى من السوق بواقع 20 % وإلا كان صاحبها باع في الحراج واستلم فلوسه في وقتها


up 1 down 1
dell2012 859
قبل 4 سنه و 3 شهر