أضف سؤال أو موضوع جديد          

دهس القطط بالسياره اصبح شيء عادي- قصتي مع شخص متفنن في دعسهم

up 117 down 20
ابو يزيد 000 8688
قبل 2 سنه و 7 شهر



السلام عليكم ورحمة الله وبركاته

اسعد الله مساء الجميع 

بدون مقدمات , توي ركبت مع احد الاقارب وفيه رجه شوي الله يصلحه 

وانا كنت اطقطق على الجوال , الا والرجال لف بقوه , وانا فلتت الجوال من يدي و شديت نفسي

قلت وش فيك لا اله الا الله من لف عليك !!

قال لا بس قطو لكن فلت مني كنت ناوي ادعسه !!

انا ما ادري هو يتكلم من جده ولا لا !! 

قلت له صاحي انت ؟ تبي تقتل قطو وانت بكامل قواك العقليه وعارف انك راح تقلته وهالشيء عندك عادي !!

قال ايه وش فيها ؟ قلت له ماهي روح حتى ولو كانت حيوان تبقى روح صح ولا لا ؟

قال ايه , لكن انا بريحها من معاناتها لانها يالله يالله تعيش في السعوديه ونتفتها الشموس

وقلت له يا خي من انت يوم تقرر انها تعيش او تموت !! دام الله سبحانه اوجدها , فهو المتصرف فيها

هو اللي بيرزقها , وهو ارحم مني ومنك , لو صدق بتعيش حياة قاسيه راح يجيها يومها من الله سبحانه بدون ما تتدخل وتروح تقتلها عمد

المهم الرجال انحرج وانا والله عصبت وفصلت عليه

وقلت ماتعرف الحديث اللي عن الرجال يوم لقى كلب يلهث من العطش وقام وفك خفه ( نعاله ) وحط فيه مويه وسقا الكلب ودخله الله الجنه بسبب فعله هذا !

قال ايه اعرف وهو منحرج

وقلت طيب تعرف الحرمه اللي حبست قطوه ولا خلتها تطلع وتاكل من خشاشه الارض وماتت القطوه و الله دخلها نار جهنم !!

قال ايه عارف بس 

وقلت لا بس ولا شيء

اوقف عند اقرب بقاله , قال افا زعلت مني اجل , قلت لا مازعلت بس اوقف عند بقاله 

قال ابشر

وقلت انزل معي بسرعه , ونزل معي , وقلت لراعي البقاله وين التونه !!

ودلنا عليها , ورحنا جهه التونه , واخذت علبه تونه ب5 ريال وفيه ارخص لكن خذيت ابو 5 ريال

وطلعت جهه الزباله وانتم بكرامه , لان عندها قطاوه 

وقلت له شوف , وجيت فكيت العلبه و كبيت التونه فوق الكيسه , قال خلها بالعلبه طيب !! قلت ممكن تجرحها , قال اخس يالحنون هههههه

قلت يابن الحلال دامك تسوي خير فكمله ولا تخليه ناقص وانا مسوي نفسي جدي ورسمي وكذا عرفتوا هههههههه 

ويوم شاف القطاوه تجي لعندي مع انها متوحشه , استغرب !! قال امسكها , ويوم مديت يدي خافت ورجعت

المهم بعد ما حطيت التونه . جو لمي كلهم واقدر امسكهم عادي بس ماودي اوصخ يدي , وقلت تشوف !! 

حتى القطاوه تحس وعندها عقل وتعرف الشخص الطيب من الطالح , لو ماعندها عقل ماكانت خلتني امسكها رغم انها متوحشه

, قال وش تقصد , قلت لا ما اقصد شيء ههههه

بس احب اعلمك انها روح وتفهم لكن ما عندها وعي مثل الوعي اللي عندنا , ومو عشانها حيوان تجي وتقتلها بدم بارد

شفهم بالله وهم ياكلون , ما تحس بشعور حلو , قال لا عادي , قلت باقي تتكبر , ياخي تراك غلطان هههه

المهم انا ما اقتنعت باجابته 

وزدنا ركبنا السياره وقلت له وقف عند بقاله , قال وش تبي بعد , قلت ياخي وقف و وقف عند بقاله ميد

وقلت له انزل اشتر انت بنفسك تونه وجرب هالشعور , انك تاكل قطو وتشوف اثر اللي سويته عليها وتشوفه وهو ياكلها ومتحمس

قال طيب وخذا علبه تونه ويوم طلع حصلنا قطاوه صغار عند ميد مع امهم , وكب لها التونه , وجوا كلهم حوالي 4 بساس

وقعدوا ياكلون وهو الابتسامه شاقه وجهه وانا قاعد اطالعه وابتسم

ويقول والله ياولد احساس جميل ههههه , وكان في تونه بالارض وقام شالها بيده وحطها بالكيس ويقول كلوا كلوا جلعني فدوه ههههه

ياحليلهم والله 

قلت في نفسي الحمد لله اللي هداك بعد ماكنت تدعسها

وقال ياولد والله اني حمار تصدق اني قلتت 3 قطاوه من قبل حتى وحده كسرت علي الصدام من الاسفل

يوم اشوفهم الحين والله اني ندمان على اللي سويته والله اني حمار ومدري ايش

وشوي الا وقطوه راحت وقالها تعالي وقام يدفها برجله هههههههه وقالها كلي كلي ترا شريت العلبه ب 5 ريال ونص هههههه

وقام يصور القطاوه وتصور معها بعد ههههه  

وبس هذا الموضوع

حبيت اطرحه لاني اشوف هالشيء بين فتره وفتره وصراحه شيء يوقف له الشعر

مره كنت واقف وفاتح القزاز واسمع صوت مثل الانفجار الا وواحد ينزل من سيارته ويشوف صدامه ويروح

واشوف شيء ورا السياره يناطط وانزل واقرب الا وقطو قاعد يتنافظ وسكرة الموت قطعته 

وقعدت اتحسب علي اللي دعسها حتى ما شافها بس شاف صدامه وراح 

ذاك اليوم ما نمت من المنظر البشع اللي شفته

فاثر فيني  ,, فلا شفته ازعل 

وياخي هي بالاول روح وملك لله , بالله خذ لك علبة تونه وعطها قطاوه وشفهم وهم ياكلونها , تحس بأثر صدقتك عليهم وتفرح , لانك تشوف اثرها

احسن من انك تتصدق لشيء ولا تشوف اثره , لكن يوم تشوف اثره عليهم صدقني بتحس بشعور ثاني ومو شرط قطوه , تصدق على انسان وشوف اثر اللي قدمته عليه , واالله احساس ماينوصف

سو خير في يومك او اسبوعك ولو ( بعلبه تونه ) , كلها 3 ريال او 5 ريال , لعل الله يدفع عنك مصيبه , وفي كل كبد رطبه ( صدقه )

فكها لقطاوه وناظرهم

انا اقعد احيانا ربع ساعه بس اطالعهم وهم ياكلون , والناس تمر من جنبي وتقول وش في هذا مريض

لا ماني مريض ولا شيء , قاعد اشوف اللي قدمته يديني من خير لهالقطاوه , مافيها شيء , انا قاعد استمتع يوم اشوفهم ياكلون شيء انا شاريه بنفسي رغم انه رخيص 

وبس هذا علمي وسلامتكم وحبيت اطرح هالفائده لعل احد يتعض او يستفيد

https://youtu.be/zLDWTzVd39c

https://www.youtube.com/watch?v=zLDWTzVd39c









إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


طولت الموضوع يا رجال
وسردت لنا قصة حياتك


up 0 down 3
مؤسسة مظلات رسمية -3
قبل سنه و 7 شهر



الله يهدينا ويهديه 


up 0 down 1
gltsa.com 108
قبل سنه و 7 شهر