أضف سؤال أو موضوع جديد          

كشف الكمبيوتر وهم وتضييع فلوس

up 15 down 3
toritto 357
قبل 5 سنه و 7 شهر



السلام عليكم ورحمة الله وبركاته

اخواني اعضاء المنتدى الكرام

حبيت انقل لكم تجربتي مع كشف الكمبيوتر واتضح لي بعدها انه وهم كبير وخسارة فلوس ووقت على الفاضي

شريت سياره شيفروليه ابيكا موديل 2007 من المعارض وكان فيها تفتفه بالماكينه وضعف بالعزم

اخذت السياره وكلمت واحد اعرفه شغال في ورشه علشان يشوف موضوع التفتفه وضعف العزم ويكشف على السياره

المهم اتفقت انا وهو على موعد ورحتله الورشه ماشاء الله تبارك الله الورشه منظمه ومرتبه استقبال وقسم للحسابات مستقل لحاله وعماله فلبينيه مدربه واقسام

شيء للسمكره والبويه وشيء للتوضيب وشيء للعضلات والعفشه وشيء للماكينه والتوضيب

يعني تدخل الورشه تحس انك في الوكاله شيء مرتب

المهم صاحبي كلم واحد من الشباب الفلبينين انه يكشف على السياره كمبيوتر ووصاه عليه وقاله ترى هذا سيارتي اهتم فيها

الرجال يشكر بدأ الكشف بالكمبيوتر وبعد ماخلص كشف قالي عندك كويل رقم 3 ورقم 4 مايشتغلون غيرهم وغير البوجيهات برضه علشان تظبط اكثر

رحت محلات قطع الغيار شريت الكويلين والبوجيهات بحوالي 400 ريال ورجعتله اخونا ركب القطع وشغل السياره وجربت

والسياره ولا كأنك سويت فيها شيء نفس التفتفه وضعف العزم حنى ما خفت مثل اول

رجع كشف عليها بالكمبيوتر مره ثانيه الكمبيوتر جزاه الله الف خير قال نفس المشكله كويل 3 و 4 ماهم شغالين

يابن الحلال القطع توي شاريها كيف ماهي شغاله

المهم صاحبي قالي شوف ترى الماكينه في بداية تبويش والزيت يطلع على البوجيهات 

فالشراره ماتظبط والاحتراق مايتم بالكامل علشان كده انصحك اشتريلها بوجيهات سن قصير علىشان مايلحقها الزيت

قلت ابشر واطلع على محلات قطع الغيار بمكه الفلف فيها ماحصلت بوجيهات سن قصير واروح جده صناعية شبك المطار 

الفلف الفلف الين حصلتها بالعافيه اخذت البوجيهات ورحتله 

صاحبنا ركب البوجيهات وشغل ونفس المشكله تفتفه وضعف بالعزم

طبعا انا كرهت السياره والورشه واللي شغالين فيها وكرهت نفسي 

يعني القطع اللى قلتوا عليها جبتها واتعطلت كام يوم ومصاريف ولا فيه اي حل 

والملعون اللى اسمه الكمبيوتر مصر على ان كويل 3 و 4 ماهم شغالين 

المهم صاحبي قالي شوف ترى الماكينه شكلها مره منتهيه حتى البوجيهات السن القصير يطلعلها زيت وماتشتغل

لازم من التوضيب

اوف توضيب علشان تفتفه الصراحه الكلام مادخل راسي واخذت السياره من عنده ومشيت

كلمت واحد جزاه الله الف خير وعلمته بالمشكله 

قالي شوف انا باعطيك رقم واحد تروحله وماشاء الله شاطر وفاهم وعن تجربه

كلمت الرجال ووصفلي مكانه ورحتله

طبعا الرجال من اخواننا الافارقه صراحه مادري نيجيري او غاني وشغال في برحة سيارات ولا عنده ورشه

يعني بصراحه الوضع يخوف احسه ماهو فاهم وبيضيعني

لكن كلام الرجال اللى دلني عليه والسياره اللى كان شغال فيها طمني شويه كان شغال في لكزس جي اس يمكن 2006 وفوق 

المهم علمته بالمشكله وشاف السياره بسرعه وقالي على المغرب برد لك خبر وان شاء الله يصير خير

مشيت من عنده وفعلا كلمني قبل المغرب وقالي ضفيرة الثلاجه عندك خربانه معظم الاسلاك مجرحه ومتلامسه ولازم تتغير

قلت خير وروحت على التشاليح اخذت الضفيره ب250 ريال ورحتله ركبها والسياره ماشاء الله صارت تمام ولا تفتفه والعزم اتحسن مره ما تحسها ضعيفه

الزبده في الموضوع ياخوان 

ان الكمبيوتر ما طلع العيب غلط لا هو طلع العيب صح لكن الفني اللى ماسك الكمبيوتر ماهو فاهم

يعني بيقلك كويل 3 و 4 ماهم شغالين وغيرتهم ولا اشتغلوا تروح تقلي البوجيهات لا الماكينه لا مادري ايش وتخسرني مال ووقت في الفاضي

طيب شوف الاسلاك اللى رايحه للكويلات يمكن واحد فيهم مقطوع ولا متلامس يعني اساسيات الكهربا مانت عارفها وتفتي 

هذا مثل اللى عنده تلفيزيون او اي جهاز كهربي ويبغاه يشتغل بدون مايركب الفيش في الكهربا

كشف الكمبيوتر اذا ماكان مع فني او كهربائي فاهم شغله زين بيورطك ويخسرك فلوس على الفاضي

لان الكمبيوتر ما بيحدد العطل بالظبط بيحدد المنطقه اللى فيها العطل وبعدها بيجي دور الفني وشطارته وخبرته في تحديد العطل بدقه

اتمنى اني اكون نقلت تجربتي بوضوح 
واتمنى انها تفيدكم في تعاملكم مع السباكين









إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ياأخي الكريم
المشكلة ليست في فحص الكمبيوتر الفلبيني اللي فحصها غبي
عندك سلندر 4 و 3 لاتعمل تبدل كويل رقم 4 مكان رقم واحد اذا اشتغل معناته العطل ليس من الكويل كذلك تبدل البخاخ والبوجي من رقم 4 الى رقم 1 واذا اشتغل معناته المشكله ليست كويل او بوجي او بخاخ
ثم نبدأ بفحص وصول الكهرباء للكويل والبخاخ بواسطه جهاز الافيومتر
في حالة عدم وصول الكهرباء للكويل او البخاخ نبدأ بفحص الظفيرة وكبيوتر السيارة


up 17 down 0
دكتور مرسيدس 110
قبل 5 سنه و 7 شهر



الكمبيوتر ما يعطيك العطل 100% يعني مشكله حساس الاوكسجين ( الشكمان ) الواحد يغيره و يركب وصله ووو و في النهايه المشكله تكون من الفيش حق الاحساس على رواسب و يحتاج تنظيف لانه يسبب قصور في الكهرب فا دايما افحص الشي الليي اعطاك اياه الفحص و افحص مرتين بشرط ان الاجهزة تكون مختلفه و اذا طلع لك العطل افحص قبل ما تغيره


up 2 down 0
khalidoo 1167
قبل 5 سنه و 7 شهر



اخوي مو شرط في كل الاحوال الكمبيوتر غلطان تراه له ايجابيات اكثر من سلبياته
كانت عندي تفتفه في الاكسبديشن وفحصتها كمبيوتر طلعلي كذا رقم للكويل العطلان وعزم السيارة ميت
طلعلي تقريبا ٤ كويلات خربانه
ورحت التوكيلات وغيرت طقم كامل ٨ كويلات علشان لا تختلف قوة الكهرباء في المكينة
وصارت السيارة افضل من قبل بمراحل صارت تفز فز من عزمها ماشاء الله
وترى الاخوان الافارقه لا تستهين فيهم تراه معلمين
خاصة في تربيط السيارة 


up 1 down 0
t o m a h a w k 758
قبل 5 سنه و 7 شهر



الكمبيوتر  حدث معي ومع الزملا
جمس موديل ٢٠٠٦ يمشي ويطفي قال غير طرنمبة البنزين 
وغيرناه بدون فايدة اخيرا قرر الكمبيوتر ان الموتر مخبط
وجينا ورشة فيها عامل بسيط قال هذا فلاتر الشكمان
وفكهن وظبط الموتر
ومرة قي اكس ار ولعت كل لمبات الطبلون وقال الكمبيوتر 
حساس قيمته ١٨٠٠ المهم رحنا كهربائي قال هذي فحمات الدينمو
وفعلا غيرهن وظبط 
انا ماانكر ان الكمبيوتر ماله داعي بس يمكن اللي يفحصون
عليه ماهم فاهمين او غشاشيين يلهفون عليك فلوس وبس



up 1 down 0
باترول 2020 2623
قبل 5 سنه و 7 شهر



اضيف على كلام الاخوان ..
احيانا نفس اللي ماسك جهاز الفحص مايعرف انجليزي ..مجرد مايشوف كلمه يعرفها يقول : بس هي هاذي وينسى ان كلمه وحده تغير السالفه  اعطيك مثال ..احيانا يطلع معك في الفحص حساس كام شافت بانك ون ..معناه الحساس نفسه عطلان واحيان يطلع نفس الكلام بس زياده عليه كلمة سيركيت او هاي سيركيت او مالفنكشن وكل وحده تعطي معنى اخر مابين ضفيرة الحساس او عطل مؤقت 


up 0 down 0
ibrahim alghamdi 216
قبل 5 سنه و 7 شهر



اخوي لو الورشة في مكة اتمنا تعطينا وصفها الله يجزاك خير


up 0 down 0
mohammed-1115 20
قبل 5 سنه و 7 شهر



اخي اطهر بقاع الارض مكان الشخص اللي كشف على السياره وعالج المزشكله في شارع جرهم خلف شرطة المنصور
هو من جنسيه افريقيه واسمزه محمد
لكن رقم جواله للاسف اتمسح من عندي لان الموضوع هذا يمكن من ثلاث سنوات
وان شاء الل بضيف صولاه من خرايط جوجل في الموضوع توضح مكان الورشه


up 0 down 0
toritto 357
قبل 5 سنه و 7 شهر



اخواني ترا الكمبيوترات انواع وعلى حسب السيارة وتراها تعتمد بالاول وبالخر على شطارة الكهربائي اﻷي قاعد يفحص


up 1 down 0
عبووود 99 99
قبل 5 سنه و 7 شهر



الكمبيوتر على حسب الشخص وعلى حسب نوع االكمبيوتر فيه ناس شاطرين زي فيه واحد حق كمبيوترات تركي على كانت السياره عندي ماتشتغل  فحصها وطلع حساس وغيره وضبطت  وكان شغله ميه بميه نوع السياره شفروليه  المره الثانيه جبت له لكزس وكانت نفس الطريقه ماشتغل وماقصر فحصها فحص كامل هو شغلها بس رجعت زي مشكله يوم وبدت ماعد تشتغل وديها للعضيب قسم ورشه وصلحوها  طلعت من قطعه كهربائيه متعلقه في كمبيوتر يعني بالعربي لا تعتمد على شخص  جرب شخص ثاني  مشكله كبيره اخر شي يطلع الحل ب5 ريال حبه فيوز   


up 0 down 0
سكودر 14927
قبل 5 سنه و 7 شهر