الثقافة بصيانة السيارة

56 36

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم التركـي 1066
قبل 8 سنه و 9 شهر

السلام عليكم ورحمة الله وبركاته

نتكلم بالبداية عن المستخدم بحالة حدث عطل معين 

البعض او الكثير يثق بورشة معينه يتعامل معهم من زمان حاط ثقته كلها فيهم

وكل ما أحد سأله تعرف ورشة مضبوطه قاله ايه ويرسله على خويه

ماهو شرط شخص تعرفه من زمان يكون ثقه 

ممكن صاحب الورشة هذا له سنين يلعب عليك وياخذ اضعاف المبلغ وانت ما تدري

وانت من زود الثقه تنزل السياره وتمشي ويقولك جيب القطعه الفلانيه او انا اجيبها

وتحاسبه عليها وتكون تجاري وياخذ منك قيمة اصلي

او ما تحتاج تغيير تحتاج اصلاح فقط وياخذ منك قيمة اصلي

وحتى لو تبقى عنده وتشوف شغله ممكن يغيرها يركب لك جديدة والقطعه القديمة حقتك سليمة

ما تحتاج غيار كامل مثلا ويستفيد منها

مثل دينمو السياره قد يحتاج بأغلب الاحيان فحمات فقط سعرها العادة الاصلي حوالي 45 ريال

ولكن يطلبك دينمو كامل يكلفك حوالي 1600 ريال اقل او اكثر حسب نوع السياره

وانت تجي مبسوط تشغل السياره وتشوفها مضبوطه تقول بس هذا الشغل السنع

طيب غيرت القطعه جديدة اكيد بترجع السياره سليمة يعني ماهو من شغل الميكانيكي او الكهربائي مضبوط

هذا من القطعه اللي غيرتها كاملة وهي ما تحتاج اصلا

ويجي واحد بعد اسبوع اسبوعين عنده الدينمو نفس الشيء محتاج كتاوت او فحمات

ويبيعه حقك القديم بنصف السعر مثلا 800 ريال

يقوله جيب جديد ولو ما تقدر عندي واحد نظيف واضمنه لك وطبعا يقدر يضمنه  3شهور او اكثر

لأنه يعتبر شغال مافيه شيء

وانت كمستهلك بتجي تحسبها وتقلبها برأسك تشوف انه جديد 1600 ولا عندك امكانية تشتريه حاليه

وتشوف 800 مبلغ حلو جاهز قدامك ومضمون بدل التشليح 3 ايام هنا مضمون 3 شهور

تبي تشتريه وانت مبسوط ويكون راعي الورشة

لعب على الزبون الاول والزبون الثاني نفس الشيء استفاد منه مبلغ كبير حتى لو يقوله

اركبه لك مجانا ما عنده مشكله واستفاد من الدينمو القديم حقه يغير له فحمات ويلعب على 10 غيركم

ورشة ثانية

محل شكمانات

الاعضاء اللي يدخلون المنتديات يعرفون ان الرصاص له قيمة ويباع

ولكن الشعب بالشوارع وش عرفها ممكن اقل من 1% عنده علم بالشيء هذا ويدخل منتديات

او سمع من احد معين ان لها قيمة الرصاص ويباع بقيمة غاليه

ولكن يروح محل شكمانات يبي يفرغ الرصاص

راعي المحل لو تجي تقوله بلاش بيوافق

وتحصلهم يعطونك ارخص الاسعار عشان يسمكونك عندهم

لانه لو اتفق معك بمبلغ 50 ريال

راح يستفيد من دبة الرصاص الوحده اقل شيء يبيعها بمبلغ 300 ريال

يعني الفايدة منك 350 ريال غير الشخص اللي راح يبيعها له بياخذ منه قيمة التركيب بعد

وتجي انت مبسوط تقول رحت لورشة ضبط الشكمان والحراره فرقت معي والصوت افضل

و من هالكلام وانت ملعوب عليك وانت على نياتك

هذي الاشياء اللي اشتغلها وشفتها بعينك ولكن لعب عليك بالسعر

بعض الورش يلعب عليك بشيء ثاني وحصلت معي وتهاوشوا 2 بورشة وحده وصلت شوي ويتضاربون

كان معي شبح 96 واخذها واحد من الشباب ورجع لي المرتبة راجعه للاخير

والشبح ماشاء الله كبير لو المرتبه راجعه ما تقدر تسوق لازم تحط شيء وراك

المرتبه ترجعها تسمع صوتها وتكتها واضحه الكهرباء واصل

الظهر شغال المقعد نفسه يرتفع وينزل كل شيء سليم ما عدا انها ما تتقدم

اتجهت للصناعية وعلى اخصائي مرسيدس كم واحد كلهم يقولون تحتاج تغير الخريطة

اللي هي قاعدة الكهرباء تحت المرتبة قالوا مثل الشريحه تخرب جزء وبعدها تحترق كاملة

ما ادري كم سعرها جديد ولكن قالوا لي 1200 متوسط السعر اللي اذكرة مع التركيب

واحد جلست انا وياه مكاسرة بعدين قالي خلاص اترك السياره لانها بتحتاج وقت

وبالليل تعال خذها كان وقتها العصر

قلت له محتاج السياره والمبلغ اصلا ماهو متوفر معي بجيك بكره او بعد كم يوم

وانا طالع جاني واحد ثاني شغال بالورشة 

طلعوا متشاركين كم واحد بالورشة وكل واحد يدفع جزء من الايجار وكل واحد يشتغل على كيفه

يعني السياره اللي يشتغل فيها ياخذ شغل اليد له

المهم جاني الثاني قالي مشكلتك حلها بسيط احلها لك وانت واقف 

ولكن نتفق اول 

قلت هات اللي عندك قال 100 ريال ومالك دخل وش اسوي حتى لو دقيقه واخلص

تسلمني الفلوس اللحين واسويها لك وتروح من عندي وهي شغاله

قلت له يلا شافني الاول اللي اتفقت معاه على اساس اجيه من بكرة اطلع الفلوس جانا يركض

ويتهاوش مع خويه يقول هذا زبوني و بيجيني بكرة كيف تاخذ زبوني مني وقاموا يتصايحون

قلت للاول يا اخي بطلت ما بجيك بتنصب علي 1200 ريال وتقول زبوني

ركبت السياره وجيت امشي بطلت اجيهم كلهم والحسد اللي بينهم

وانا ماشي جاني ابو 100 ريال قالي ما بخسرك ولكن شايف اللي حصل ما اقدر اشتغل قدامه اللحين بالسياره

ولكن تحصل فيوز بالشنطه ورى محروق غيرة وخلاص

قلت طيب يعطيك العافية ومشيت

قدمت شوي بالصناعية نفسها ووقفت عشان ما ابعد شيكت على الفيوز فعلا محروق

حطيت الاحتياطي واشتغلت تمام

رجعت للورشة ناديت ابو 100 وبعطيه الفلوس قلت له حليت المشكله على شورك

اخذ 50 ورجع 50 من نفسه قالي خلاص ما يحتاج ولو اخذ 100 كاملة ماهي خسارة عليه

ورشة ثالثه زيادة انهم يلعبون عليك يخربون موترك بعد وهذي حصلت من كم يوم

قبل سنه او اكثر حصلت عندي تفتفه باللومينا ورحت الصناعية عند مركز خاص فقط كمبيوتر

ما عندهم صيانه فقط كمبيوتر فحص وزحمة عليه 

فحصها وهي واقفه ما طلع شيء قلت له التفتفه والسياره تمشي 

طلعنا مجرد ما وصلنا ممكن سرعة 60 طلع معاه كويل ضعيف وطلع رقمه

وعطاني تقرير مطبوع بالشيء هذا بصورة العطل وكل شيء

جيته قبل اسبوع بالاكسبديشن وعشان ما يبي يضيع وقته يطلع يجرب 

والسياره واقفه الله لا يوفقه عشقها وداعس فرامل ويدعس بنزين يبي الضغط يرتفع

يوصل يعني 3 او اكثر عشان توضح التفتفه وهنا بتأثر على القير والمكينه بشكل كبير

يعني تطلع والسياره طبيعي وتدعس لها كامل الدعسة اهون من تدعس ربع الدعسة وانت ماسك فرامل

وانقز بحلقة اسحبه الله يلعنك يالحمار وش تسوي

قال عادي ما يجيها شيء وعلى كيفك ما يجيها شيء

قالي خلاص طلع العطل عندك كويل رقم 5

قلت فارق بس انزل واركب السياره ويبي فلوسه بعد 

يعني 100 ريال لكن يتعب سيارتك بالقير كامل وممكن يضرب بنفس الوقت

يعني لو ما لحقت عليه بيجلس ماسك فرامل والسياره معشقة ويدعس فيها حتى تطلع المشاكل

رجعت البيت ما عاد سويت شيء

وقبل كم يوم العضو الخالدي الله يعطيه العافيه قالي حساس الماف نظفه وتروح التفتفه

وفعلا نظفته وراحت لا كان كويل ولا شيء
____________________________________

نجي للسيارات الجديدة كلمتين ونخلص

خير وش عندك تطلع سياره من الوكالة واشغلتنا كل شوي رايح دافع 400 و 500 حقت صيانة

والسياره سليمة هههههههههههههه

إبلاغ

الردود