المصداقية في البيع والشراء

24 29

لايمكنك التصويت حتى الحصول على 20 نقطة على الأقل
إضغط هنا للإخفاء

التركي 1403 17
قبل 8 سنه و 7 شهر

السلام عليكم ورحمة الله وبركاته

الفترة هذي ادور لي كابرس رويال من موديلات 2007 او 2008

أهم شيء يكون 4 غيارات 

بالله ما احتاج تعلقياتكم 6 غيارات افضل وكلام فاضي

الفرق بين موديل 2008 و 2009 حوالي 15 ألف كله عشان القير 6 غيارات

والاداء واحد و 4 غيارات اقوى عزم واقل تكلفة بالصيانة 

يعني 6 غيارات لافيه تحسن ولا شيء اللي يقول 4 غيارات ما يتحمل وكلام فاضي

يحتفظ برأية بنفسة شيء ما جربته لا تتكلم عنه

المهم نكمل موضوعنا

حصلت موديل 2007 بمكه فل يقول بإسمه وكالة و العداد 127 ألف

حسب كلامه بالاعلان انه ما جاه رش ابدا وحالته ممتازة جدا 

المشكله كلمته على الجوال يقول بتاخذها تدعي لي 

كيف العضلات يقول حقت بلدها ممتازة

حقت بلدها يعني منتهيه لها سنوات قال لا ما عليك متماسكه طيب مو مشكله

السوم حسب ما اشوفه قدامي 27 ألف وهو يقول مسيوم 31 ألف قلت افرق السوم 500

قال طيب تعال ونتفاهم 

رحت له طلع لي السواق على الشارع العام عشان يدلني الطريق

مشيت وراه حتى وصلنا الا ماشاء الله ساكنين بقصر يعني لو تصدق بالسيارة ما هزت من ميزانيته شيء

لقيت كابرس واقف برى لكن ما اعطيته اهتمام لأنه غير عن اللي بالاعلان فما يلزمني ادقق فيه

انتظرت شوي جاني ومعاه المفتاح تشوف شكل المفتاح يرثى له رايح فيها شكلهم حاطينه

للكلاب يلعبون فيه ويعضونه من كل مكان

وين السياره توقعتها بالحوش واقفه قالي هذي هي يأشر على اللي برى 

وين ماهي نفس اللي بالاعلان قال الا هي 

اللي بالاعلان سليمة ووقفتها حلوه هذي رايحه فيها تقول ماهي مرشوشه

بدون ما ادقق فيها من بعيد صدامات LS وبدون ازياق وواضح مرشوشه من كل مكان

قربت منها الا رشات واضحه حتى الابواب الجلد مرشوشه معها اقوله تقول مافيه رش

قال لا بس الابواب طيب الرفارف الامامية سمكرتها دايخه وواضحه والشمعات ماهي موزونه

والاسطبات الخفية والشمعات الامامية كلها مكسرة الاربعه وداخلها طين بدل الغبار

افتح الباب يا ساتر قسم بالله شيء يسد النفس

الشماعات كلها مخلعة ومرمية ورى والمراتب واضح على حقت السواق خاصة

ان السياره ماشيه فوق 400 الف ومرجع عدادها 

ركبت شغلت السيارة سحبت الباب بسكره حتى مسكة الباب مخلوعة يا ساتر

شغلت نصف اللمبات طافية بالطبلون و حقت المسجل والشاشه محروقه نصها

صوت  السياره ناعم شغلنا المكيف عشقت و مشيت تبديلات القير ممتازة 

دعست لها عزمها حلو وصوتها حلو

المكيف وسط ماهو بارد 

الزجاج الامامي مكسور كامل من فوق لتحت ولا فيه مرايه مخلوعه

رجعنا افتح الشنطه والكبوت واضح حوادث قوية ورايحه فيها

قلت له وين تقولي مافيه سمكرة ولا شيء يقول بس هنا شوي وهنا شوي

مافيه شيء اسمه هنا شوي وضح كل شيء بالاعلان ونزل صور توضح العيوب

عشان السوم يجي على الواقع ما يجي على شيء نظيف

قلت له بصراحه اسوم 12 هذا حقها وكثير عليها 

انا اسوم مكينه و قير الباقي يخلف الله ما يسوى شيء حتى تشليح ما احد يبيه

مسوي انه زعلان ويقول مسيوم 31 واللي سامه طبعا ما يدري عن عيوبه مثلي

مشيت وخليته ورجعت البيت ابي ادخل الاعلان بكتب فضايحه كلها لقيته حذف الاعلان

ما ادري وش بتغنية الفلوس اللي بتجيه وهو الحالة المادية فوق الممتازة

و يقول ما عندي نية ابيعه لكن ابوه شرى له سياره جديدة واستغنى عن الكابرس

2 BMW موديل 2015 واقفه عند الباب يقول وحده لي ووحده لأخوي 

والصور طلعت اعتقد لها 5 او 6 سنوات قديمة لان بالصور نظيفه وبالطبيعه رايحه فيها

اقلها الشمعات مكسرة والاسطبات والصور سليمة
________________________________________


كابرس ثاني 2008 رويال بجدة ماشي حوالي 173 الف

كاتب بالاعلان محتاج شوي شغلات ما وضحها وكاتب جاته ضربه على الباب و بالوجه بس بسيطه

رحت شفته واضح على وقفته ماشاء الله حلو 

لفيت على السياره من الخارج ممتازة اشوف وجه السياره حالته ممتازة فيه شوي تشهيب على موديله حلو

افتح الكبوت ابي اشوف اثر الحادث ماله اثر ومن التشهيب واضح الحادث قديم

يقول قبل 6 سنوات الحادث و صلحه بالوكالة ما فيه سمكره غيروا الشمعات و الصدام والكبوت

يعني هذي أمانه من عنده ذكرها والا مافيه اي اثر للحادث

ركبت السياره وضحها الداخلي 95% ممتاز يحتاج تنظيف بس قال انا اتكفل بالتلميع

اسلمك السياره نظيفه 

طلعت جربته متماسك وممتاز بس لو دعست كامل الدعسة عزمه شوي ضعيف و الحراره توصل الثلث

شوي وترجع تنزل وراعيه عمره بالخمسين تقريبا اعتقد ما عمره دعس له 

لكن ما اتفقنا على السعر والا هو يستاهل
____________________________________________________

كابرس ثالث 2007 رويال

بالاعلان ان كل شيء شد بلد وممتاز ما فيه مشاكل ابدا

رحت شفته نفس الحكايه صدامات LS  

الشمعات مغيرة وتجاري واضح عليها يقول راعيها الاول كان مركب زينون

وعلق علي الزينون وغيرت الشمعات ما ادري وش دخلها بس نمشيها هههههههههههههه

وضع السياره استخدام داخل جده ولا تضمنها ما ادري وش عليه المدح كله

الواحد ما ادري ليش ما يوضح العيوب

ولو جيته يقول مسيوم قدامك بالمبلغ الفلاني

طيب اللي سام على اساس السياره نظيفه لو تنزل عيوبها كان طاح نصف سعرها

تعبت من موقع حراج والنصب اللي فيه مالي الا انزل المعارض افضل

او اشوف اللي معروضه بالشوارع اقلها تشوفها على الطبيعه وتسوم على شيء قدامك ما تتعب نفسك

إبلاغ

الردود