الكابرس شنبرت مكينته وبعته .. وشريت سيارة نادرة بالمملكه

6 10

لايمكنك التصويت حتى الحصول على 20 نقطة على الأقل
إضغط هنا للإخفاء

ليزو 481
قبل 9 سنه

السلام عليكم ورحمة الله وبركاته
كيفكم يا شباب .. عساكم بخير 
الكابرس ال 2011 الي معي شنبرت مكينته .. الحمدلله على كل حال .. الشنبر اتوقع بسبب زيت مغشوش ..لاني غيرت المكان الي اشتري منه الزيت 
وبعدها مباشرة الموتر قام ينقص وصار الي صار 
فحصت ضغط الشنابر وطلع البستن الي مشنبر رقم 4 
ضغطه 110 << بداية شنبر ويعتبر يمشي فترة مو بسيطه 
وباقي البساتن امورها حلوة ماعدا واحد 130 ضغطه .. 
المهم نزلت السوق جابلي خسارة ماهي بسيطه لكن الشكوى لله .. الخسارة بالعمر ماهي الفلوس 
طبعا بتسألوني ليه ما وضبت وليه ما غيرت المكينه 
صراحه المكينه الي عليها الكلام ممشى قليل ونظيفه ما تقل عن 11 الف ريال 
وتوضيب عليه الكلام من شنابر اصلية وتقميص اذا احتاج الامر < ماكان لي خاطر اخرط لان مخارطنا تسود الوجه
وسبايك وطقم وجيه وصنفرة رؤوس وشغل يد .. غير اني راعي قومات مستحيل ارجع المكينه ستوك لابد ادفها بكام صغير 
بيكلف علي حدود 10500 
قلت يارجال افتك مرة وحده .. وخسرت لكن العوض على الله 
المهم 
ابتدأت رحلة البحث عن سيارة .. وكان براسي كابرس مرة ثانية < ما انطحن الحب الي براسي 
دورت دورت دورت مالقيت شي يناسبني الا عند رجال اجودي بالقصيم .. اعطيته سومتي والصدق اني كسرت بقيمه موتره بحكم انه ميزانيتي محدودة مرة كانت 
والمهم قال لي اذا ما جاني زبون صامل غيرك كلمتك 
مر يوم يومين لقيت اعلان لسيارة طول حياتي اتمنى املكها ..
TBSS 
او تريل بليزر اس اس 
للبيع بالرياض 
والله وادق ع راعيه ونتفاهم .. واجيه من الدوادمي للرياض واشوف السيارة .. الحمدلله عجبتني وتفاهمنا وشريته 
بس للحين ما استلمته في مشكله بنقل الملكية ..
للي ما يعرف التريل بليزر اس اس 
سنوات انتاجه 2006/2009
مكينه LS2 حوالي 395 حصان
قير 4 نمر <<< الله يستر منه -_-
يجي بمواصفات حلوة " فتحه سقف - تسخين مراتب - حفظ وضعية مراتب - شاشة نفقيشن < ماعندي - جلد وشامواه - جنوط 20 - بدي كت رياضي - يايات رياضية - مكيف الكتروني ومواصفات ثانية حلوة بالنسبه لموديله"
يجي منه اصدار ss1 \ ss3 تختلف بالمواصفات .. ويجي منه دفع خلفي ودفع رباعي مستمر 
طبعا الجميح والعيسى والطقة ذي ما جابوه
ما يجي الا وارد كندا < نفس الي عندي = عداد بالكيلو
او وراد امريكا = عداد ميل
ما في منه بالمملكة الا قليل جدا جدا
انا شفت بالرياض حوالي 4 او 5
اثنين فضيين وواحد اسود وواحد ابيض وانا الخامس

المهم 
الي ودي اوصله كم شي 
اول شي ك بشر نزعل لما نخسر شي غالي علينا او تعلقنا فيه وحبيناه .. لكن الحمدلله عندنا رب كريم ما ياخذ شي الا يعوضنا بالي احسن منه 
الحمدلله الكابرس شنبر وهو ما جلس معي 3 شهور وكم يوم .. وخسارتي حدود 15 الف ريال لكن بإذن الله ان الله عوضني بالي ازين منه 
ثاني شي انتبهوا انتبهوا من الزيوت المغشوشة .. وياريت تخلي تعاملك مع محل واحد متعود عليه وعلى بضاعته النظيفه .. انا تبهذلت من ورا هالنقطه .. وناسي بالزبط من اي محل شريت لكن اذا كان غشني الله لا يبارك له ولا يحلله ويلقاها باغلى ما يملك

هذا الي حبيت اقوله 
والسلام عليكم ورحمة الله وبركاته 

إبلاغ

الردود