ضغط الزيت منخفض اطفى المحرك تم حل المشكلة

11 1

لايمكنك التصويت حتى الحصول على 20 نقطة على الأقل
إضغط هنا للإخفاء

ms3al 1784
قبل 7 سنه و 5 شهر

سلام عليكم ورحمة الله وبركاته
صبحكم/مساكم الله بالخير

الموضوع يا جماعة الخير
ان الوالد جاي من تبوك للمدينة
قبل المدينة ب200 كيلو طلعت له رسالة في الطبلون(ضغط الزيت منخفض اطفئ المحرك) وامبير ضغط الزيت طاح للصفر وولعت لمبة المكينة
جنب الوالد وطفى السيارة مباشرة
بعدها ب 5 دقايق شغلها واشتغلت تمام طبيعي والضغط حق الزيت فوق النص
بس يبدأ ينزل تدرجيا حتى يوصل لل0 وتولع لمبة الزيت
واخذها بسطحة وعلى ورشة معروفة بالمدينة (بحكم انهم خبرة لكن الله المستعان)
حضرنا عنده بعد صلاة العشاء

وراح الوالد يسولف مع المهندس
انا رحت على سيارتي وجبت قطعة ال obd وفحصت الافلانش
طلع لي كود p0521
بحث في النت عن معنى الكود طلع لي
Engine Oil Pressure Sensor
حساس ضغط زيت المكينة
ورجعت للمهندس بشوف ايش عنده
اسمعه يقول للوالد المكينة مخبطة ولازم لها توضيب
انا انصدمت
لأن الوالد من النوع المحافظ جدا والسيارة ما يعطيها لأحد وسواقته هاديه جدا
والزيوت في وقتها ويستخدم اللزوجة الصحيح بعد 5w30 واحيانا 10w30

رحت تفاهمت معاه ووريته الفحص حقي
يقول فحصك عادي وما يبين كل شي
قلت له طيب جيب فحصك راح يدور في الاوراق وجاب فحص السيارة ونفس العطل الي ظهر عندي ظهر عنده
طيب؟؟!
ايش دخل المكينة
يقول: المكينة اصلا فيها تبخير( الوالد عمره ما اشتكى ان الزيت ينقص )
حتى بعد ما خرجنا من الورشة
سألت الوالد: انت ينقص الزيت عندك
قال لي:لا
اخر شي صار بيننا وبينه
يقول جيبوا لي طرومبة زيت وكتب لنا قائمة فيها قطع
وشغل يدي 1800 ريال!!
على ايش ؟؟

الزبدة يا اخوان انا ما اقتنعت بكلامه وشايفه شيخ السباكين

السيارة يا اخوان ما فيها اصوات لا طقطقه ولا تكتكه ولا في اي صوت في المكينة
وصوتها ناعم جدا حتى والضغط على 0 ما تسمع لها صوت
وما فيه ريحة حرق في العيار

وبعد البحث في النت لقيت في ناس تقول ان فلتر الزيت ممكن يكون مضروب ولو كتبتوا الكود في قوقل يطلع لكم مقطع راعي امبالا
غير الزيت والسيفون وانحلت المشكلة

وفي الردود لقيت واحد معاه سلفرادو يواجه نفس المشكلة
حط في المكينة زيت قير وخلاها 10 دقايق وغير الزيت والسيفون واختفت المشكلة
ولقيت مقطع يقول غير حساس ضغط زيت المكينة

فانا احترت

هل من الممكن انه تكون طرومبة الزيت ضربت ؟

انا افكر اغير
الزيت والسيفون والحساس
انتم معي في ذا الشي ولا ممكن ما تضبط
ننتظر اقتراحتكم


تحديث للموضوع

جيتكم بالجديد
وتم حل للمشكلة ب150 ريال 
100 ريال فحص الكمبيوتر و50 ريال شغل يد 
بعد البحث في المواقع الاجنبية لقيت واحد يعاني من نفس المشكلة 
وهي انه الضغط ينزل للصفر وصوت المكينة عادي جدا والكود الي طلع له نفس الكود الي طلع لنا 
وكانت المشكلة انه في شخال صغير جدا يجي تحت حساس ضغط طرومبة الزيت 
وبالفعل خرجنا الشخال ونظفناه ورجعناه ومشينا بالسيارة لمدة ساعة و40 دقيقة والضغط افضل من اول بكثيير جدا 

إبلاغ

الردود