غسيل المكينه و إهمال غيال الزيت

66 52

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم التركي ابوعبدالله -131
قبل 7 سنه

السلام عليكم ورحمه الله و بركاته

حبيت أوضح شغله بس

عارف كثير من الاعضاء بمجرد يشوف لي رد او موضوع يعرف أني لا زلت على قيد الحياة

كأني واقف على قلبه و تجيني ديسلايكات كثير ما يهم اللايك و الديسلايك طالما اقدر اشارك و اكتب ردود

و لكن هذا توضيح فقط للي يجي عن طريق قوقل البعض يستفسر و يطلع له موضوعي

يشوف ديسلاكات كثير يتوقع كلامي غلط و يصرف النظر عن الموضوع

حبيت أوضح فقط للي جاي من قوقل أن كلامي تجارب شخصيه ولا خلاف عليها

و جميع مواضيعي بالعضويات السابقه ديسلايكات كثير ولكن تجي للردود مافيه انتقادات

او انه يصحح معلوماتي هذا دليل كلامي صحيح ولكن الورعان واجد يحط ديسلايك وهو ساكت

نبدأ بالموضوع

اللي ما يعرفني

السيارة لومينا 2008 مكينه 6 سلندر

التعديلات فك دبات التلوث و اللغاء البلف تجي تقول يضر السيارة لها 3 سنوات من فك البلف

ما ضرها و لا شيء و لا زالت بحاله ممتازة بحكم سكني بجده

و اكيد بباقي المناطق بالشتاء يضرها و ممكن ما ينتهى الشتاء الا هي خبطت

الممشى حوالي 400 ألف

غيار زيت المكينه احط زيت ابو 5 الاف العادي

امشي عليه ما بين 15 الى 20 ألف

و أحيانا امغطه الى 25 ألف ولا كنت أشوف فيها اي ملاحظات

و لكن بعد تغيير الزيت يختلف شوي عزم السيارة للأفضل فترة و يرجع طبيعي

البواجي غيرتها اول ما شريت السيارة على ممشى 120 الف و لحد الان ما غيرتها ابدا

الحراره قبل فك البلف كانت تتراوح ما بين 98 بالخط الى 105 داخل المدينه

بعد فك البلف بالصيف بالظهر 84 سواء خط او مدينه و بالليل تنزل الى 78 اغلب الاوقات

كثير من الناس يهتم بغيار الزيت اول بأول و رغم ذلك تخبط السيارة و يقول محافظ عليها

قد يكون الزيت مغشوش او السيفون مغشوش و هذا السبب

لأني قرأت ردود و مواضيع كثير يقولك الزيت اغيره على 3 الاف و تخبط و هذا مستحيل

لو الزيت اصلي

و احيانا بعض الناس ما عنده خبرة كافيه بالسيارة فيه بعض الملاحظات او المؤشرات

تدل على انك يجب اصلاح عطل غير واضح بشكل مباشر و سريع و الا بتخبط السيارة

بعضهم فعلا يغير زيت اصلي و كل شيء تمام و الحراره عنده تمام و تخبط بدون سبب واضح

حتى الميكانيكي تروح له يقولك صلبت الميكينه او تحتاج توضيب بدون ما يعرف السبب الحقيقي

غالبا تكون من طرمبة الماء اصبحت ضعيفه و تعطي بالطبلون الحراره طبيعيه

هذي الحراره بالرديتر ولكن المكينه مولعه بسبب ان الماء ما يتحرك بالشكل المطلوب

و عند تغيير المكينه او التوضيب يغيرون كل شيء من ضمنها طرمبة الماء وهو ما يدري عنها

من مؤشرات خرابها مثلا بعض الانواع تطلع لها صوت ونه و بعضها خرفشه

و بعضها بدون اي صوت ولا شيء ولكن بعد ما تاخذ كم مشوار الحراره طبيعيه

توقف تطفي السيارة ما بين دقيقتين الى 10 دقايق ترجع تشغل تحصل الحراره اعلى من الطبيعيه

ثواني بسيطه و ترجع طبيعي و تحصل ثقل بالتشغيل غير اذا كانت بارده

هنا اعرف ان المكينه حاره اكثر من العداد بالطبلون

الشيء الاخر شيك على الخراطيش العلوي و السفلي واذا فرق الحراره بينهم بشكل واضح

اعرف ان الطرمبة فيها مشكله تتركها فترة تخبط حتى لو محافظ على الزيوت و كل شيء

نجي لنقطة تأخير غيار الزيت

اصبحت اترك الزيت الى ما بعد 20 ألف حتى طلع صوت ونه بالمكينه خصوصا و هي بارده

مثل صوت زيت الدركسون اذا كان ناقص و الصوت مسموع وواضح حتى وانا امشي بسرعه 60

و الصوت من داخل المكينه

غيرت الزيت ما راح الصوت ممكن خف بشكل بسيط فقط بعد ما مشيت اقل من 1000 كيلو

فجأة طالع من محطه السيارة ما فيها استجابه ثقيل عزمها كثير

وقفت عند اشارة ولعت لمبة الزيت و اذا مشيت تطفي

طبعا فيه مؤشرات ثانيه هي اني اول ما اشغل السيارة من ثقل الزيوت المتراكمه بالمكينه

لازم اكون داعس بنزين و الضغط 1 و نص او تطفي السيارة

حتى لو كانت حاره مجرد ما اوقف دقايق و ارجع اشغل تفتفه و تطفي لازم ادعس لمدة دقيقه كامله

و اذا ابي امشي و انا داعس بنزين اعشق و امشي عشان ما تطفي يعني معاناة

تجي لميكانيكي يقولك البواجي قديمه ما تعطي كهرباء ولا يحترق البنزين و كله كلام فاضي

لانه بعد دقيقه تكون صافيه و كل شيء طبيعي و هذا نتيجه ان الزيت الثقيل يرجع يسكر الشخال

و الصوت بسبب ان الزيت ما يوصل لكامل المكينه

معليش على كثر الكلام و الشرح لان كثير يجي عن طريق قوقل بيستفيد من المعلومات

و يقارن المشاكل عنده بالسيارة و يحصل الحلول

المهم معي كابرس 2010 وقت ما ولعت لمبة الزيت باللومينا

كنت رايح سوق الصواريخ ادور دينمو للكابرس لانه خرب

رحت للصواريخ و رجعت و السيارة نفس الشيء خامله ولا فيه تجاوب او عزم مره

و لمبة الزيت تولع كل شوي

رحت صناعية بني مالك سألت كم ورشة ابي اغسل كارتير الزيت

لانه مع تراكم الزيوت القديمه ما عاد ينفع الا فك الكارتير و غسيله بالبنزين

و لكن لان الكارتير كبير و تأخذ 7 علب زيت لازم من رفع المكينه و شغلتها ساعات طويلة

و تكلف ما بين 1200 الى 1500 ريال

عندي علبة غسيل مكينه لها 3 سنوات مرمية بالبيت كنت ماخذها من ساكو

ولكن بعد ما اقرا مواضيع الناس غسل المكينه و خبطت بعد فترة اتخوف و اقول لا اتعبث بالسيارة

و هي سليمه و تخبط و اندم اني استعملته

ولكن الان لابد من استعماله لانها كذا كذا المكينه رايحه

و اساسا كل ما اغير زيت سابقا الزيت ينزل ثقيل بدرجة ما تتصورونها و السيارة حاره

الزيت ينزل كأنه بارد ثقيل و له صوت اذا نزل بالوعاء الخاص بالزيت تسمع صوته ثقيل

بق بق هههههههه تحس المكينه خلاص توها تتنفس

المهم رحت لبنشري عادي رغم اني دايما اغير الزيت عند احد فروع الجميح

و كل ما اروح اغير زيت سيارتي هي اقدم سيارة بين السيارات الموجوده

كلها سيارات موديلات 2014 و طالع وانا 2008 و جاي اغير عندهم دائما

المهم اللي مخطط عليه حطيت قارورة الغسيل و تركت السيارة دقايق شغاله

فضينا الزيت و حطيت زيت غسيل خاص 4 لتر صناعة سعوديه لقيته عند البنشري

يعني غسيل مرتين ورى بعض

لان مره ما تكفي و كان ودي اسوي ثالثه بعد

المهم حطينا زيت و سيفون و شغلت السيارة صوتها رجع طبيعي و ما يحتاج ادعس بنزين

مافيه تفتفه ولا شيء ابدا

مشيت من عندهم عزم السيارة خفيف و فرق عن اول بكثير ذكرني بالسيارة قبل 4 او 5 سنوات

تجاوب سريع و خفيفه من زمان ما شفت التجاوب هذا منها

لها حاليا 1000 كيلو تقريبا

لازلت ابي انظف المكينه بشكل اكبر

المعروف جميع انواع المنظفات تحط الزيت تتركه دقايق و السيارة واقفه و يقولك لا تدعس بنزين

ولا تحرك السيارة و ترجع تنزل المنظف و تغير الزيت

رجعت حطيت من كم يوم عبوتين تنظيف و قلت بستخدم السيارة كم يوم ما بتركها واقفه

حسب النصائح المكتوبه 5 دقايق و تغير الزيت

قلت بخليها ايام او اقل شيء 200 كيلو بعدها اغير الزيت

رغم التحذيرات انه ما تحطه بالمكينه و تمشي بالسيارة

حاليا اعتقد لها 4 ايام ماشيه 130 كيلو بالمنظف و بتركه كم يوم بعدها بغير الزيت

__________________________________________________

النصائح زيت ابو 5 الاف مشيه بالكثير 7 الاف و غيره تفاديا لتراكم الشحوم

زيت ابو 10 الاف مشيه بالكثير 12 الى 13 الف و غيره

و الافضل حتى لو المكينه سليمه كل 3 تغييرات للزيت سوي غسيل مكينه و غير الزيت

لا تتركها حتى تتراكم الزيوت و الشحوم

و اكثر سيارات معروفه ان المكينه تصلب الفوردات خاصه الاكسبديشن

تدخل قوقل او اليوتيوب تشوف المكينه بعد فكها كلها شحوم و هذا سبب تصليبها

الطرمبة ما عاد تدفع زيت لكامل المكينه و تخبط

طبعا يكون فيه مؤشرات تفتفه بسيطه او صوت بالمكينه اختلفت عن السابق مثل ما ذكرت ونه مثلا

ولكن راعيها دايما رافع الدرايش و مشغل المكيف ما يدري عن شيء و يقول خبطت فجأة

مافيه شيء يخبط فجأة الا لو كان شيء كهربائي اما شيء ميكانيكي ما يخرب فجأة

لابد مؤشرات قبل خرابه بعدها يخرب

طولت بالموضوع ولكن شيء لابد من شرحه بشكل كامل للفائدة

تعرفوني ما انزل موضع كامل عشان سويت شاحن الولاعه و سويت بطانه الرفرف

و رشيت المرايات و كلام فاضي يا انزل شيء يستاهل او بلاش اتعب نفسي

إبلاغ

الردود