الكابرس ال90 تجديد السيارة بالكامل تفضلو

يارجال الناس صار الشرط عندها زي السلام عليكم يقول شرط وكذا ويغريك وبالنهاية يجي التماس كهرب وتكلمة يقولك والله يوم انها معي مافيها شي ومدري كيف ويجلس يألف لك اي تصريفة ف الزبدة خل خسارتك بشي يستاهل وشكرا

حياك الله
اول شي أسال الله لك الخيرة والرزق لي ولك ولاعضاء حراج ولجميع المسلمين

ثانيا استخير وانا اخوك

اما بالنسبة لموضوع الكابريس

السيارة قضى عليها الدهر وشرب , وصعب جدا تلقى نظيف إلا في أمريكا
وان لقيت في أمريكا تلقى اكثرها سيارات تاكسي او شرطة
لكن برضو تلقى النظيف والمصين كامل

اما بالنسبة لتعديلاتك وانك تبي ترش و الخ ...
انت بالبداية بتقول ما بتكلفني شيء
مثل ما صار معي مع ماركيز 2006 كانت شبه مدمورة بسبب سوء استخدام ولد اختي الله يصلحه
ولما شفتها قلت ما يبي لها شي .. بوية , اصطبات خلفية , ازياك نيكل , تنظيف داخلي , شوية صيانة كمبرسر الخ
واكثر من شخص قال لي يا رججججججججال ما تكلفك 2000 ريال
وكلفتني أكثر من 7000 ريال تصليحات من إلى , ولو بعتها ما جابت 6000 ريال

فعشان كذا وانا اخوك اذا انت رجال صبرك ايوب توكل على الله , بس راح تعاني من مسألة قطع الغيار لان صعب جدا تجدها إلا بالمواقع الأمريكية
او تلقى كابريس نظيف في أمريكا او هنا ان ربك سخر لك عيال الحلال , ودون ما تتعب وتشقي نفسك من تعديل ورش وسمكرة وتنظيف وصيانة
واعذرني على الاطالة

تجديد السيارات القديمة له عشاقه وله سوق جيد لانك ممكن تحول سيارة منتهية الي سيارة ملفتة للنظر

تكاليف التجديد تعتمد على مصادرك في القطع اللي بتشتري ممكن تكون مستعجل وتدفع غالي او ممكن تسويها على الراحة وتوفر

المهم اذا اخذتها غير الركب )الجوزات(
لانها مثل الفوردات اذا انكسرت طاحت
السياره بالارض قد صارت لي
على كابرس تسعاوي بلشت فيها بلشه
بداخل حي طاحت والله ستر علي
الله على ذيك الذكريات هههههه

انا اشوف انك ترهم لها مكينه لكزس 400

شفت واحد مقطع واحد مرهم مكينه لكزس 400

مكينه كداداه وحراره مافيه ومكيف مزبوط

لكن مكينه الكابرس قطع كلها تجاري وحراره وصرفيه

يارجال كان عندي كابرس كان ماشي مثل الساعه 
ومافيه ديرة مارحت لها اخر فتره صار من خراب لخراب
وماحصل قطع اصلي واذا حصلت اصلي غالي
اقول اغير هالقطعه وتمشي اموره كم يوم الا وهو 
طافي فشلني مره طفى عند الاشارة ومره بنص تقاطع 
واسحبه من ورشه لورشه اخر شي بعته ب تشليح 
وهو شغال ويمشي عمره الافتراضي انتها 
انت لو تاخذ سيارة صاحيه تمشي ومافيها شي
وتبي تسوي لها صيانة وتغير بعض القطع
مثلا جلد واذرعه وكراسي مكينه وغيره تكلفك فوق ٣٠٠٠
ريال كيف كابرس وواقف ويحتاج شغل والله 
غير تطفر منه ووش ماتسوي وتحط عليه خسارة 
ومايجيب لك قيمة هذا واحد من العيال عنده كابرس 
٩٠ جدده من الصدام للصدام ماخلى عليه شي 
حتى اسبير الوكاله والعفريته وكتالوج الوكاله شراها
رجعه وكاله الحين متحسف قد شعر راسه بعد ماخلص
التجديد ارتفع البانزين وطاح سعره ولو يبيعه الحين
مايجيب له ٢٠٠٠ ريال وهو نظيف 

يبغى لك شارع الاسكان بجدة بتلاقي قطع الغيار له و رخيصة مع ان من قبل ارخص

بالعكس ال 90 و 89 صرفيته ممتازه ادا بخاخاته تمام

انا كان عندي واحد و تندمت اني بعته لليوم افكر ارجعه

ال 90 و 89 يجي قيره 200 فور ار يعني دا مو شد بلده بس نفس الشيء بس تعاشيقه اخشن

ان كنت قادر على التكاليف وعندك رغبة وحلم فاستخر بالله وتوكل 

» كابرس للبيع
  icr7r عضو جديد!   قبل 2 أسبوع و يوم في حائل 
رقم الاعلان : 27903844 
آخر تحديث قبل 2 يوم و 5 ساعه
شف هذا افضل لك استمارة ساريه وجاهز 
اذا انت هاوي بس يقول يبي له شنبر

والله دام انها رغبتك لا احد يردك بس اصبر واهم شي تعرف او عندك مصادر عن القطع وخاصة الكماليات

من تجربة اذا بتجدد لنفسك يعني بتستخدم توكل على الله واطلب القطع اللي تحتاجها من برى لان اللي بتحصله تجاري اذا بغرض التكسب والبيع فلا انصحك بتاتا تعب وخسارة وماراح تجيب السعر اللي في راسك اقل مافيها ياخوك لو جددته من الى بتحصل الشاص بدى فيه الصدى والمكينة بتحتاج توضيب مشكلة السيارات القديمة بعد استعمالها بتعرف ان السيارة قضى عليها الدهر وشرب لذالك مشاوير قريبة ولا تستحمل كرف

بتطقطق فيه لين يطق راسك من التصليح
مالك ومال الشقاء والغثاء .

اذا ترغب تجدد توكل على الله وانا شفت مقاطع للتجديد بالانستقرام تخليك تجدد وانت ماتشوف الدرب والقطع تلقاها بالنت ولا بحدا المحلات المعروفة والموتر له عشاقه وانت من كلامك عازم على الشي هذا ومقرر توكل على الله وتبي تبدع فيه لان تبي تبدع فيه

وانا اخوك انا راعي كوابرس وجموس قدام اذا تبي تنفض الموتر نفض يكلف حدود 10او15 اذا كان ملعن والقطع لا تشيل همه اللي صعب تلقاه مثل المرايات الاصطبات وقطع الداخليه ماتلقا اصلي رخيص اهم شي لازم تركز عليه تهريب الماء الليات الرديتر الطبات طرمبه الماء الكوع اكثر شي متعبن بالكلاسيك تهريب الماء والله يوفقك