اختيار السيارة و صنف بعض البشر

57 34

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم 78 -140
قبل 6 سنه و 9 شهر

السلام عليكم ورحمة الله و بركاته

الموضوع طويل هو مجرد سوالف اذا انك فاضي فقط تابع لأن ما فيها فائدة بالسيارات

بعض أصناف الأعضاء اللي حصلت معهم على صداقة و تواصل فترة طويله

طبعا قابلت الكثير من الاعضاء و تواصلت مع الكثير لكن بذكر كم عضو فقط لأن الشرح يطول

أحد الاعضاء عرفته قبل حوالي 3 سنوات أو اكثر و هو أكثر شخص أشغلني

زين أنه ماهو ساكن بجده لكن كل ما جاء جده من يصحى من النوم حتى ينام و حنا مع بعض

ليتها مشاوير تستاهل لكن نقول يلا ماهو مشكله

عشان بعض الاعضاء ما يعرفون المشكله الحاصله معي من فترة

خدمت 9 سنوات بالعسكرية بعدها طلبت إنهاء خدمتي لعدم رغبتي بإكمالي بالعمل

و تم الفصل حسب النظام لكن 6 سنوات لم يتم تعديل مهنتي بدون سبب و كان من اول 4 شهور

تقدمت بشكوى لديوان المظالم بالمطالبه بالتعديل و التعويض

و تعرفون الواحد مهنته الفعليه المسجله لدى الدولة عسكري ما أقدر أتوظف بأي شركة

ولا يسجلوني بالتأمينات و كان الوضع صعب يعني ما فيه مجال الا اكرف نفسي بنفسي

اصرف على بيتي و عيالي

الأعضاء القدامى يعرفون كان معي تاكسي الكلام هذا قبل اوبر و كريم و كنت مسترزق منه

و التاكسي كان بإسم شركة بحكم اني عسكري ما اقدر اسجل شيء بإسمي

حتى جاء اليوم اول تدقيق من الدولة للشركات الوهمية و السعودة و تم تقفيل المكتب المستأجر منه

التاكسي و تفاجأت طلعت الصباح ما لقيت السيارة رحت الشرطة قالوا عندنا السجل التجاري للشركة

تقفل لأنه مخالف و سحبوا سياراتهم

جلست أسبوع تقريبا بدون سيارة و أخذت اللومينا و كملت شغل فيها و كد

كنت من وقتها كل ما احد وصاني على سيارة معينة اخذ منه مبلغ معين

حسب لو بدور له السيارة او هي جاهزة يرسلني لها افحصها و اجربها فقط

المهم جاء يوم تواصل معي احد الاعضاء موجود بالمنتدى حاليا

قال بجي جده و بشوفك و ننزل المعارض ندورسيارة و من هالكلام

جاء و كنا نتقابل من الظهر حتى الساعه 9 بالليل و احيانا من الصباح

يشغلني طول اليوم لا انا اللي رحت اترزق و اجيب مصروف لعيالي سواء من زبايني

او اروح المطار اشوف لي مشاوير لمكه المشوار على 250 ريال او حتى اشوف احد غيره اخدمه

بالمقابل و هذا شغل ما فيها شيء و رزق لي و لعيالي

عموما قلت ماهو مشكله دام الرجال جاي من خارج جده يوم يومين و يسافر

ولو ان اليومين هذي طول اليوم وانا معاه يعني رزقي يتوقف حتى يسافر

خصوصا ان ما عندي راتب استلمه اخر الشهر يعني لازم اشتغل بشكل يومي مشاوير او غيرها

المهم كنا ننزل المعارض ما يعجبه شيء كل ما شاف سيارة ما عجبته و يجيب عيوب على شيء

ما يستاهل حتى لو صدام مرشوش قال ما تصلح لو مرايه مكسورة و هي تعتبر مثل الصدام

قطعه خارجيه قال ما تصلح وقتها كنا بعام 2015 وهو يدور سيارات موديل 2004 او 2005

يعني ماضي عليها 10 سنوات طبيعي يكون فيها رشه بسيطه شبه مستحيل تحصل سيارة بحال الوكالة

وهي تكد لها 10 سنوات

المهم الرجال كل فترة يجي احيانا كل شهر يجي يومين ولو بعامله مثل غيره اخذ 500 ريال على كل

بحث عن سيارة كل ما نزلت معاه كان امداه طارت فلوس السيارة اللي بيشتري فيها كلها

لكن ولا ريال كنت اخذ منه

المهم الرجال كان يدور جمس فجأة مدري وش جاه قال ابي لومينا

لقينا وحده فل كامل 2007 بالرياض و الفل باللومينا قليل

تحصل LTZ بكثرة ولكن بدون فتحه و بدون مراتب جلد

هذي لقيناها فتحه و مراتب جلد و شاشه و حسب الصور ما تدري بعض السيارات تغريك

المهم أرسلنا واحد ملحوس بالرياض عضو معنا قديم هنا بالمنتدى

ووصيته اذا رحت تشوف السيارة كلمني وقتها عشان تعلمني وش وضع الحراره بالضبط

لأن تختلف من سيارة لسيارة الحراره الطبيعيه وهو معاه فورد وقتها يعني مختلفه تماما عن اللومينا

و عشان اعرف وقت الدعس على كم RPM يعشق و اذا شغل البور على كم يعشق

و فيه تفاصيل أخرى ممكن تعرف اقلها القير و المكينه سليمه ووضعها طبيعي او فيها خلل

المراوح طالما فيه عداد الكتروني بالشاشه يطلع لك الحراره كم نبي نشوف كم توصل بالضبط

المراوح تشتغل بالوضع الطبيعي او فيها برمجه السيارة او فيها اي خلل

او تطول المراوح وهي شغاله يكون احتمال فيها حراره يعني فيه تفاصل ممكن تتأكد منها

تعرف المحركات سليمه او لا

الملحوس راح جرب و خلص بعدين كلمني

سألته كيف السيارة قال ما تصلح ليش يالحبيب قال مساعدات الشنطه خربانه

طيب غير هالكلام فيها ملاحظات قال لا

سيارة موديل 2007 و حنا بعام 2015 و تقارنها بسيارة باقي واقفه بصالة الوكالة

طبيعي يكون فيها لو شيء بسيط ملاحظات

كلمت راعي اللومينا الرجال رد علي وهو زعلان

قال ارسلت لي ورع له ساعه يجرب السيارة و يدعس داخل حواري و يمشي 160 بشارع صغير

و فجأة يمسك فرامل مسكة قوية و يرجع يدعس كامل الدعسة و يرجع فرامل

و كل شوي يشغل البور و يدعس بالسيارة اخرتها مسك طريق خريص اقوله وين رايح

يقول بمسك طريق الدمام بجربها هناك

قلت له وقف و توكل على الله بطلت ابيع السيارة

المهم خوينا الملحوس هذا يوم اكلمه اقوله كيف وضع الحراره يقول طبيعيه وين توصل ما يدري

القير على كم يعشق ما يدري

وش الفرق بين البور و بدون ما يدري المراوح على كم تشتغل ما يدري

وش رايح تسوي تكسر سيارة الرجال و تقول مساعدات الشنطه خربانه

لا و يقول شيل النظر عنها ما تصلح

رجعت أراضي راعي اللومينا و قلت له يا ابن الحلال شرينا خلاص

ارسلنا واحد ثاني حولنا له الفلوس و راح نقل السيارة و ارسلها لراعيها بتبوك

الرجال أستلم السيارة طلعت لحسته أكبر مما توقعت

من ثاني يوم ماهي عاجبته هنا تحس بتأنيب الضمير ولو انه ما قد عطاني ريال من المشورة

لكن ولو الرجال حاط عشمه فيني اشوف له شيء نظيف

اقوله وش فيها ملاحظات السيارة يقول أحس الباب الخلفي فيه رشه يعني يحس بس ماهو متأكد

فيه اثر بويه فيه تغيير باللون فيه تنسيم هواء او وزن الباب مختلف او اي ملاحظه

قال لا بس أحس أبو اللحسه يا شيخ طيب قال يومين وجايك جده ببيعها

السيارة وقتها شريناها بـ24 ألف

وصل جده الرجال سكن بشقه مفروشه و سلمني المفتاح قال بيعها جيب لي رأس المال بس

ما ابي خساير و نام

اخذت السيارة طلعت فيها يعلم الله ما توقعتها كذا تركب السيارة تقول موديل 2015 او 2014 وقتها

سيارة مافيها اي اصوات و متماسكه بشكل عجيب و الداخليه جدا نظيفه راعيها لها سنوات معاه

و عزوبي ما يركب فيها أحد تحس المراتب الخلفيه ما قد أحد ركب فيها

عزم السيارة و صوتها و ملاحظات البودي مافيها اي ملاحظات ابدا

يعني سيارة ما شاء الله ما يحتاج جدا نظيفه

السيارة اخذتها الصباح الظهر رجعت لراعيها قلت له انا ابيها لا تبيعها لكن فلوسها ماهي جاهزه حاليا

خلها معك شهرين وانا شريت بفرق 2000 عن قيمتها يعني 26 الف

يعني ما قلت له سلمني السيارة اللحين ولا شيء يستخدمها شهرين يروح و يجي فيها و يبيعها علي بمكسب

و كلمتي وحده لكن قلت له استخدم السيارة ولا تسوي فيها شيء على وضعها تماما

رفض الرجال الا يبيعها قال والله ما ارجع فيها تبوك

المهم لقيت له زبون دفع 25 بجده و زبون دفع 29 بالرياض

لكن عطينا حق جده كلمه جرب السيارة بالليل قال بكره بروح الصناعيه افحص

و رحت معاه الصباح بصراحه كنت ابي منه على ما قالوا الزله

ابيه يقول بس فيه الملاحظه الفلانيه بالسيارة او نقص السعر عشان اقوله بطلت ابيع

تقابلنا ثاني يوم فحص السيارة ما حصل فيها اي ملاحظات

رحنا قبل الظهر سوينا المكاتبه و اخذنا فلوسنا و مشينا

الرجال البايع رجع تبوك و بعد يومين رجع كلمني

قال اقولك والله اني ندمان على اللومينا روح للي شراها قول نبيها

قلت له رقمه عندك كلمه انت مو فاضي قروشه معك انت وياه

بشوف رزقي و رزق عيالي من جد عطلني بالفاضي

و اليوم الواحد يفرق معي كنت اكد بالسيارة لو اطلع 200 ريال باليوم تروح مصاريف للبيت

اليوم اللي انشغل فيه مع احد اعرف انه ذاك اليوم عيالي ما بيتعشون

المهم الرجال قال بتكلمه او لا من النهايه قلت ولا لي دخل فيك السيارة كانت معك و حاولت اقنعك

تستخدمها و اشتريها منك بعد شهرين رفضت وش مستفيد من المرمطه الزايده

المهم من بكرة و الرجال محضر عندي بجده مره ثانيه قال انا بجده و مر من عند بيت الرجال

لأنه وقت الشراء كان ناقصه فلوس و مر البيت يكمل فلوسه و عرفنا البيت

الرجال وصل من تبوك على بيت الرجال مباشرة شاف السيارة متغيره عليه

راعيها شراها على طول غير صدامات SS و ركب لها جناح و غير جنوطها

و رش الجوانب من تحت أسود يعني تضبيط فلبيني من النهاية خربها

طابت النفس منها

لكن صار بشكل شهري يجي جده يومين ثلاثه

وش يكون الجدول

نتقابل قبل الظهر يروح يفك تظليل السيارة بعدها يغسل السيارة

بعدها نتغدا و نروح المعارض تقول ضبان من الظهر الساعه 2 الظهر و حنا بالمعارض

ما فيه اي فايدة من روحتنا هالوقت لا فيه معارض مفتوحه ولا احد يعلمك الاسعار ولا شيء

بعض المعارض مفتوحه فقط فيها عامل النظافه يمسحها كل يوم يعني لا اسعار

و السيارات مقفله اصلا نجلس فرفره بالمعارض حتى العصر يفتحون

الا مع الشمس و الرطوبه تكون انتهيت تبي تتروش و تنام

فرفره للعشاء و يرجعني البيت و يروح بيته عند ارحامه و احيانا يستأجر شقه

ثاني يوم نفس الوضع لكن نتقابل بعد الظهر نتغدا و المعارض تقول شريطيه

حتى الشريطيه يروحون بعد العصر مباشرة حتى اصحاب الحلال نفسهم المعارض ما تحصله الظهر

وش عندنا تحت الشمس الظهر ما تدري كأنهم بيعطونا سيارات هدايا مجانا

يخلص اليوم يرجع تبوك

بعد شهر يرجع مره ثانيه يمرني يفك التظليل اللي قبل شهر ركبه و نروح نغسل السيارة

و نكمل سيناريو نفس اليوم معارض و حر و قرف

ثاني يوم نركب تظليل جديد و غسيل مره ثانيه و نكمل السناريو

طيب وراي بيتي مصاريفي عيالي فاضي لك انت اشغلتني

المهم شريت الاكسبديشن وهو شرا جمس و نفس الوضع اسبوعين و قال ما عجبني ببيعه

رغم انه اخذه بسعر خيالي جدا مرتفع على موديله

رجع باعه و اخذ باجيرو وكالة و نفس السيناريور شهريا يجي

مره يفك تظليل و يغسل و ثاني يوم يركب تظليل

و ننزل المعارض وش عندك خلاص معك سيارة وكالة لكن تعود على الشمس

طيب لا بنشتري ولا نبيع تنزل المعارض شهريا وش تسوي و ليتك من بعد العصر تغير جو

من الظهر حتى العشاء لا نستفيد شيء ولا خليتني اشوف رزق عيالي

مرت الايام تغيرت الظروف رجع حتى الباجيرو الوكالة ما عجبه باعه

و جلس على سيارته معاه كورولا 2013 ماخذها وكالة

انا قبل سنه تقريبا جاني مرض اسمه النقرس هذا للتوضيح زيادة أملاح بالجسم

من اسبابها البيبسي القهوة اللحم الاحمر يعني الدجاج عادي اكله لكن لحوم تأثر علي

الفول و فيه بعض الأكلات اكلها انسدح كم يوم

غالبا ألم بالعظام و شد بالظهر و الكتف لدرجة ما اقدر اسوق السيارة

حتى لو جيت اركب السيارة او انزل منها اخذ لي احيانا دقيقه كامله بس عشان انزل من السيارة

و ألم فضيع بداية المرض ما كنت ادري وش جاني ولا اعرف الاسباب ولا علاجه

كنت اخذ مسكنات و اتروش بموية حاره ولا فيه فايده

المهم رمضان العام الماضي كالعاده يمرني ابو لحسه

اقوله تعبان ما اقدر اطلع يقول ما عليه شوي و من هالكلام اتحمل على نفسي و اطلع معاه

طبعا اول المرض كان يجلس معي اسبوع اسبوعين احيانا اكثر وانا تعبان

لكن حاليا خلاص عرفت الاسباب و حتى لو جاني اخذ العلاج المخصص له يوم وانا رجعت عافيتي

المهم برمضان يمرني اطلع معاه كم ساعه نوقف بقالة او شيء ينزل يجيب اي شيء

انا طبعا تعبان اجلس بالسيارة يا اخي المشكله واحد تقوله مريض و حالتك حاله و تشرح له الوضع

يقول وش فيك ما تسولف مثل اول ووش فيك متضايق و ليش ما تنزل معي

مخ بنقالي يفهم و يستوعب اكثر منه

و برمضان طول اخذ له حوالي اسبوعين بجده كان ماخذ اجازة شهر

وقتها كنت مره تعبان وهو كان يبحث عن سيارة بحراج حصل كابرس رويال مرهم SS

بالقصيم و راعيه مثل العاده اللي يجيك يقول شريت السيارة مدري وش فيها تدري مرشوشه من كل مكان

قالي تروح معي قلت والله تعبان ولا اقدر زعل و قال وين الصداقه وين الاخوة و كلام فاضي

قلت له مشوار طويل و يمكن ما تعجبك السيارة خصوصا ان ما يعجبه شيء

ارسلت اخوي بالقصيم السيارة بموقع حراج لكن راعيها كاتب اسم المعرض اللي واقفه فيه السيارة

كلمته يروح يشوفها رغم ان ما عنده اي خبرة بالسيارات لكن كنظرة مبدئية يشوف تستاهل نروح او لا

المهم اخوي كلمته قال خلاص بعد العصر اروح اشوفها

و فعلا يمكن على الساعه 5 العصر راح و تعرفون رمضان كان وقت صيف خاصه بالقصيم

و الرياض و الشرقيه و كثير من المناطق يعني الساعه 5 الواحد يروح وهو صايم مجهود

وصل هناك كلمني وقتها يقول فيه 3 ورعان بيطلعون يجربون السيارة لكن واضح السيارة مهربده

وهو ما يعرف شيء قال واضح مرشوشه من كل مكان حتى من بعيد واضحه

لكن خوينا الملحوس ما ادري وش فيه ماسك عليها شكله خاق مع الجنوط 15 SS اللي كان مركبها

الورعان جربوا السيارة ما يهتمون لا نظافه ولا يعرفون شيء عجبهم عزم السيارة 8 سلندر

و الصوت خلاص شروها

كلمت خوينا قلت ترى اخوي راح حصل 3 قدامه جربوا السيارة و شروها و يقول كلها رشوش

زعل قال اخوك ماهو حريص لو حريص على الموضوع كان راح بدري

سلامات فيه لحسه يروح من الظهر يعني الطبيعي يروح العصر بالنهايه نصيب ولا هي نظيفه بعد

المهم وقتها جوالي كان فيه عطل بسيط طاح بموية و خربت الكاميرات ما عاد تشتغل

خوينا هذا معاه فلوس ما يدري وش يسوي فيها

قالي كم يكلف جوالك تصليحه قلت ممكن 200 الى 250 قال خلاص بكرة نصلحه

قلت له ماني بحاجته عشان كاميرا و سناب و كلام فاضي وراي مصاريف عيالي اهم

وقتها تعبان مثل ما ذكرت لكم ولا اقدر اشتغل ولا شيء يعني امر بأزمه صحيه و ماليه

قال بصلحه لك قلت له لا شكرا بتدفع 250 عطني اياها اصرف فيها على عيالي افضل

رفض قال اصلحه لك او بلاش

سكتت من بكرة مرني قالي سيارتك وش تحتاج قبل كم يوم رحنا فيها كان فيها اصوات قربعه

قلت له بسيطه مساعدات الامامية و كراسي مساعدات و فيها مقص من زمان خربان لكن امشي فيها عادي

تروح و تجي و اسافر عليها لا اختلف توازنها ولا شيء مجرد قربعه عندي اولويات اهم منها

قالي نصلحها و نضبطها لك رجعت كررت عليه

يا ابن الحلال عندي مصاريف و التزامات اولى من جوال و سيارة و كلام فاضي

المهم الرجال مصر الا يصلحها لي قلت له تكلف تقريبا 1200 الى 1500 ريال

قال نصلحها و نصلح الجوال قلت ما ابي تصلح شيء وريته رسالة بالجوال

من الكهرباء فاتورة 781 ريال على ما اذكر و الفصل النهائي خلال 3 أيام

و مرسلينها من امس يعني بكره بعده يفصلون الكهرباء بالبيت

عندك شيء تبي تساعدني لا تدفع 250 جوال و السيارة 1200 او اكثر

عطني 1000 ريال منها اسدد الفاتورة و الباقي اصرف على عيالي يومين استرد عافيتي

و ارجع انزل المطار برمضان احصل شغل و مشاوير لمكه و تمشي اموري

رفض قال لا فلوس ما بعطيك يا تصلح السيارة و الجوال او بلاش

قلت له خلاص شكرا لا تصلح شيء رجعني البيت بس

قالي وش فيك زعلان قلت له تعرف لي كم يوم تعبان و تشوفني حتى ركوبي السيارة بالقوة

و متحمل على نفسي و اجاملك و أطلع معك لو اجلس بالبيت اريح لي

يعني لا انا اللي شفت رزق عيالي ولا انا اللي ارتحت بالبيت

فوق هذا انت دافع دافع فلوس خلاص عندي اولويات اهم من قربعه بالسيارة و كلام فاضي

لكن هو من النوع اللي عنده السيارة اولا بعدها يشوف احتياجات البيت

هنا مربط الفرس كثير مثله عادي ينقص من مصاريف البيت على شيء تافه تلميع و تظليل و خرابيط

يا اخي فيه شيء اسمه اولويات خلصها بعدها عندك شيء زايد روح سوي سيارتك

بالنهاية طالما هي تمشي و امورها طيبه خلص امورك المهمه اولا

المهم الرجال زعلان يقول انت لك كم يوم تطلع معي و مكتم و حاله

يا ملحوس مريض و اقولك مريض ما اقدر اطلع تقول الا اطلع

طيب افكر بمصاريف عيالي رزقي كله من مشاويري وقتها قبل الوظيفه

يعني شايل هم مصاريف البيت و فاتورة الكهرباء اللي نازله

وانا من بداية حياتي معتمد على نفسي اعتماد كامل

ما اعتمدت لا على اب الله يرحمه ولا ام ولا اخ ولا شيء

من خلصت دراسه ما احد مد لي ريال لا بسيارات ولا ايجار بيت ولا مصاريف زواج ولا شيء

لا تقارن حياتي بحياة واحد اهله عايشين بخير لا صدم بسيارته بكره طلع غيرها

لا جاء بيتزوج وراه ابوه او غيره يدفع مهر و يساعده بالمصاريف

الناس ماهم سواسيه

المفروض واحد لك معاه 3 سنوات ما يحتاج تبرر له حتى لو ما حس فيك و قلت له وش فيك

خلاص يقدر و يسكت يا يساعدك او بسلامته لكن لا يتشره عليك و يزعل

المهم الرجال نزلني البيت من ذاك اليوم برمضان ولا عاد تواصلنا الى وقت كتابة هذا الموضوع

و سبب الخلاف فلوس بيدك ما اعطيك يا اصلح جوالك و سيارتك او ما بعطيك شيء

لدرجة قلت له لا تعطيني شيء بيدي هذا رقم الحساب الكهرباء سدد الفاتورة و كثر الله خيرك

رفض

يا أخي يحسسك أنك راعي مخدرات بيعطيك فلوس بتطلع تشتري لك زقارة و كلام فاضي

عشان كذا ما يعطيك فلوس يصلح امورك و خلاص

المهم خلصنا من الملحوس هذا
__________________________________________________

واحد متابعني بالسناب له فترة و كثير من المنتدى لكن ما اعرف اسماء عضوياتهم

واحد منهم تواصل معي اول شهر توظفت فيه باقي ما استلمت ولا راتب

طبعا نتكلم بالسناب

قال صحيح يا ابراهيم انك اذا بتدور سيارة لأحد تاخذ منه عموله قلت له صحيح

قال طيب ابي لي لومينا اسعارها هالكلام قبل كم شهر رخيصه طاحت يعني 8 الى 10 الاف تجيب

لك شيء كويس خصوصا انه بالرياض ما يبي يسافر فيها ولا شيء حسب ما فهمت منه

يعني واحد مثل هذا ما تقارنه بنفس العموله حقت الرجال اللي بيشتري سيارة قيمتها 80 او 90 الف

او حتى 50 الف

يعني تحصل اموره متيسره لكن اللي يدور سيارة بأقل من 10 الاف يالله مدبرها منا و منا

حتى لو ما اخذ منه شيء ما عندي مشكله

لكن يجيك واحد بيشتري سيارة مبلغ كبير و يجلس كأنه داخل محل ملابس يكاسرك كم و نقص

ما عجبك سعري روح دور بنفسك سيارة

المهم الرجال شفت له كم وحده ما رحت شفتها فعليا لكن بموقع حراج و قلت له فيه وحده بالرياض

عندك سعرها طيب السيارة نظيفه كل شيء ما عدا القير و سعرها كان يبي فيها 4500

يعني لو توضب القير مع ضمان 6 شهور تكون ضمنت شيء بالسيارة و سعرها مناسب

ولا حوادث ولا شيء و كم يوم اكلمه هاه رحت شفت السيارة يقول لا

صرت انا ما حرصت ادور له بجده قلت بالرياض عنده ما راح شاف هذا لعاب

طبعا استنتجت من تصرفاته بعدين وهو ما قالي الى اليوم وش قصده بالموضوع لكن انا فهمتها

الرجال شايف وضعي ووده يسلفني فلوس لكن بيجيبها بطريقه ثانيه

المهم قالي بطلت اشتري سيارة لكن معي مبلغ زايد حاطه على جنب اذا ناقصك شيء قلت له لا شكرا

قال والله حاطه على جنب و من الكلام قالي كم محتاج بس

قلت له يعني اذا ما بتضغط على نفسك اذكر قلت له 700 قاعد يضحك

قال احسبك بتطلب 4 او 5 الاف

قلت له 700 تمشيني حتى يوصل اول راتب

قال بعطيك 2000 قلت له ما اقدر ارجعها مع الراتب

عاطل لي كم شهر مع الراتب صعبه وراي التزامات كثير

قال ماهو مشكله متى ما تسهلت حتى لو بعد كم شهر عادي

يعني رجال لا خدمته فعليا ولا ضيع وقتي ولا شيء لكن هنا معنا الاحساس و الرجوله

المشكله اني ما عرفت وش اسم عضويته بالمنتدى الا قبل كم يوم

وهو مسلفني الفلوس له 6 شهور هههههههههه حتى اسمه الحقيقي ما اعرفه ولا اسمه الاول حتى

الا قبل كم يوم انتقدته بالمنتدى جاني بالسناب قال وش فيك تتكلم علي ههههههههههه

حسيت كأن احد صكني كف هو العضو d7ooom777

_______________________________________________________

عضو اخر قليل مشاركاته لكن متأكد ما يبي اذكر اسمه ولا هو متابع للمنتدى اصلا الا قليل جدا

قبل حوالي سنتين كتبت موضوع بالمنتدى عن الشبح و بيعتي له و اني مضطر ببيعه بأي سعر

تواصل معي بالواتس الرجال بنفس اليوم قالي اشوف لك موضوع تبي تبيع الشبح

قلت له اللومينا تمشي اموري و عندي مولوده توها جايه و محتاج مصاريف

حول لي 4500 ريال

و قبلها بسنه تقريبا نفس الطريقه

ارسلني لكم شغله بجده وهو بالرياض ولا تمت الشغله اصلا ما قدرت اعطيه التفاصيل اللي يبيها بالضبط

و حول لي 5000 ريال منها حق تعبي و منها سلف متى ما تسهلت رديتها له
__________________________________________________

عضو اخر بتبوك بعد مدري وش فيني مع تبوك ههههههههههه

لي كم سنه اعرفه و قابلته كم مره

نفس الحكاية كل فترة يتواصل معي محتاج شيء ناقصك شيء معي المبلغ الفلاني زايد عن حاجتي

و ممكن ما يبي اذكر اسمه

طبعا الاعضاء كلهم ما استأذنت اني اكتب الموضوع او اذكر اسم احد
___________________

عضو اخر مشاركاته قليله لكن معروف اخر واحد كتب عن موضوع الامبالا قبل كم يوم

sultan-07

هذا العضو متواصل معاه ممكن من 5 سنوات و كان تواصلنا بالجوال

و اكثر واحد اكلمه تقريبا كل يومين ثلاثه نتكلم من نص ساعه الى ساعه

و اذا جاء جده وهو جياته قليل نتقابل و ارتاح معاه

طبعا شيء جميل انك تتكلم مع شخص او حتى تقابله تكون على طبيعتك

ما تتصرف تصرف او تقول شيء تقول ممكن يفهمني غلط او تبرر له عن شيء

نفس الحكاية قبل اكثر من سنتين ما ادري وش كان عندي

حول لي 1500 ريال بعد فترة وقت ما طلع الامبالا كان عليها دفعه اعتقد 8000

كلمني قال لو متوفره معاك 1000 ريال ناقصني حق اكمل الدفعه و 500 الباقي مسامحك فيها

طبعا المبلغ وقتها متوفر معي و حولتها له و اخذ الامبالا و باقي متواصل مع الرجال اخرها البارح

ودي اذكر كل عضو خاصه اللي حصلت بيننا تفاصيل و مقابلات لكنهم واجد

بعضهم و نعم الرجال و بعضهم معرفتهم و مجرد ذكراهم تجيب المغص ههههههههههه

لمحه بسيطه عن واحد ما بذكر نوع السلعه عشان ما احد يعرفه

لكن ازعجني له فترة عندي السلعه الفلانيه و زينه و من هالكلام و سعرها رخيص

قلت له ما احتاجها ابدا قال جربها طيب حتى لو بجربها ما بدفع فيها القيمه الفلانيه وانا ما احتاجها

ازعجني عليها طبعا ما وضح لي شيء بعدين حسب كلامه و حسب ما فهمت منه

انه بيعيطي هي كتسويق له و اذا كانت مفيده اسوقها له يعني شيء مقابل شيء

اخذتها منه جربتها يومين ما عجبتني فكيتها و خليتها بالبيت

والله يا شباب اقل من اسبوع اتصل علي يطالبني بقيمتها

طيب هذي هي فكيتها بالبيت تبيها اللحين امر اعطيك هي لا طلبتك تعطيني ولا شيء

نشبت لي عليها و حسب ما فهمت منك انه تسويق لك فقط

قال محتاج فلوس

طيب محتاج فلوس تبيعني شيء غصب عني هههههههههههه ابو شكلك

عطيته قيمتها قلت اسد فمه ولا يبلشني الله لا يشغلنا مع اشكاله

المهم عندي حوالي 140 نقطه اتوقع اذا ما صارت بالسالب فهي بتروح كلها

ادري كلام فاضي ولا يفيد شيء بالسيارات لكن مجرد فضفضه ههههههههههه

خصلت من قضية باقي لي قضية اخرى رافعها ضد محكمة و رئيس محكمه اطالب بتعويض بعد

و قلت افضفض شوي قبل أبدأ المعركة يكون ذهني صافي

ولو تحمست اكثر بكتب موضوع ثاني بعد كم يوم عن كم عضو ثاني

يلا بطلع احلق اضبط خشتي و نتواصل

في أمان الله

إبلاغ

الردود