سهل تعطي شورك صعب تطبقه على نفسك

23 30

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم 78 -140
قبل 6 سنه و 9 شهر

السلام عليكم ورحمة الله و بركاته

كثير نشوف بالمنتدى او موقع السيارات استفسار عن سيارة معينه

يجيك كم واحد يرد زيدها 15 و زيدها 20 و خذ الموديل الفلاني افضل

طيب 15 و 20 سهله عندك اذا سهله عطها الرجال خله يشتري فيها سيارة افضل

شاورك على سيارة معينه جاوبه على قد استفساره

و يجيك بعض العينات يقولك يا تاخذها وكاله او لا تاخذها

الرجال يدور سيارة بأقل من 25 ألف تجي تقوله خذها وكالة قيمتها فوق 100 الف او لا تاخذها

يركبك او وش يسوي يعني

فيه سيارات موديلات قديمه لكن اعرف كيف تستخدمها بتعيش معك

و فيه ناس يسوق سيارة جديده يجيب العيد فيها بأشياء ما يدري انها تضر السيارة

اعطيكم مثال لشيء حصل معي شخصياً بين 2 من الاعضاء هنا بالمنتدى

واحد منهم العضو sultan-07

العضو الآخر ما يحتاج اذكر اسمه

المهم سلطان تعرفون كان معاه امبالا 2015 فل

الرجال طلع السيارة وكالة اموره كانت متيسرة و كان عندهم نظام بمكان عمله فيه انتدابات كثير

و يجيه انتدابات شهريا ما يقل عن 3000 ريال فوق الراتب

و كان عنده استطاعه يشتري اي سيارة حتى لو قسطها مرتفع

لكن بعد ما طلع السيارة بشهر او شهرين الشركة وقفت جميع الانتدابات

صار يصفى له الراتب فقط و الامبالا كان قسطها 2400 ريال

يعني اول كان مطلعها على اساس انه يدفع كامل القسط من الانتداب

لكن فجأة ينقص من راتبك 3000 ريال مبلغ ماهو بسيط طبيعي تعيد النظر بمصاريفك

و تحاول تقلل منها

حاول يتنازل عن السيارة لكن المشكله بالتنازل فيه تلاعب

تجي تتنازل الطرف اللي بياخذها لازم يدفع 10% من قيمة السيارة كاش

يعني هي سعرها فل كامل وقت العرض كانت بحدود 137 الف

يعني تدفع حوالي 13700 ريال عشان التنازل فقط

و نسبة المرابحه تزيد يعني تحسبها اجمالا قيمة التنازل تطلع سيارة جديده افضل و بنفس قيمة المستعمل

هذا بالنسبة للبنك الاهلي ما ادري عن باقي البنوك

نزل لها اعلانات بموقع حراج انه بيتنازل عنها مقابل يدفع 4 اقساط للي بياخذها ما احد جاه

قال بيتنازل و هو سلطان بيدفع للي بياخذها 15 الف ريال ما احد جاه

الرجال كل المقصد ما يبي شغل الحرام و يتلفها و يتحملها التأمين

لكن والله احيانا الامور تحدك من شروط البنك نفسه تخليك تفكر بالتخلص بالسيارة بأي طريقه

يعني لو انهم ما يطلبون الدفعه و يزيدون النسبة كان اخذها غيره بسهوله

لكن شروط معقده

المهم واحد ثاني من الشباب عسكري بتبوك و طاقه براسه الا يبي يشتري باجيرو وكالة

ما اذكر قسطه لكن اعتقد 1800 ريال

الرجال مخطط نفس سلطان يطلع السيارة و ينقل الجنوب و يجيه زيادة بالراتب تغطي قسط السيارة و أكثر

و فعلا هذا اللي حصل يعني القسط كان يدفعه من قيمة الزياده اللي جاته شهريا و شيء مضمون من الدولة

يوم من الأيام راكبين الباجيرو و كنت اكلم سلطان انه خلاص طفش من السيارة

ماهو عيب فيها ولكن انضغط منها بالراتب ولا لقى احد ياخذها

نقز راعي الباجيرو قال يا رجال أتلفها

طبعا راعي الباجيرو كانت جديده لها شهر او حولها معاه و كان بتبوك باقي ما نقل الجنوب

قال اتلفها و ريح نفسك ما يلحقك ريال

عطيته الجوال يكلم سلطان و يقنعه و سلطان رافض الفكرة قال ادفع 15 الف بالحلال لكن ما ابي الحرام

الرجال منا منا يحاول يقنعه ان البنوك اصلا سارقينه و من هالكلام

و قاله بالجنوب عندكم سهره دفها على اي صبه او جبل او شوف لك طريقه و ريح نفسك

قال لو تبي اعرف واحد بجيزان عسكري يمشي الأمور لا تخاف

سبحان الله كم شهر سلطان تيسرت معاه و دفع القيمة المتبقية من السيارة كاش 102000 ريال

و أمتلك السيارة و استخدمها سنه بعدين باعها

راعي الباجيرو بعد ما نقل الجنوب و زاد راتبه قرر يتنازل عن الباجيرو

و السبب يقول يصرف بنزين بس يعني راتبه يغطي و كل شيء لكن يصرف بنزين

وصار موقفه و يستخدم كورولا 2013 معاه عشانها ما تصرف

و الجيب واقف ما يحركه حتى بالسفر تاركه واقف

وقتها متواصل معاه نزل لها اعلانات تنازل كم واحد يجيه ولا يصمل

قلت له وينك قبل شهرين تقول لسلطان اتلفها و ريح نفسك

قال يا اخي صعبه لو يصيدونك تروح فيها ما تستفيد شيء لا تعويض ولا شيء و تبقى الاقساط معلقه

فيك و تجلس تقسط بسيارة حتى ماهي معك

طيب انت نقلت حاليا لجيزان و عندك واحد من جماعتك حسب كلامك يمشي امورك بالحادث

يعني ما فيه اي شبهه عملك بجيزان و صار لك الحادث بجيزان و فيه واحد بالمرور يمشيك

ماهو بجيزان نفسها قريه تابعه لها ما فيه نجم الاوراق ترتفع عن طريق المرور مباشرة

الرجال ما سواها طيب ليش تبي تورط غيرك و تقنعه ان الامور سهله و يوم جات عليك ما طبقتها

المهم جلس يحوس حوالي 4 شهور يدفع اقساط بسيارة واقفه

بالاخير حصل واحد ياخذها و رغم انه دافع دفعه اولى

الا انه تحمل قيمة المصاريف الاداريه و دفع حوالي 3000 للي بياخذها عشان يرضى

يعني يصير دفع حوالي 5000 ريال عشان بس يفتك منها

سبحان الله

------------------------------------------------------------------------------

نرجع لموضوعنا الأول عن زيد و خذ الموديل الفلاني افضل

تذكرون قبل سنتين كان معي شبح 500

بنفس الوقت كان احد الاصدقاء معاه شبح 320 و اهله بالباحه

و يروح لهم دايم

و كان يمدح الشبح و انه يسافر فيه اي مكان بدون خوف

رغم اني كنت اقوله خذ 500 يقول لا 320 عملي اكثر و يحذرني من الـ500

الغريب بالموضوع نشب لي كل ما جاء يروح للباحه ياخذ سيارتي

ليش يقول 320 ما يطلع بالجبال عندنا هناك وزنه ثقيل و مكينه صغيره ولا يضمنه حتى بالخط

وين كلامك اول ابلشني كل ما بيسافر اخذ سيارتي

++++++++++++++++++++++++++++++++

بموضوعي قبل أسبوعين

شرحت فيه طريقه تشغيل المراوح و العنوان كان

تأخير عمل مراوح التبريد

اخر رد كان من العضو عاشق الشفر ابو احمد

يقول جربت الحركه و ضرب السلك ولا عاد اشتغلت المراوح حتى مع المكيف

انا ما ادري الواحد يقول كلام من رأسه او وش يبي من الرد بالضبط

اعطيته رقمي و تواصل معي و كانت سيارته كابرس 6 سلندر يعني نفس نظام الكهرباء عندي

خليته يسوي نفس شرحي و بالصور و اشتغلت عنده طبيعي مع المكيف و بدون و بالسلك

و كل شيء حسب شرحي له

انا ما ادري وين مخ الواحد يجيب سلك يشبكه ببلاستيك و يبي الكهرباء توصل

و مدري كيف تضرب الكهرباء وهي ببلاستيك ما يوصل الكهرباء اصلا

كنت اتمنى يرجع يكتب موضوع عن التجربه او رد على الموضوع عشان ما يكون فيه تكذيب لي

بالنهاية بعطيكم سنابي الاساسي اضيفوني فيه

و عادي يحصل فيه اي مشاكل بغيره فيه حوالي 2000 متابع غثوني كل شوي واحد ناقز

iii1403 سنابي

إبلاغ

الردود