أضف سؤال أو موضوع جديد          

عطل يذكرك بعطل قديم

up 18 down 19
ابراهيم 78 -102
قبل 3 شهر و 2 أسبوع



السلام عليكم ورحمة الله و بركاته

ما لقيت شيء مناسب للموضوع كتبته كذا

المهم أحيانا يحصل عندك عطل معين بالسيارة تذكر قبلها حصل نفس العطل بسيارة مشابهه

ولا حليته وقتها و زاد العطل حتى وصل لخساير كبيرة

وكان الحل بسيط لكن الدنيا دروس

الكابرس معي ماشيه اموره تمام الحمد لله نعومة تبديلات القير و المكينه و كل شيء

رحت القصيم قبل اسبوعين وصلت بالليل ثاني يوم الصباح طلعت شغلت السيارة

بعد التشغيل بحوالي دقيقه صرت اسمع فيها صوت حنه بسيطه او ونه وهي واقفه

خصوصا السيارة واقفه بالحوش و صدى الصوت يرتد لك بشكل واضح مع الجدران قريبه

سخنت السيارة و طلعت من الحوش بالريوس يوم عشقت D الا فيها دقه قوية

مشيت على مهلي عشقت الاول للثاني فيها نتعه قوية

الثاني للثالث نتعه اخف

الثالث للرابع ما فيها شيء سليمه

القصيم عنيزة منطقه صغيره الصناعية تبعد عن البيت دقايق بسيطه

رحت الصناعية الصوت زاد بالحنه حتى على سرعة 60 اسمعه

رحت لمركز الوالد الله يرحمه متعامل معهم بكل سياراته

قلت للميكانيكي تعرف السيارة قال لا

قلت ابو ابراهيم له كم شهر ما جاكم قال ايه اعرفه

قلت هذي سيارته توصى فيها

طلع جربها اذا دعست نصف الدعسه و اكثر تبدل بدون دقه ولا شيء طبيعيه و عزمها طبيعي

ربع الدعسه و اقل دقه واضحه شوي و تفحط كأن أحد صدمك من الخلف

رجعنا الورشه ارسلني لورشه خلفهم قال روح له قوله ابي برمجه

القير عندك سليم يحتاج برمجه فقط

رحت للورشة الثانيه قالي موديل كم قلت 2010 قال 4 غيارات ماله برمجه

قال غالبا حسب وصف المشكله يكون من حساس طرمبة القير

وهو كان عندي باللومينا قبل سنتين وقت ما خرب القير الحساس ما يشتغل

لكن ما كشفت كمبيوتر الا بعد ما راحت الكلشتات خلاص

المهم مكانه بكارتير الزيت تحت لكن حسب كلامه يقول فيه حساس ثاني داخل القير

فحص كمبيوتر عشان يتأكد طلع له الحساس اللي داخل القير و اذا تبي تفكه

لازم توضيب القير كامل لانه يفك الكلتشات مكانه وسط القير و اذا فك الكلتشات خلاص تخرب

لازم توضيب كامل حسب كلام 3 ورش و يكلف 4000 شغل مع قطع

يا ولد ضاق صدري البارح جاي بالسيارة من جده للقصيم 1000 كيلو ولا فيها شيء

اطفيها سليمه اشغلها خربانه

تذكرت اول ما طلعت المشكله باللومينا نفس الحكاية حنه مع دقه بالقير

و مشيت من مكه لجده وصلتني كبري الجامعه ووقفت

صرت اطفيها شوي و اشغلها تمشي 3 كيلو و توقف مره ثانيه

حتى راحت الكلتشات

قلت حل اخير وانا فاقد الامل لكن يمكن تضبط

وقفت طلعت المفتاح و فصلت البطاريه دقايق و رجعت شبكتها و شغلت

صوتها طبيعي عشقت ناعمه مشيت التبديلات ناعمه ولا فيها اي مشكله

رجعت البيت و طلعت كم مشوار طبيعيه و رجعت جده ولحد اليوم ما رجعت المشكله ابدا

تذكرت اللومينا قلت ليتني فصلت البطارية ممكن كان الحساس معلق او شيء ما كان راح القير

المشكله اقول للورشه معي لومينا 2008 و نفس الحكاية 6 سلندر اركب القير هنا

قال ما يركب هههههههههه 2010 جاي شاذ لحاله

الظفيرة مختلفة و القير مختلف و المكينه الشكل الخارجي نفسه لكن مع الجنب تختلف شوي

و البساتم اكبر و اقوى عزم

يعني مالك غير توضيب لكن الحمد لله ما مشيت عليه الا دقايق و فصلت البطاريه لحقت على القير
________________________________________________

فيه نقطه ثانيه انا مدري ليش غبي او دلخ او انسى مدري وش مشكلتي

كل مره اتذكر بعد ما اصلح و اخلص و المره اللي بعدها اطيح بنفس الخساير

الميكانيكا البسيطه تغيير مساعدات او كراسي مساعدات او اذرعه

نصيحه غيرها عند محل ميزان اغلب حقين الميزان هو بالاصل ميكانيكي

و اذا ما يعرف بيقولك ما اصلحها لكن اغلبهم يصلح الاشياء هذي

لانه غالبا تغير اذرعه او مساعدات تحتاج وزن اذرعه بعدها

احيانا تغير مساعدات ما تحتاج و احيانا تحتاج حسب يعني

الاذرعه لو غيرت اذرعه او مقصات لازم وزن هذي ما فيها كلام

المهم تغير عند ورشه بسعر و ترجع تسوي ميزان كمبيوتر 200 ريال

مره وحده روح محل ميزان و خله يغيرها لك و يوزن مره وحده اتفق على السعر كمبليت

يطلع لك ارخص من تسوي بورشه و ترجع تسوي ميزان بمحل ثاني

توفير مبلغ ووقت







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


يعطيك العافيه ع الموضوع

تعقيباً ع المشكله الأولى من تطور القيور بكثرة حساستها حالياً و وقوف الفنيين قدامها بعدم فهمهم لها حالياً أجل مستقبلاً لا صار القير الكتروني مثل علب الدركسون صارت كهربائية أيش بيعملو أتوقع مستقبلاً بيكون الفحص من خلال تطبيق ع الجوال تربطه بالسياره ويطلع لك كل المشاكل ورح تغنينا عن الفتاوي من الصناعية ،،


معظم الورش بما تمتلكه من فنيين لا يرتقون للمستوى المطلوب مجرد تخمينات تستنزف الجيوب و المجهود،،


up 5 down 0
panamira 1869
قبل 3 شهر و 2 أسبوع



موضوع جميل
وعلى طاري الورش
نصيحه اذا سيارتك فيها مشكله
كهربائيه لاتوديها للورشه لانه بالغالب ماعنده كمبيوتر فحص
يا انه يوجهك لمحل فحص او يقولك افحصها وتعال جب التقرير
او انه يدق على واحد يجي يفحصها لك بالورش
بالاخير بتدفع قيمة فحص غير قيمة التصليح

اما اذا رحت لقين الفحص ويتصلحها عندهم بالغالب الفحص مجاني
لكن ماتضمن شغلهم او سعر يدهم

الي تسويه تشتري قطعةoBdسعرها٥٠ريال وتحت ماعليك من الي يشطح بالسعر وحمل تطبيقها بالجوال والكود الي يطلعلك مع الكلام وره للميكانيكي على طول بيعرف الخلل وانت ابحث باليوتيوب عن طريق الكود عشان يكون عنظك نبذه عن المشكله قبل لاتوجه للورشه
الحمدالله هذا الي اسويه الان طلعت مشكلتين وفحصتها بنفسي الاولى حساس الشكمان صلحتها بورشه
والثاني حساس القير انهبل القير وطلعت علامته فحصتها وعطيت المكانيكي الصوره شافها وعرف الحساس
ووفرت قيمة الفحص بكل مره الي هي بالغالب من٥٠الى١٠٠ريال


up 8 down 2
d7ooom777 458
قبل 3 شهر و 2 أسبوع



جميلة هالقطعة OBD2 لفحص واكتشاف مشاكل الحساسات بالسياره سعرها بحدود 25 ريال بسوق كوم ع حسب الشركة،،

قبل يومين فحصت وطلع لي كويلات عطلانه Ignition coils  بكود معين وتم حلها والحمدلله ،،


up 5 down 0
panamira 1869
قبل 3 شهر و 2 أسبوع



موشوع جميل قد حصل معي في اللومينا 2003
يطلع علامة تشيك انجن. الاقي دقه في القير و نتعه مع كل تبديلة
بس اذا فصلت البطارية و رجعته يرجع وكاله

و بالنسبة لقطع الفحص مايشتغل في كثير من السيارات
والكوابرس واللومينات احتمال ما يطلع لك كل العيوب ف بلاش خسارة فلوس


up 1 down 1
fowad 126
قبل 3 شهر و 2 أسبوع



يا خوي  دحوم الله يوفقك اريد القطعة كيف أحصلها. مع شرح طريقة استخدامها تكفون بالربع  أنا معي كامري ٢٠١١ 


up 1 down 0
طبعي غير بعض البشر 43
قبل 3 شهر و 2 أسبوع



جميلة هالقطعه بس كان فيه منها انواع ايهم افضل وكم السعر ومن وين اطلبها افيدونا الله يسعدكم


up 1 down 0
هاوي707 183
قبل 3 شهر و 2 أسبوع



حياكم تحصلونها بحراج او بسوق في قطعه للاندرويد وفي قطعه للايفون
تعرفها من الصوره الي حاطها البائع شعار اندرويد او ابل
انا شريتها من الصيني علي اكسبرس حبتين ب٥٠ او٤٥ريال ناسي بالضبط شامل الشحن
السبب اني طلبتها من الصين لانها ارخص من ربعنا كانوا يبيعونها ١٠٠ريال للحبه
قبل سنتين او ثلاث لكن حاليا اشوف سعرهم معقول تشتريها منهم افضل واسرع
في انواع حسب معلوماتي الجديده لونها ازرق واسمهمoBd2 مدري كان نزل شيء اجدد
وحجمها صغير
بعدها تحمل برنامجها بالاستور اكتبoBdوتطلعلك برامج كثيره البرنامج الي بفلوس هذا المطلوب اناسي اسمه لكن هو الوحيد الي بفلوس بعدها مبروك عليك البرنامج والقطعه
طريقة الاستخدام ولا اسهل منها البرنامج يدعم اللغه العربيه
واذا تبي تعرف اكثر عنه اكتب باليوتيوب قطعةoBd وتطلعلك شروحات للبرنامج وتحثل بعد بقوقل شروحات المهم استخدامه سهل جدا جدا تشوف الثروتل قوته وحرارة المكينه واشياء كثيره
اما حرارة القير تطلعها من الاعدادات تحصل شرحها باليوتيوب عند ماشتغل مدري ليه يمكن كمبيوتر السياره مايدعم حرارة القير
وصلى الله وبارك على نبينا محمد

ملاحظه الصين يطولون على ماتجي تاخذ شهر ونص لان الشحن مجاني خذها من ربعنا احسن بس شف الي سعره ٥٠ريال وتحت


up 1 down 1
d7ooom777 458
قبل 3 شهر و أسبوع



موضوع ممتاز
خيرة لك فصلت البطارية مع انه حل جدا بسيط ولا يجي ع
البال بس في الاخير جاب نتيجة .


up 1 down 1
زكريا حكمي 82
قبل 3 شهر و أسبوع