أضف سؤال أو موضوع جديد          

موقف محرج ياشباب

up 7 down 3
mutairi305 195
قبل 3 سنه و 3 شهر



السلام عليكم
اليوم موضوعنا بعيدا عن السيارات
ياشباب تو حصلي موقف مؤلم ومحرج
واتوقع انه راح يبقى عالق في ذهني سنين !!
كان عندنا حفلة حريم فالبيت والاهل قالو صرف
نفسك لين تخلص الحفلة الزبدة انا ماعندي اصدقاء
واجد كلهم كم واحد ومو ذاك الميانه المهم قلت اقضيها
فرفره بالسياره لين يطسسون الضيوف وارجع للبيت
والآ السياره يوم اشتغلت لمبة البنزين وقررت اصفط
واتكي بالسياره لين الساعه 10 وارجع للبيت والمشكلة
وقفت بين مطعم حق رزعالشارع العام وبين مصانع مياه
بشارع مضلم لكن قدامي الشارع العام الزبده تكيت ربع
ساعه الا الدورية تلف من الخط السريع عالحاره او السيب
المظلم اللي انا واقف فيه وتعداني وهو يديور ويجي يوقف
عندي اثباتك ورخصتك وانزل ووش عندك هنا وانا خذلك
تلعثم وخربطة فالكلام ههههه ماتوقعت ولو لواحد بالمية
ان الدورية بتلف مع هاللفه اصلا !! حتى السيارات ماتلف
معها الزبده وقف ونزلني ويفتش السياره ويلقى حبوب حقت
مستشفى وقام يسال هذي وش وانا اذكر انها حقت الوالده تستخدمها
للسكر ومن قوة الموقف قلت مدري وفتشني وفتش السياره وريقي
نشف من الخرشة انا معروف اني سليط اللسان وما اخجل لكن هالموقف
جاتني ام الركب وعقبها عاد يوم مالقى شي وشاف وجهي بريى وبدا يهدي
حلفت له بالله كذب اني انتظر واحد من اهل الرياض جاي ومايدل هالديره
وقلتله اول ماتدخل حفرالباطن تلقى المطعم الفلاني وبجنبه مصنع وتلقى حارة ضيقه
تلقاني انتظرك والعسكري ما اقتنع وشاك فيني وقعدت احلف له واتلعثم بالكلام هههه
وقال وقفتك هذي ومدنق راسك لاني كنت اطقطق فالجوال
يا انك تنتظر بياع او بتسرق المطعم وابحشمك عنك السرقه لانك
ولد قبايل بس شكلك تنتظر بياع وحلفت له اني دخان ما ادخن شلون انتظر بياع مخدرات
وقعد يناظر فالاثبات وجه برئ حتى شنبي خفيف قال حرك واحسه للحين شاك
الزبده يالربع هذا الموقف الكئيب الي صارلي اتمنى الاخوان انهم مايكررون غلطتي
ولاّ تحطون نفسكم باماكن الشبهات وقبل لا انسى ابي علاج للمواقف المحرجه كيف
انساها وجزاكم الله خير واتمنى اللي بيرد يرد رد زين ولا يسكت افضل







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اخر المواقف ياخوي ، ماعليك شر 

عادي اتوقع معظمنا صار له نفس هالموقف 

عن نفسي ايام الثانوي ماكنت اذاكر الا بالسياره وبحارة مظلمة 
وكنت اتفتش وحوسه بس مشت الامور 

ماراح تروح هالمواقف من الذاكره بس الحلو فيها لا كبرت بتذكرها وتضحك

وبالتوفيق


up 5 down 1
m7md 33 1156
قبل 3 سنه و 3 شهر



الله يطولي بعمرك نريد المزيد من الدفعات المعنويه تكفون


up 2 down 4
mutairi305 195
قبل 3 سنه و 3 شهر



وعليكم السلام

عندك رهاب حاول تطلع كثير وتقابل ناس ومناسبات وراح تتحسن بإذن الله والموقف عادي جدا


up 7 down 2
yahya alajlani 719
قبل 3 سنه و 3 شهر



مشكلتك مخروش لو خشيت بعينه ماراح يقول لك شي ويمكن فيه احد مبلغ عليك شبهه بس تقدر تقول واقف اطقطق بجوالي لاهو حرام ولاهو ممنوع الوقوف هنا والوضع عادي ، ماعليه مع الوقت بتتعود على الوضع


up 1 down 6
0abo_waleed0 134
قبل 3 سنه و 3 شهر



يا اخ يحيى لا الحمدلله الرهاب مو فيني انا اختلطت
مع ناس واكلم اي واحد غريب حتى لو اني ماعرفه
وفيني جرأة حتى لو اني بيتوتي لكن احضر مناسبات
واروح واجي والخجل هذا الحمدلله مو فيني لكن بعض
المواقف المفاجئة ماتقدر تسوي معها شي
وانت يابو وليد صدقت انا فيني خوف من اي سفتي
اقدر اتعامل مع أي كائن الا رجال الأمن مدري وش يجيني!!



up 1 down 1
mutairi305 195
قبل 3 سنه و 3 شهر



موقفك عادي جدا وحسيت انك باقي صغير وبيتوتي
وهذا التلعثم والخرشة بسبب قعدة البيت وصدقني من واقع تجربة قعدة البيت ما تجيب الا الهم وامور كثير سلبية

بالنسبة لك ما عندك اي مرض بس لازم تحتك بالناس كثير يعني اذا في زواج روح حتى لو مالك رغبة
اذا مثلا كنت تغسل الموتر واحد معه نفس موترك عادي اشطح عليه لا تستحي اهم شي خلك جريئ

اما الشبهات ذكرتني بكلام علي بن ابي طالب

من وضع نفسه موضع الشبهات فلا يلومن من اساء به الظن. علي بن ابي طالب

فحاول تبعد عن نفسك الشبهات




up 3 down 1
mercy_sa 1075
قبل 3 سنه و 3 شهر



في مثل ذي المواقف اذا ان لم يصح التعبير سالفه غيرك يضحك ويبتسم وغيرك يغلط وغيرك ينكب وانت وغيرك
وانا ماهمني ضحكت جحا وهروج ابو نواس ... .. اعرضها على صفق الهواء حتى تعداني


up 2 down 1
maged 8 -3
قبل 3 سنه و 3 شهر



حشمك من السرقه عشانك ولد قبايل وماحشمك من الحبوب والمخدرات.....كيف تجي هذي ياعسكري باشا
:))))))


up 5 down 2
midnight_963 676
قبل 3 سنه و 3 شهر



كلام فاضي، كيف يوجه اتهامات بدون اثبات. المفروض تقوله ما اتكلم الا في المحكمة اذا عندك دليل. والحبوب اللي موجودة يروح المختبر و يحللها ما يحتاج ادافع وابرر. سؤال ورد غطاه صدق ما صدق بكيفة. 


up 2 down 2
dell2012 1043
قبل 3 سنه و 3 شهر



يارجال قريبي فتشوه حقين المخدرات ومعهم رشاشات

هو مخرووووش مرررره

سالوه وين اثباتك قال بالبيت

فتشوه طلعو البطاقه من جيبه قالو هذي وش هي هههههههههههههههههههههههههههههه

قال من الرشاشات هذي ماعاد اردي وش اقول


up 1 down 1
coco13 893
قبل 3 سنه و 3 شهر



الله يعينك

المفروض رتبت الأمور من البداية أنك تزور واحد من الأقارب أو الأصدقاء


up 0 down 1
أبو عبادة 4852
قبل 3 سنه و 3 شهر



الموقف الذي صادفك يُعتبر عادي وطبيعي . ونوعا ما يُعتبر بسيط وروتيني بالحياة.
وتصرفك تلقائي وردة فعلك طبيعية بحكم المفاجأة واندفاع الشرطي واتهامك ب ....
ولاينقصك شئ معنوي بالعكس الهدوء واجب والحكمة مطلوبة ولين الجانب ضروري
ولـــــــــــــــــــكن المــــزيد من الثقة والثبات تُدعم موقفك وتقوي حجتك .

والله المُوفق.



up 3 down 1
theuk1984 838
قبل 3 سنه و 3 شهر



الحمدلله قبل شوي صحيت من النوم ورحت اداوم وطرا ع بالي هالموقف واحسني عطيته
اكبر من حجمه !! قبل سنتين كنت قاطع العلاقه بيني وبين ربي ولا اصلي واي موقف اهتز
منه ويقعد براسي شهور وهذا اول موقف محرج يجيني بعد الهداية من سنتين تقريبا ومحافظ
عالاذكار والاستغفار وقراءة القران يوميا .. وما اخفيكم انه بدا يتلاشى من راسي مع ان ماله اقل من 14 ساعه
وتحسفت اني كتبت الموضوع !! بديت اقتنع ان الافكار السلبيه ذي ماتسيطر الا ع المهمل لصلاته
وان المواقف التافهه يكبرها براسك الشيطان وهي ماتسوى
وجزاكم الله خير ياشباب واشكر كل من رد علي رد جميل




up 5 down 0
mutairi305 195
قبل 3 سنه و 3 شهر



لــو مكانـك تـكي بالمـمشي معي قهـوه وحلى جلسه على جوال الين مايتهون 


up 0 down 1
ناجي هليل 34
قبل 3 سنه و 3 شهر



موقف عادي جدا واغلبنا تعرض له وبالعكس هذا يدل على قوة الامن عندنا 

بفضل الله واعتقد عندك مشكله بسيطة ولازم تخالط ناس اكثر 

وتطور مهارة التواصل عندك.


up 0 down 4
abomesal 1038
قبل 3 سنه و 3 شهر



لو قلت الصدق ممكن ماتتلخبط ،،، اما سالفة بتستنى واحد هذي فيها كيني ميني ولنفترض العسكري لمن شافك متلخبط قلك اتصل على اللي جاي شوف وين وصل 


up 1 down 1
zax_makkah 248
قبل 3 سنه و 3 شهر



خلك واثق من نفسك و خلاص ماحد يقدر يسوي لك شيء او يتبلى عليك

حتى لو شيء مفاجئ وقفك عسكري فتش خد راحتك بس يتهمني بشيء مهوب فيني

لا يوقفني الا الشرطه اشتكي عليه او اوقفه عن حده مايجوز يتهمني بشيء مو فيني و يهيني




up 2 down 1
mustafa77 6103 414
قبل 3 سنه و 3 شهر



وشي بيتوتي ذي . اقول اطلع واسترجل


up 0 down 7
ابوعابدالله 81
قبل 3 سنه و 3 شهر