استشاره في استعادة سيارة بعد بيعها

0 3

لايمكنك التصويت حتى الحصول على 20 نقطة على الأقل
إضغط هنا للإخفاء

الحويزي1 1129
قبل 5 سنه و 6 شهر

السلام عليكم و رحمه الله

عندي استشاره يا جماعه الخير بخصوص استعاده سياره بعتها قبل ثلاثه شهور كابرس 2013

بالرغم اني بعتها و انا خسران فيها تقريبا 70 الف واستخدامي لها 4 سنوات. طبعا بعد ما بعت السياره كأني تندمت وخاصة اني احترت وش اشتري مره جيب مره سيدان واللي بأشتريه مستعمل وخايف من الغش بينما سيارتي اللي بعتها مافيها عيب وامورها تمام، بس لانها كانت شبابيه ومحتاج سياره رسميه. اما جيب لكزس 2008 الى 2013 او سيدان es350 موديل 2016 او 19

قبل كم يوم ارسل واحد من اخواني رابط اعلان في موقع حراج دخلت عليه الاقي موتري معروض للبيع الكابريس، وانا بعت على الرجال ب 44 ولقيته يقول ان السوم تقريبا 30.

طبعا خلال ثلاثه اشهر هذه مشاه حوالي 15 الف يعني صار العداد الحين فوق 200 الف، وقال السياره واقفه في معرض ورحت شفتها بالمعرض ولقيت البودي ماتغير اي شيء نفس البدي اللي كان معي رشات تجميليه في احد الجوانب، اللهم ان اللي تغير علي فيها شغلتين. السياره جاها اثر سافي قوي طلع بعض اجزاء البويه، ونزلت اناظر السياره من تحت ابي اشوف بطنه باقي نظيف ولا لا. واشوف دبه التلوث اللي تحت السائق عليها زيت بالرغم ما اذكر في السياره تهريب زيت يوم كانت معي.

ماادري متخوف من استرجاع السياره لأن اللي اشتري السياره باقي صغير اتوقع انه جار على السياره بالتدعيس ولعن خيرها، يوم يجربها قبل يشتري لعن والديها بالدعس، طبعاً اذكر قلت بنفسي لو اشترى فصارت حلاله ومافيه لزوم اتكلم عليه. واما اذا ما اشترى فوالله مايروح الا بعد ما اسمعه كم كلمه كانت في بالي، واللي مخوفني من استعادتها ان السياره مشت حوالي 15 الف خلال فتره بسيطه... ما ادري متردد، لو ادري انها مثل ماكانت قبل ابيعها احتمال اتوكل على الله وآخذها بالرغم اني يوم بعتها، طايبه نفسي منها ومو من عيب بس لانها سياره تعتبر شوي شبابيه...

بالنسبه لصرفيه البنزين كانت كويسه اعبيها 90 ريال تمشيني تقريبا اسبوع، يعني من 500 الى 550 كيلو

لو رجعت اشتريتها اكيد اني باشتري بعد سياره رسميه لكن بأضطر انزل الميزانيه لانه بيروح جزء منها للكابرس لو رجعت وشريته...

طبعا متوقع انه يستغل رغبتي في استرجاع السياره ويطمع في القيمه عشان كذا ممكن ارسل عليه اخوي يفحص السياره ويخلي الرجال ياخذ يوقع المبايعه بعد ماياخذ فلوسه، وانا اجي بعدين للمعرض اوقع الشراء واسوي التأمين وانقلها، وبنفس الوقت احس الحركه فيها تلاعب وسوء ظن مسبق، واحتياط ماله لزوم...

بالرغم ان بيعته للسياره الحين بتكون بخراجه، يقول مسيوم 30 بس يمكن مايبيع الا بنفس راس ماله...

واحيان اقول بأجيه من البدايه واذا شفته طمع فيني، كنسلت الموضوع والله يرزقه...

مدري محتار وابي رايكم الله يسعدكم...

إبلاغ

الردود