صرفية السوناتا

ابدا بالاشياء الاستهلاكية اذا ماغيرتها 
مثل بواجي فلتر هواء تنظيف بوابة وشيك عالبخاخات اذا متسخه 

البواجي شر الله الشرير عن تجربه غيرتها لسيارتي رجع لصرفيتها الاوله وازين والفلاتر بالنسبه لبخخات اذا بتنظفه نظفها بالجهاز الخاص فيه تحصله ببعض الورش 

زي مافادوك الشروات واضيف زيت المكينة ايش نوعه الي تستخدمه؟؟ عندك لزوجة متوسطة10W30 او5w30 الزوجة الاكثر تقيلة ع الَمكينة

كم لك مغير البواجي ؟ وصفاية البنزين ؟ ومنظف الثلاجة والبخاخات ؟ وحساس الهواء كيفه عندك ؟ وكيفك في تغيير فلتر الهواء حق المكينة كل كم تغيره ؟ وهل تنظفه باستمرار ولا لا ؟ ظغط الكفرات عندك مثل ماهو سابقاً ولا نازل وهل تشيك عليها اول بأول لو نزلت شي بسيط مهب شرط يبنشر عشان أقول انه نازل لأنه احياناً ينزل لين 25 وانت ما تدري عنه خاصة اذا ماعندك حساس كفرات


ترى كل هالاشياء اللي قلتها لك تأثر في زيادة صرفية الموتر

عشان كذا لا نجي نعاتب الموتر وهو له 4 سنوات ما قصر معنا صرفية ممتازة ونذمه وحنا مهملينه في جوانب كثيرة وما نبيه يتأثر في الصرفية ولا شي.

النقطة الأخيرة اللي ذكرتاها اشوفها مبالغه مع احترامي لك يعني استغني عن موتري اللي على يدي وكالة ماشاء الله ولا طلب مني ذيك الطلبات واشتري مستعمل نفس الموديل مدري من اللي مستعمله ويمكن احط فيه او اكيد بحط فيه اول ما اشتريه عشان فرق 100 كيلو صرفية وانا مابعد شيكت على موتري

وترى الموتر طبيعي مع كثر ممشاه والاستخدام يتأثر نسبياً ويبدأ يزيد بنسبة بسيطة استهلاكه للبنزين هذا عادي

اختصاراً للكلام هذا كله جاوبني على النقاط اللي فوق ومن اجابتك بنحدد النتيجة

ولا تنسى وانا اخوك فرق القيمة اللي بتبيع فيها موترك وتزيد عشان تشتري كامري مهيب على يدك وما تدري من اللي مستخدمها وفحص ونقل ملكية وتأمين وحوسه عشان فرق كم ريال في كم لتر زود طيب وفروقات هالمبالغ اللي بدفعها عن قيمة هالبنزين الفرق كم سنة قدام وخذ في الحسبان تكلفة قطع الغيار والاستهلاكيات هل موترك ارخص ولا ذي والأخيرة والاهم وش يضمنك ذا الكامري اللي بتشتريها مستعمله انها بتمشيك زي السوناتا اول 700 وزود يمكن راعيها مهمل او مهب شرط مهمل ما غير استهلاكيات وبتلقى فرق الكيلوات بينها وبين موترك بسيط

لا تفهم من كلامي هذا اني ضد الكامري او شركة معينة لا والله مادريت عنهم كلهم ولو يجي أي واحد ثاني يقول نفس كلامك معه هوندا ولا اللي هي بقوله نفس الكلام

لا يصير عندنا هاجس البنزين وكم يمشيني تحديداً يخليني اشتري سيارة اغلى من موتري واتحمل تكاليف اعلى واحياناً تكلفة صيانة دورية اعلى عشان والله أقول تمشيني 700 طيب يمكن تغييرت فحمات طلعت الفرق هذا كله ولا فلتر هواء مكينة صح ولا لا ؟

فتركد وانا اخوك ولا تطير في العجه

يعطيكم الف عافيه

واخ ابراهيم
الموضوع له تقريباً يومين
امس الحمدلله رحت وسويت تصفيه كامله للمكينه غيرت بواجي وفلاتر ونظفة بوابة الثروتل والبخاخات شالها وحطها في جهاز
السياره تحسنت بشكل واضح عن اول
صحيح مو زي اول سنه او ثاني سنه بس افضل من السابق
ممكن لان الكفرات والمساعدات والخ تقريبا انتهت

ترا بالصيف تصرف اكثر وبالنسبة لي لاتخسر نفسك ولاتشيك على شي تخسر ع الفاضي

غير بواجي وفلتر هوا وبس السوناتا تصرف من الاخير يمكن عشان وزنها ثقيل للعلم ترا ذي السوناتا فيها فولاذ عشان كذا وزنها ثقيل مقارنة بالكامري والاكورد

السوناتا اللي ماتصرف وفيها قوه وعزم موديلات 2005 الى 2010 بس